ލީގުގެ ދެ ވަނަ މެޗުގައި މާދަމާރޭ 9 ޖަހާއިރު ނުކުންނާނީ މާޒިޔާއާ ދެކޮޅަށް ނުކުންނައިރު ގްރީން ސްޓްރީޓްސްއަކީ ވަރުގަދަ ޓީމެއްކަން ސާބިތުކޮށްދޭން ބޭނުންވާކަމަށް ގްރީން ކޯޗު އަލީ ނިސްތާރު ބުނެފިއެވެ.
މެޗުގެ ކުރިން ވާހަކަދައްކަމުން ގްރީން ސްޓްރީޓްސްގެ ކޯޗު ނިސްތާރު ބުނީ މިމެޗަކީ ލީގުގައި ގްރީން ކުރިމަތިލާނެ އެންމެ އުދަގޫ މެޗުކަމަށެވެ. އެއީ މަޒިޔާގެ ގިނަ ކުޅުންތެރިންނަކީ ގައުމީ ޓީމްގެ ކުޅުންތެރިންނަށްވެފައި، ލީގުގައި ވާދަކުރާ އެންމެ ވަރުގަދަ ޓީމަކީވެސް މާޒިޔާކަމަށްވާތީކަމަށް ނިސްތާރު ވަނީ ބުނެފައެވެ.
ވެލެންސިޔާ މެޗުގައި ވަރަށް މަދު ހަމަލާއެއް ގޯލާއި ސީދާކޮށްލެވިފައިވަނީ. ވެލެންސިޔާ މެޗަށްފަހު މާޒިޔާ މެޗް މިހާ ކައިރީގައި އިނުމުން މާބޮޑު މަސައްކަތްކަތެއް އެކަމަށް ނުކުރެވޭނެ. ނަމަވެސް ޕްރީ ސީޒަންގައި ކުޅުނު މެޗްތަކަށް ބަލާއިރު، ހަމަލާތަށްވެސް އުފައްދާ ގޯލަށްވެސް ނުރައްކާކޮށްފައިވޭ.
– ނިސްތާރު ވަނީ ބުނެފައެވެ.
ގްރީންގެ ކުޅުންތެރިން މިމެޗަށް ނިކުންނާނީ މާޒިޔާއަށް ރަގަނޅު ވާދައެއްކޮށް މެޗު ކާމިޔާބު ކުރަންކަމަށްވެސް ނިސްތާރު ވަނީ ބުނެފައެވެ. އަދި ގްރީން ސްޓްރީޓްސްއަކީވެސް ވަރުގަދަ ޓީމެއްކަން ސާބިތުކޮށްދޭން މިއީ ވަރަށް ރަގަނޅު މެޗެއްކަމަށްވެސް ނިސްތާރު ބުނެފައިވެއެވެ،
އަޅުގަނޑުމެން ކޮންމެ މެޗްއެއްވެސް ނަގަނީ ވަރަށް ސީރިއަސްކޮށް، މިލީގުގައި ފަސޭހަ މެޗެއެއް ނިއިންނާނެ. ޓީމުގެ ކުޅުންތެރިންގެ ސްޕްރިޓްވެސް ރަގަނޅު އަދި އެއްވަރެއްގެ ޓީމަކަށް ވުމުން ގްރީންއިން ކޮންމެ މެޗަކަށްވެސް ނިކުންނާނީ ވަރަށް ރަގަނޅަށް ތައްޔާރުވެގެން.
– ގްރީންގެ ކޯޗް ނިސްތާރު ބުނެފައިވެއެވެ.
ގްރީން ސްޓްރީޓްސް ފުރަތަމަ މެޗުން ވަނީ 1-0 އިން ވެލެންސިއާ އަތުން ބަލިވެފަ އެވެ.
ކޮމެންޓު ފޮނުވާ