ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދާއި ކުރީގެ މިނިސްޓަރު މުހައްމަދު މަލީހު ޖަމާލަކީ "ސިޔާސީ ރަންޑީއެއް" ކަމަށާއި އެބޭފުޅުންގެ ބަސް ކުރީގެ ރައީސް އަބްދުﷲ ޔާމީން ގަބޫލު ކުރައްވާތީ ދެރަވާ ކަމަށް ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެއެވެ.
ޕީއެންސީގެ ލީޑަޝިޕުން މިއަދުގެ މެންދުރު ފަހު ބޭއްވި ޕެނަލް ޑިސްކަޝަނެއްގައި، އަބްދުއްރަހީމް ވިދާޅުވީ، ޖަމީލާއި މަލީހްގެ ބަސް ގަބޫލުކޮށްގެން ޕީޕީއެމް/ޕީއެންސީގެ ލީޑަޝިޕާ ދުރަށް ޔާމީން ވަޑައިގަތުމަކީ ލީޑަޝިޕްގެ ބޭފުޅުން ހިތާމަ ކުރައްވާ ކަމެއް ކަމަށެވެ. ރާއްޖޭގެ ރައީސްކަން ކުރެއްވި ބޭފުޅުންގެ ތެރެއިން އެންމެ ގިނަ ހިދުމަތްތައް ކުރެއްވި ބޭފުޅަކީ މިއަދު ވެސް ޔާމީން ކަން ލީޑަޝިޕުން ގަބޫލު ކުރައްވާ ކަމަށް ވެސް އަބްދުއްރަހީމް ވިދާޅުވިއެވެ.
"އަޅުގަނޑުމެން ދުވަހަކު ވެސް ރައީސް ޔާމީނަކަށް ވަގަކަށް ނުގޮވާނަން. އަޅުގަނޑުމެން ދުވަހަކު ވެސް ޔާމީންގެ އަބުރުފުޅަކަށް އަރައެއް ނުގަންނާނަން. އެއީ އަޅުގަނޑުމެން ކުރާނެ ކަމެއް ނޫން. އެކަމަކު، ހަގީގަތް ހާމަކުރަން އަޅުގަނޑުމެން ޖެހިލުމެއް ނުވޭ،" އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވި ގޮތުގައި ޖަމީލަކީ ކޮންޓްރެކްޓް އުސޫލުން ރާއްޖޭގެ ވެރިކަން ވައްޓާލަން އުޅުއްވާ ބޭފުޅެއް ކަމަށެވެ. މާޒީގައި ފެނިގެން ދިޔަ މަންޒަރުތަކުން ވެސް އެކަން ވަރަށް ރަނގަޅަށް އެނގިގެންދާނެ ކަމަށާއި ޖަމީލަކީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުން ފެށިގެން އައި ކޮންމެ ވެރިކަމެއް ވައްޓާލުމުގެ މަސައްކަތުގައި ތަފާތު ޖަމާއަތްތައް ހައްދަވައިގެން އުޅުއްވި ބޭފުޅެއް ކަމަށް ވެސް އަބްދުއްރަހީމް ވިދާޅުވިއެވެ.
މަލީހާ ބެހޭ ގޮތުން އަބްދުއްރަހީމް ވިދާޅުވީ، ރައީސް ޔާމީން ޖަލުގައި އޮންނެވި އިރުގައި މަލީހު މުޒާހަރާ ކުރަން ނުނިކުންނަވައި ހުންނެވީ ފިނި ކޮޓަރީގައި ކަމަށެވެ.
ޖަމީލާއި މަލީހަކީ މީގެ ކުރިން އެކިއެކި ފޯރަމްތަކުގައި ޔާމީނާ ދެކޮޅަށް ވަރަށް ގަދައަށް މަސައްކަތް ކުރެއްވި އަދި ޔާމީންގެ ވެރިކަން ބަދަލުކުރުމަށް އެމްޑީޕީއާ ގުޅިގެން އިސް ދައުރެއް އަދާކުރެއްވި ބޭފުޅުންނެވެ. ކުރީގެ ޕޮލިސް ކޮމިޝަނަރު ހުސެއިން ވަހީދާ ބެހޭ ގޮތުން އަބްދުއްރަހީމް ވިދާޅުވީ ޔާމީން ޖަލަށް ލުމުން މިނިވަންކުރުމަށް ގޮވާލައި ބޭއްވި މުޒާހަރާތަކާއި ކެމްޕެއިނު ހަރަކާތްތަކުގައި ހުސެއިން ވަހީދު ބައިވެރިވެވަޑައިނުގަންނަވާ ކަމަށެވެ.
އަދި މާލޭގެ މޭޔަރަކަށް މިހާރުގެ ރައީސް ޑރ. މުހައްމަދު މުއިއްޒު ކެމްޕެއިން ކުރެއްވި އިރުގައި ހުސެއިން ވަހީދު އެކަމުގައި އެއްގޮތަކަށް ވެސް ނޫޅުއްވާ އިރު، ވޯޓުލާން ވެސް ވަޑައިނުގަންނަވާ ކަމުގައި އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ ސިޔާސީ ލީޑަރުން ހައްޔަރު ކުރުމުން އެ ބޭފުޅުންގެ އަނބިއަނބިކަނބަލުންގެ މުޒާހަރާތަކަށް ނުކުތް ނަމަވެސް ޔާމީންގެ އަނބިކަނބަލުން ފާތިމަތު އިބްރާހިމް އަދި ދަރިކަލުން ޒެއިން ވެސް ނުކުމެވަޑައިނުގަންނަވާ ކަމަށެވެ. އަބްދުއްރަހީމް ވިދާޅުވި ގޮތުގައި ޔާމީންގެ ހައްގުގައި އެންމެ ބޮޑަށް މަސައްކަތް ކުރެއްވި ބޭފުޅުން މިއަދު ތިއްބެވީ ޕީޕީއެމް/ޕީއެންސީގެ ލީޑަޝިޕްގައެވެ.
