ފިތުނަ އުފައްދާކަށް ހުއްދަދޭކަށް ނުވާނެ! އަދި ޖާގަ ދޭކަށްވެސް ނުވާނެ! ރަމަޟާންމަހު މަދުބަޔަކު އެއްކޮށްގެން މިހާރު އޮތް އެއްބަވައިވަންތަކަމާއި ހަމަޖެހުން ނަގާލުމަށްޓަކައި އިލްޒާމް އެޅުވުން ނޫންކަމެއް ޕީ.އެން.އެފަކުން ކުރާތީ ނޫނީ ނުފެނޭ. ޕީ.އެން.އެފް ކަމުނުދަނީ އެހެންވެ. https://t.co/FHGUluAASF
— Ali Zaid (@alizaid1000) April 7, 2024
މާދަމާ ރޭ ބެއްވުމަށް ހަމަޖެހިފައިވާ ޕީޕަލްސް ނެޝަނަލް ފްރަންޓް (ޕީއެންއެފް) އުފެއްދުމުގެ ޖަލްސާގައި ބައިވެރިވުމުގެ ހުއްދަ ރައީސް ޔާމިންއަށް ކަރެކްޝަންސްއިން ދީފައިނުވާކަމަށް ވަނީ މައުލޫމާތު ލިބިފައެވެ.
ޕީއެންއެފް އިން ބުނި ގޮތުގައި މާދަމާރޭ ބާއްވާ ޖަލްސާގައި އެ ޕާޓީ އުފެއްދެވުމުގައި އިސްކޮށް މަސައްކަތް ކުރައްވާ ކުރީގެ ރައީސް އަބްދުﷲ ޔާމީން ވެސް ބައިވެރިވެވަޑައިގަންނަވާނެއެވެ.
ޔާމީން އިސްވެ ހުންނަވައި އުފައްދަވާ ޕީއެންއެފް އުފެއްދުމަށް ބާއްވަންޖެހޭ ހާއްސަ ޖަލްސާ ބޭއްވުމުގެ ހުއްދަ އިލެކްޝަންސް ކޮމިޝަން (އީސީ) އިން ދީފައި ވަނީ މިދިޔަ ބުރާސްފަތި ދުވަހުއެވެ. ޔާމީން 11 އަހަރު ދުވަހުގެ ޖަލު ހުކުމެއް ތަންފީޒު ކުރައްވަމުން ގެންދަވާތީ އެމަނިކުފާނުގެ ނަމުގައި ސިޔާސީ ޕާޓީއެއް އުފައްދަން އީސީ އަށް ހުށަނޭޅެނެއެވެ. އެހެންވެ އެ ޕާޓީގެ މުއައްސިސެއްގެ ގޮތުގައި ހަމަޖެއްސެވީ އެ މަނިކުފާނުގެ ދަރިކަލުން ޒޭން އަބްދުﷲ ޔާމީނެވެ.
ޕީއެންއެފް އުފެއްދުމުގައި އިސްކޮށް އުޅުއްވާ ކުރީގެ މިނިސްޓަރު މުހައްމަދު މަލީހް ޖަމާލް "އެކްސް" ގައި ވިދާޅުވެފައިވަނީ ޕީއެންއެފް އުފެއްދުމަށް ބާއްވާ ޖަލްސާ މާދަމާރޭ އޮންނާނެ ކަމަށާއި މި ޖަލްސާގައި ޔާމީން ބައިވެރިވެވަޑައިގަންނަވާނެ ކަމަށެވެ. ޖަލްސާ ބާއްވާނެ ތަނެއް އަދި އިތުރު އެއްވެސް މައުލޫމާތެއް އޭނާ ނުދެއްވައެވެ.
ޔާމީންގެ ޕާޓީ، ޕީއެންއެފް އުފެއްދުމުގެ ޖަލްސާގައި އެމަނިކުފާނު ބައިވެރިވެވަޑައިގަތުމުގެ ހުއްދައަކަށް އެދި ގާނޫނީ ޓީމުގެ ފަރާތުން މޯލްޑިވްސް ކަރެކްޝަނަލް ސާވިސް އަށް ވަނީ ސިޓީ ފޮނުވައިފައެވެ. އެ ސިޓީއާ ގުޅިގެން ކަރެކްޝަންސް އިން މިހާރު ޖަވާބު ފޮނުވާފައިވާ ކަން އެނގިފައިވެއެވެ.
އެގިފައިވާ ގޮތުގައި ކަރެކްޝަންސްއިން ޕީއެންއެފްއަށް އަންގާފައިވަނީ ޖަލްސާގައި ބައިވެރިވުމުގެ ހުއްދަ ދެވެން ނެތްކަމަށެވެ. އެހެންނަމަވެސް ޕީއެންއެފްއިން އަދި ރަސްމީކޮށް މިކަން ހާމަކޮށްފައެއް ނުވެއެވެ.
މިދިޔަ ނޮވެމްބަރު މަހުގެ ތެރޭގައި ޕީޕީއެމް ލީޑަޝިޕްގެ ބޭފުޅުންނާ ޖެހުނު މައްސަލައެއްގައި ޔާމީން ވަނީ އެ ޕާޓީން ވަކިވެވަޑައިގެންފައެވެ. އޭގެ ފަހުން ޕީއެންއެފް އިން އެ ޕާޓީގެ އޮފީހުގައި ބާއްވަމުން އަންނަ ޖަލްސާތަކުގައި ކޮންމެ ރެއަކުހެން އެމަނިކުފާނު ބައިވެރިވެވަޑައިގަންނަވައެވެ.
