ރޯދަ މަސް ތެރޭގައި ޕްރޮސެކިއުޓާ ޖެނެރަލް (ޕީޖީ) އޮފީހުގެ ތެރޭގައި ބާއްވާ ބައްދަލުވުންތަކުގައި މުވައްޒަފުން ބައިވެރިވާ އިރު، ފޯނު ބޭނުން ނުކުރެވޭ ގޮތަށް ހަދައިފިއެވެ.
ޕީޖީ ހުސައިން ޝަމީމް އޭނާގެ އަމިއްލަ ބްލޮގްގައި ވިދާޅުވެފައިވަނީ މަސައްކަތުގެ މާހައުލުގައި މޮބައިލް ފޯނާ ނުލައި އުޅެން ދަސްކުރުމުގެ ގޮތުން ރޯދަމަހު އެ އޮފީހުގެ ހުރިހާ މުވައްޒަފުން ވެސް ބައްދަލުވުންތަކަށް މޮބައިލް ފޯނު ވެއްދުން މަނާކޮށްފައިވާ ކަމަށެވެ.
އޭގެ ބޭނުމަކީ ބައްދަލުވުންތަކުގައި ދެއްކެވޭ ވާހަކަތަކާއި ކުރަންޖެހޭ މަސައްކަތްތަކަށް ސަމާލުކަން ހޯދުން ކަމަށް ޝަމީމް ވިދާޅުވިއެވެ. އެއީ އާންމުންނަށް ލަގްޒަރީ ފެންވަރުގެ ހިދުމަތެއް ދިނުމަށް މުހިންމު ކަމެއް ކަމަށް ވެސް ޝަމީމް ވިދާޅުވިއެވެ. އަދި އެކަން ކުރެވޭނީ، އެކުރާ ކަމަކަށް އާދަޔާ ހިލާފު ބޮޑު ފޯކަސްއެއް، ސަމާލުކަމެއް ދީގެން ކަަމަށްވެސް ވިދާޅުވިއެވެ.
"ސަމާލުކަން ދެވޭނީ، ފޯނުން ސަމާލުކަން އަތުލައިގަންނަންކުރާ މަސައްކަތަށް ހުރަސް އަޅައިގެންނެވެ. އެއްޗެއް ނޯޓުކުރާނަމަ، ނޯޓުކުރާ ފޮތް ހުންނާނެއެވެ. އިންޓަރނެޓުން ކަމެއް ކުރަންވެއްޖެނަމަ، ކޮމްޕިއުޓަރާއި ލެޕްޓޮޕް ހުންނާނެއެވެ. ފޯނެއް ކުރަންވެއްޖެނަމަ، ލޭންޑް ލައިން ހުންނާނެއެވެ،" ޝަމީމްގެ ބްލޮގްގައި ލިޔުއްވާފައިވެއެވެ.
ޝަމީމް ވިދާޅުވި ގޮތުގައި އެކަން ކާމިޔާބުވެއްޖެ ނަމަ ރޯދަމަސް ނޫން މަސް މަހު ވެސް އެގޮތަށް އަމަލު ކުރާނެ އެވެ. ރޯދަމަހު ފިރިހެން މުވައްޒަފުން އޮފީހަށް ހާޒިރުވާއިރު ޓައީ އަޅަން ނުޖެހޭ ގޮތަށް ހަމަޖައްސާފައިވާ ކަމަށް ޝަމީމް ވިދާޅުވިއެވެ.
މިދިޔަ ރޯދަމަހު ޕީޖީ އޮފީހުން ހަމަޖެއްސީ ހަފުތާއެއްގެ ހަތަރު ދުވަހު މަސައްކަތަށް ނުކުންނަ ގޮތަށެވެ. ނަމަވެސް އޭގެ ބަދަލުގައި މި ފަހަރު ނިންމީ ރޯދަމަހުގެ ފަހު 10 ގައި މުވައްޒަފުން ގޭގައި ތިބެގެން މަސައްކަތް ކުރުމަށެވެ.
