ރާއްޖޭގެ އިގްތިސާދީ ސަރަހައްދު ބަލަހައްޓަން ސަރުކާރުން ގަތް އަސްކަރީ ޑްރޯންތަކަށް ދިޔަ ހަރަދުގެ މައުލޫމާތު ހޯދަން ޑިފެންސް މިނިސްޓަރު ގައްސާން މައުމޫން، ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ 241 ކޮމިޓީއަށް ހާޒިރުކުރަން މިއަދު އެ ކޮމިޓީން ނިންމައިފިއެވެ.
ޣައްސާން، ކޮމެޓީއަށް ހާޒިރު ކުުރުމަށް ހުށައެޅުއްވީ ހެންވޭރު ހުޅަނގު ދާއިރާގެ މެންބަރު ހަސަން ލަތީފެވެ.
ހަސަން އެެގޮތަށް ހުށައެޅުއްވީ ކުރީގެ ރައީސް މުހައްމަދު ނަޝީދު އަވަހާރަ ކޮށްލަން ދިން ބޮމުގެ ހަމަލާއާ ގުޅޭ އިތުރު މައުލޫމާތު ލިބިފައިވާ ކަމަށް މަޖިލީހުގެ އިއްޔެގެ ޖަލްސާގައި ވިދާޅުވުމާއި ގުޅިގެން އެ މައުލޫމާތު ސާފު ކުރެއްވުމަށެވެ.
ކޮމިޓީ ބައްދަލުވުމުގައި ހަސަން ލަތީފް ވިދާޅުވީ އޭނާ އިއްޔެ މިނިސްޓަރު ގައްސާންއާ ކުރެއްވި ސުވާލަކީ ސިއްރު ބައްދަލުވުމެއްގައި ނޫނަސް ޖަވާބު ދެއްވެންޖެހޭނެ ސުވާލެއް ކަމަށެވެ.
"އެއީ އަޅުގަނޑު ކުރި ސުވާލަކީ އެ ޑްރޯންގެ ޓެކްނިކަލް ކަންކަމާބެހޭ ސުވާލެއް ނޫން. އެ ޑްރޯން ގަންނަން ދިޔަ ހަރަދުގެ ވާހަކަ އަޅުގަނޑުއެހީ. އެހެންވީމަ އެއީކީ ސިއްރު މައުުލޫމާތަކަށް ވާންޖެހޭނެ ކަމަކަށް އަޅުގަނޑު ގަބޫލެއް ނުކުރަން،" ހަސަން ލަތީފް ވިދާޅުވި އެވެ.
އެހެންނަމަވެސް، އެ މައުލޫމާތު ދެއްވޭނީ ސިއްރު ކޮމިޓީއެއްގައި ކަމަށް ގައްސާން ވިދާޅުވެފައިވާތީ އެ މައުލޫމާތު ހޯދަން ކޮމިޓީއަށް މިނިސްޓަރު ހާޒިރުކުރުމަށް ހަަސަން ލަތީފް ހުށަހެޅުއްވި އެވެ. އެގޮތުން ސާފުކުރަން ބޭނުންވާ މައުލޫމާތުތަކުގެ ގޮތުގައި ހަސަން ލަތީފް ހުށަހަޅުއްވާފައިވަނީ، ޑްރޯންތައް ގަންނަން ދައުލަތުން ކޮށްފައިވާ ހަރަދާ، ޑްރޯންތަކާ ގުޅޭ ބައެއް އެއްޗިއްސަކީ ހިލޭ އެހީއެއް ކަމަށް ރައީސް މުހައްމަދު މުއިއްޒު ވިދާޅުވެފައިވާތީ އެ މައުލޫމާތެވެ.
ކޮމެޓީއަށް ހަސަން ހުށައެޅުއްވި އެ ހުށައެޅުއްވުން ކޮމެޓީ މެންބަރުން ވަނީ ފާސްކޮށްފައެވެ. ކޮމެޓީން ފާސް ކުރީ ކުރިއަށް އޮތް ފަސް ދުވަހުގެ ތެރޭގައި ޣައްސާން އެ ކޮމެޓީއަށް ހާޒިރުކޮށް މައުލޫމާތު ހޯދުމަށެވެ.
