މިއަދު ކިޔުންތެރިން ނަށް މި ގެނެސްދެނީ ވަރަށް ފަސޭހައިން ތައްޔާރު ކޮށްލެވިދާނެ ސޭންޑްވިޗްއެކެވެ. ތަފާތު ވައްތަރުގެ ސޭންޑްވިޝް އަކީ ދިވެހިންގެ ކެއުމުގެ ހާއްސަކޮން ހެދުނު ނާސްތާ އާއި ހަވީރު ސައިގައި ބޭނުން ކުރާ އެއްޗެކެވެ.

ތަފާތު ގޮތްގޮތަށް ސޭންޑްވިޗް ތައްޔާރު ކުރެއެވެ. މިއަދު މިގެނެސްދެނީ އޮމްލެޓް ސޭންޑްވިޗް ތައްޔާރު ކުރާނެ ގޮތެވެ. މީ ވަރަށް ފަސޭހައިން ކުޑަ ވަގުތު ކޮޅެއްގެ ތެރޭގައި ތައްޔާރު ކުރެވިދާނެ އެއްޗެކެވެ.

ބޭނުންވާނެ ތަކެތި:

• 6 ފޮތި ޕާން
• 1 ދަޅު ތެޔޮ މަސް
• 1 ގިތެޔޮމިރުސް (ކޮށާލާފައި)
• 1 ފިޔާ (ތުނިކޮން ކޮށާލައިފައި)
• 1 ޓޮމާޓޯ (ޗޮޕްކޮށް ކޮށާލައިފައި)
• 1/2 ޖޯޑު މަޔޮނައިސް
• 3 ފޮތި ޗީޒް
• 4 ބިސް
• ލޮނު އަދި އަސޭމިރުސް ކޮޅެއް
• ބަޓަރު

ތައްޔާރު ކުރާނެ ގޮތް:

އެންމެ ފުރަތަމަ ފިޔާ އަދި މިރުސް ކޮޅު ތައްޓަކަށް އަޅާލުމަށްފަހު ރަނގަޅަށް އަތުން މޮޑެލާށެވެ. އެއަށް ފަހު މަސްދަޅުގެ ތެޔޮކޮޅު ވަކިކޮށްލުމަށް ފަހު އެކޮށްލައި މޮޑެލާށެވެ. ދެން ޓޮމާޓޯ ކޮޅު އަދި މަޔޮނައިސް ކޮޅު އަޅައި ސަމްސަލަކުން އެއްކޮށްލުމަށް ފަހު އަސޭމިރުސް އަދި ލޮނު ހެޔޮވަރު ކޮށްލާށެވެ.

ޕާން ފޮތި ތަކުގެ ކާރި ކަފައިލުމަށްފަހު ތައްޔާރު ކުރި މަސްކޮޅު އަޅަައި ސޭންޑްވިޗް އެއް ތައްޔާރު ކުރާށެވެ. އަދި ޗީޒް ފޮއްޗެއް ލާށެވެ.  ދެފޮތިން ދެފޮތިން ސޭންޑްވިޗް ތައްޔާރު ކުރުމަށް ފަހު ތަވާ އެއް އުދުން މަށްޗަށް އުދާށެވެ. އަދި ބަޓަރު ކޮޅެއް އުނގުޅާލާށެވެ.

ބިސް ތައްޓަކަށް އަޅައި ލޮނާއި އަސޭމިރުސް ކޮޅެއް ލައި ރަނގަޅަށް ގަށައިލާށެވެ. ދެން ތައްޔާރު ކުރި ސޭންޑްވިޗް ބިސްގެ ތެރެއަށް ލުމަށްފަހު އުދި ތަވާއަށް ލާށެވެ. އެއްކޮޅު ފިހެވުމުން އަނެއްކައިވެސް ބަޓަރު ކޮޅެއް ހާކާލުމަށްފަހު އަނެއް ކޮޅު ވެސް ފިހެލާށެވެ. އޭރަށް ހުންނާނީ އޮމްލެޓް ސޭންޑްވިޗް ތައްޔާރު ވެފައިއެވެ.