އއ. ރަސްދޫގައި ކުއްޖަކަށް ހަނގާކޮށް، އަނިޔާ ކުރި މައްސަލައާ އަދި މިހާތަނަށް ސުވާލުކޮށްފައިވަނީ އެއް ކުއްޖަކާކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެއެވެ.
އއ. ރަސްދޫގައި ކުއްޖަކަށް ހަނގާކޮށް، އަނިޔާ ކުރި މައްސަލައާ ގުޅިގެން މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިހުސާން ވިދާޅުވީ މިކަން ކުރި ދެކުދިންވެސް މިހާރު ދެނެގަނެވިފައިވާކަމަށާއި، އެއީ 13 އަހަރުގެ ކުއްޖަކާ 14 އަހަރުގެ ކުއްޖެއް ކަމުގައެވެ. އަދި އޭނާ ވިދާޅުވީ އޭގެ ތެރެއިން އެއް ކުއްޖަކު އޭނާގެ ބެލެނެވެރިޔާއާއެކު ޕޮލިހަށް ހާޒިރުވެ ބަޔާން ދީފައިވާ ކަމަށެވެ.
މިރޭގެ ނޫސްވެރިންގެ ބައްދަލުވުމުގައި ބަންޑާރަނައިބު ވިދާޅުވީ ކުޑަކުއްޖަކު ބަންދު ކުރަންޖެހިއްޖެ ނަމަ އޮންނަ ގާނޫނީ އިޖުރާއަތު މިހާރު އޮތީ އެހާ ސާފުކޮށް ނޫން ކަމަށެވެ. އެގޮތުން ކުޑަކުއްޖާ ބަންދު ކުރުމުގެ އަމުރު ނެރެންޖެހޭ ކޯޓު ވެސް ސާފު ނުވާ ކަމަށާއި ގާނޫނަށް ގެނެވޭ އިސްލާހުތަކާއެކު ކޯޓު އަމުރު ހޯދުމުގެ ހުރި ގޮންޖެހުންތައް ވެސް ހައްލުވާނެ ކަމަށް އުޝާމް ވިދާޅުވި އެވެ.
މި ނޫސްވެރިންގެ ބައްދަލުވުމުގައި ބަންޑާރަ ނައިބު އަހުމަދު އުޝާމް ވިދާޅުވީ ކުޑަކުދިންގެ އަދުލުގެ ގާނޫނަށް ސަރުކާރުން ގިނަ އިސްލާހުތަކެއް ގެންނަން ނިންމާފައިވާ ކަމަށެވެ. އެގޮތުން ކުށުގެ މަސްއޫލިއްޔަތު އަދާކުރަންޖެހޭ އުމުރު 15 އަހަރުން 12 އަހަރަށް ބަދަލު ކުރަން ސަރުކާރުން ނިންމާފައިވާ ކަމަށް އުޝާމް ވިދާޅުވި އެވެ.
ރަސްދޫ މިސްކިތެއްގައި ކުޑަ ފިރިހެން ކުއްޖަކަށް އަނިޔާ ކުރި މައްސަލަ ފެންމަތީ އެ ކަން ކުރާ މަންޒަރުގެ ވީޑިއޯއެއް ރޭ އާންމުވުމާ ގުޅިގެންނެވެ.
ފުލުހުން ބުނި ގޮތުގައި ކުއްޖާ އަށް އަނިޔާ ކުރީ 13 އަހަރުގެ ކުއްޖަކާއި 14 އަހަރުގެ ކުއްޖެކެވެ. އެ މައްސަލަ ސީރިއަސް މައްސަލައެއް ގޮތުގައި ބަލަމުން އަންނަ އިރު، ފުލުހުންގެ ޓީމެއް މިހާރު އަންނަނީ ރަސްދޫގައި ހަރަކާތްތެރިވަމުންނެވެ.
