ޔުރޯ ކޮލިފައިން ޕްލޭ އޯފްގައި ނޯވޭ ބަލިކޮށް ސާބިޔާއިން މުބާރާތަށް ކޮލިފައި ވުމުގެ އުންމީދު އާކޮއްފިއެވެ.
ނޯވޭގެ މައްޗަށް ސާބިޔާއިން ކުރި ހޯދީ މެޗުގެ ފުރިހަމަ ވަގުތު ހަމަވިއިރު 1-1 ލަނޑުން އެއްވަރުވުމުން، އިތުރުވަގުތުގައި ކުޅުނު 30 މިނިޓުގެ ތެރޭގައި ޖެހި ލަނޑުން ކުރިހޯދައިގެންނެވެ.
އޮސްލޯގައި ކުޅުނު މެޗުގައި ދެޓީމުން ލަނޑުޖަހާފަ ވަނީ މެޗުގެ ފަހު 10 މިނިޓުގައެވެ. މެޗު ނިމެން 8 މިނިޓަށް ވެފައިވަނިކޮށް އިޓަލީގެ ލާޒިޔޯއަށް ކުޅެމުން އަންނަ ސާޖް މިލިނޮވިޗް ސަވިޗް ލަނޑުޖަހާ ލީޑް ނަގާފަވަނިކޮށް ނޯވޭން ނަތީޖާ ހަމަހަމަކުރީ މެޗު ނިމެން ދެމިނެޓަށް ވެފައިވަނިކޮށް މެތިއަސް ނޫމާން ކާމިޔާބުކުރި ލަނޑުންނެވެ. މެޗުން ސާބިޔާ މޮޅުވި ލަނޑު ސަވިޗް ކާމިޔާބުކުރީ ކުޅުނު އިތުރުވަގުތުގެ 12 ވަނަ މިނިޓުގައެވެ.
މުބާރާތުގައި ޕްލޭ އޯފްގެ ފަހު މެޗުގައި ސާބިޔާ ނުކުންނާނީ އަންނަ މަހު ނޮދަން އަޔަލޭންޑާއި ދެކޮޅަށެވެ.
ރޭ ކުޅުނު އެހެން މެޗުތަކަށް ބަލާއިރު ޖޯޖިއާ ވަނީ ބެލަރޫސް ބަލިކޮށް ކޮލިފައިވުމާ ގާތަށް ޖަހިލާފައެވެ. މެސެޑޯނިޔާއިން ކޮސޯވޯ ބަލިކުރި އިރު، ބަލްގޭރިޔާ ބަލިކޮށް ހަންގޭރީ ވަނީ ކޮލިފައިވުމުގެ އުންމީދު އާކޮއްފައެވެ. އައިސްލޭންޑް ވަނީ ރޫމޭނިޔާ ބަލިކޮށް ޕްލޭއޯފް ފަހު މެޗުން ޖާގަހޯދާފައެވެ.
