އަންނަ މަހު އޮންނަ ރައްޔިތުންގެ މަޖިލިހުގެ އިންތިހާބުގައި ވާދަކުރެއްވުމުގެ ފުރުސަތު ހޯދުމަށް މަޖިލިހުގެ ހިތަދޫ މެދު ދާއިރާގެ މެމްބަރު އަހުމަދު ރަޝީދު ހައި ކޯޓަށް ހުށަހަޅުއްވައިފިއެވެ.
އޭޕްރީލް 21 ވަނަ ދުވަހު އޮންނަ މަޖިލިސް އިންތިހާބުގައި ވާދަކުރެއްވުމަށް އެންމެ ފުރަތަމަ އަހުމަދު ރަޝީދު ނިންމެވިއެވެ.ޑިމޮކްރެޓިސްގެ ޕްރައިމަރީގައި ވާދަކުރުމަށް ހުޅުވާލި ފުރުސަތުގައި ހިތަދޫ މެދު ދާއިރާ އަށް ރަޝީދު ފިޔަވައި އިތުރު މީހަކު ކުރިމަތިލާފައި ނުވުމުން އެ ޕާޓީން އޭނާ އަށް ޓިކެޓު ދިނެވެ.
މަޖިލިސް އިންތިހާބުގައި ވާދަކުރެއްވުމަށް ރަޝީދު ފޯމް ވެސް ހުށަހެޅުއްވިއެވެ. އެކަމަކު ފަހުން ނަން އަނބުރާ ގެންދެވީ ރޯދަ މަސް ތެރެއަށް އިންތިހާބު ވަންނަ ކަމަށް ވިދާޅުވެއެވެ.
މަޖިލިސް އިންތިހާބު ރޯދަ މަހުގެ ފަހަށް ތާވަލު ކުރުމާ އެކު ރަޝީދު ވަނީ އޭނާގެ ފޯމް އަލުން ބަލައިގަތުމަށް އެދި އިލެކްޝަން ކޮމިޝަނަށް ހުށަހަޅުއްވައިފައެވެ. އިލެކްޝަންސް ކޮމިޝަނުން ނިންމީ ރަޝީދުގެ ކެންޑިޑެސީ ބަލައިނުގަތުމަށެވެ.
އެހެންވެ، އިލެކްޝަން ކޮމިޝަންގެ އެ ނިންމުމާ ދެކޮޅަށް އިންތިހާބީ ޝަކުވާއެއްގެ ގޮތުގައި އަހުމަދު ރަޝީދު ވަނީ މައްސަލަ ހައި ކޯޓަށް ހުށަހަޅުއްވައިފައެވެ. އެ މައްސަލަ ބަލައިގަތުމާ މެދު އަދި އެ ކޯޓުން ގޮތެއް ނުނިންމައެވެ.
ރައްޔިތުންގެ މަޖިލީހުގެ އިންތިހާބު ބާއްވަން ފުރަތަމަ ނިންމީ މިދިޔަ އާދިއްތަ ދުވަހުއެވެ. ނަމަވެސް، މަޖިލީހުން ވަނީ ރޯދަ މަސް ތެރޭގައި އިންތިހާބު ނުބޭއްވޭ ގޮތަށް އިންތިހާބުތަކާ ބެހޭ ގާނޫނަށް އިސްލާހު ގެނެސްފައެވެ. އަދި ރައީސް ޑރ. މުހައްމަދު މުއިއްޒު ވަނީ އެ އިސްލާހު ތަސްދީގު ކުރައްވައިފައެވެ. އެ އިސްލާހު ރައީސް ތަސްދީގު ކުރެއްވުމާ ގުޅިގެން އިންތިހާބު މިހާރު ބޭއްވުމަށް ހަމަޖެހިފައި ވަނީ އަންނަ މަހުގެ 21 ގައެވެ.
