ފ. ނިލަންދޫއިން 129 ގޯތި ދޫކުރަން އިއުލާންކޮށްފިއެވެ.

ނިލަންދޫ ކައުންސިލުން ކުރި އިއުލާނެއްގައި ބުނެފައިވަނީ، 2024 އެޕްރީލް 03ގައި ބޭއްވި އެކައުންސިލްގެ 04 ވަނަ ދައުރުގެ 2024 ވަނަ އަހަރުގެ 14 ވަނަ ޖަލްސާއިން ނިލަންދެއަތޮޅު އުތުރުބުރީ ނިލަންދޫއިން ދިރިއުޅުމަށްޓަކައި ބަންޑާރަ ގޯތި ދޫކުރުމަށް ފާސްކޮށް، 30 މާރިޗު 2024 ގައި ގެޒެޓްކޮށްފައިވާ ގޯތި ދޫކުރުމާބެހޭ އުޞޫލަށް ބައެއް އިޞްލާޙް ގެނެސް، އެބަދަލުތަކާއެކު 2024 އެޕްރީލް 12ގައި ވަނީ އެއުޞޫލު ގެޒެޓްކޮށްފައި ކަމުގައެވެ. އެހެންކަމުން ކައުންސިލުން ނިންމާފައިވާ ގޮތުގެ މަތިން ފ. ނިލަންދޫ އިން ދިރިއުޅުމުގެ ބޭނުމަށް ބަންޑާރަގޯއްޗަށް އެދި ހުށަހެޅުމުގެ ފުރުޞަތު ޢާއްމުކޮށް ހުޅުވާލާ ކަމަށެވެ.

ކައުންސިލުން ބުނެފައިވަނީ، އެރަށުން ދިރިއުޅުމަށް ދޫކުރާ ބަންޑާރަ ގޯއްޗަށް އެދި ފޯމު ހުށަހެޅުމުގެ ފުރުޞަތު މިނިސްޓްރީ އޮފް ހައުސިންގ އެންޑް އަރބަން ޑިވެލޮޕްމަންޓްގެ "ހިޔާވެހި" ޕޯޓަލް ތެރެއިން ފަހިވެފައިވާނެ ކަމަށެވެ.

އަދި ނިލަންދޫ ކައުންސިލަށް ފޯމު ހުށަހަޅަން ބޭނުންވާ ފަރާތްތަކުގެ ފޯމުތައް ރަސްމީ ބަންދުނޫން ކޮންމެ ދުވަހެއްގެ ހެނދުނު 09:00 އިން މެންދުރުފަހު 01:00 އަށް ކައުންސިލް އިދާރާއިން ބަލައިގަތުމުގެ އިންތިޒާމް ހަމަޖެހިފައިވާ ކަމަށްވެސް ބުނެފައި ވެއެވެ.

ބަންޑާރަ ގޯއްޗަށް ޝަރުތު ހަމަވާ ފަރާތްތަކުން 2024 އެޕްރީލް 14 އިން 2024 މެއި 30 ވާ ބުރާސްފަތި ދުވަހުގެ 13:00 އާއި ހަމައަށް ގޯއްޗަށްއެދި ފޯމު ހުށަހެޅުމުގެ ފުރުޞަތު އެ ކައުންސިލުން ވަނީ ޢާއްމުކޮށް ހުޅުވާލާފައެވެ.

ނިލަންދޫ ކައުންސިލުން ގޯތި ދޫކުރުމަށް ހުޅުވާލާފައިވަނީ ކުރިޔަށް އޮތް ރައްޔިތުންގެ މަޖިލިހުގެ އިންތިޚާބަށް 10 ދުވަހަށް ވެފައި ވަނިކޮށެވެ. އެ ދާއިރާއަށް ރައީސް މުއިއްޒު އަންހެން ކޮއްކޮ ދަނީ ވާދަކުރަމުންނެވެ.