މަގުމަތިން ދިމާވެ ދިވެހި ފުޓްބޯޅައިގެ ވާހަކަ ދައްކައި މެޗުތަކާ ގުޅޭ ސުވާލުތައް ކުރާ މީހުން ގިނަވަމުން އަންނަކަމަށާއި މިއީ ދިވެހި ފުޓްބޯޅައިގައި ސަޕޯޓަރުންގެ ބައިވެރިވުން އިތުރުވަމުން އަންނަ ކަމުގެ ހެއްކެއް ކަމަށް މާޒިޔާގެ ކޯޗު މުހައްމަދު ނިޒާމް ބުނެފި އެވެ.
ނިޒާމް ބުނީ ރާއްޖޭގެ ފުޓްބޯޅަ އަށް ސަޕޯޓެއް ނެތޭ ބުނެ އެ ދެކެވޭ ވާހަކަތަކުގައި މުޅިން އަސްލެއް ނޫންކަން މިހާރު ފެންނަމުން އަންނަ އެއް ސަބަބަކީ ސޯޝަލް މީޑިއާގައި ދިވެހި ފުޓްބޯޅައިގެ ހަރަކާތްތައް ގިނަވުން ކަމަށެވެ.
ފުޓްބޯޅައިގައި ކޮންމެ ގޮތަކުން ވެސް މީހުން އެންގޭޖްވާތަން ފެނުމަކީ ހިތްހަމަޖެހުމެއް. މެޗުތައް ސޯޝަލް މީޑިއާގައި ލައިވްކޮށް ޓީވީން ލައިވްކުރީމަ އެ އިފެކްޓް އަންނަކަން ވަރަށް ބޮޑަށް ގަބޫލުކުރެވޭ.
– އިއްޔެ ބޭއްވި ނޫސްވެރިންގެ ބައްދަލުވުމުގެ ތެރެއިން ނިޒާމް ބުނެފައިވެއެވެ.
ގިނަ ބަޔަކު ސޯޝަލް މީޑިއާގައި އެންމެ ބޮޑަށް ކަންބޮޑުވުން ފާހަގަކުކުރި އެއް ކަމަކީ ގަލޮޅު ދަނޑުގައި ސިޑިބަރިތަކުގައި ކުޑަކުދިންގެ ޕާކް ހަދާ ސާމާނާއި އައުޓްޑޯ ޖިމް ސާމާނުތައް ބަހައްޓާފައި ހުރުމެވެ. އެނގިފައިވާ ގޮތުގައި ސޯޝަލް މީޑިއާގައި އެ ވާހަކަތައް އާންމުވެފައިވަނިކޮށް މިހާރު އަންނަނީ އެ ތަކެތި އެތަނުން ނެގުމުގެ މަސައްކަތްކުރަމުންނެވެ.
ދިވެހިންނަކީ ސޯޝަލް މީޑިއާގައި ވަރަށް އެކްޓިވް ބައެއް ކަމަށާއި ގިނަ ކަންކަން ކުރަނީ އޮންލައިންކޮށް ކަމަށްވާއިރު ފުޓްބޯޅަ މާކެޓް ކުރަން އެންމެ ރަނގަޅު ޕްލެޓްފޯމަކީ ސޯޝަލް މީޑިއާ ކަމަށް ނިޒާމް ވަނީ ބުނެފައެވެ.
މީގެ ގާތްގަނޑަކަށް 15 ވަރަކަށް އަހަރު ކުރިން މަގުމަތިން މީހުން ކުރާ ކަހަލަ ސުވާލުތައް އަންނަން ފެށީމަ އެބަ އެނގޭ މެޗު ބަލާފައި ކަން މެޗަށް ވަރަށް ސަމާލުކަން ދީފައި ހުރީމަކަން އެ ސުވާލުތައް އަންނަނީ. އެއީ ވަރަށް ބޮޑު ކުރިއެރުމެއް.
– ނިިޒާމް ބުނެފައިވެއެވެ.
އެފްއޭއެމުން މި ފަަހަރުގެ ފުޓްބޯޅަ މެޗުތައް ފޭސްބުކް މެދުވެރިކޮށް ލައިވްކުރަމުން އަންނައިރު، ޕީއެސްއެމްގެ ޔެސް ޓީވީން ވެސް އަންނަނީ ވަގުތުން މެޗުތައް ދައްކަމުންނެވެ. އަނެއްކޮޅުން ސޯޝަލް މީޑިއާގައި ފުޓްބޯޅަ ޕްރޮމޯޓްކުރުމުގެ މަސައްކަތްތައް މީޑިއާތަކާއި އެފްއޭއެމުން ވެސް އަންނަނީ ކުރަމުންނެވެ.
ކޮމެންޓު ފޮނުވާ