17 މާރޗް 2024، މާލެ، ދިވެހިރާއްޖެއާއި އިންޑިޔާއާ ދެމެދު އެކުލަވާލާފައިވާ ހައިލެވެލް ކޯރ ގްރޫޕްގެ ތިންވަނަ ބައްދަލުވުން މިއަދު ބާއްވާފައިވާކަމަށް ފޮރިން މިނިސްޓްރީން ވިދާޅުވެއްޖެއެވެ.
މިއަދު ބޭއްވި އިންޑިއަ ރާއްޖެ ކޯ ގްރޫޕްގެ 3 ވަނަ ބައްދަލުވުމަށްފަހު ފޮރިން މިނިސްޓްރީން ނެރުނު ބަޔާނެއްގައި ވިދާޅުވީ ފޮރިން މިނިސްޓްރީގައި ބޭއްވި މި ބައްދަލުވުމުގައި ދެ ފަރާތުން ވެސް ރާއްޖޭގެ އޭވިއޭޝަން ޕްލެޓްފޯމްތަކުގައި އިންޑިއާގެ އަސްކަރީ ސިފައިންގެ ބަދަލުގައި އާންމުން ގެނައުމުގައި ހޯދާފައިވާ ކުރިއެރުންތައް ފާހަގަކުރައްވާފަި ވާކަމުގައެވެ.
އަދި މިހާތަނަށް އެއް ޕްލެޓްފޯމެއްގައި ތިބި އަސްކަރިއްޔާގެ ސިފައިންގެ ބަދަލުގައި އާންމުން ގެނެސްފައިވާއިރު، ބާކީ ތިބި ދެ ޕްލެޓްފޯމްގައި ތިބި ސިފައިންގެ ބަދަލުގައި 10 އޭޕްރީލް އަދި 10 މެއި 2024 ގައި ސިވިލިއަނުން އަންނާނެކަމަށްވެސް ބުނެފައިވެއެވެ.
މިއަދުގެ ބައްދަލުވުމުގައި ހައިލެވެލް ކޯރ ގްރޫޕުން ވަނީ ދެޤައުމުގެ ދެމެދުގައި އިޤްތިޞާދީ ގޮތުންނާއި ތަރައްޤީގެ ދާއިރާއިން ގުޅުން ބަދަހިކުރުމުގެ ގިނަ ދާއިރާތަކެއް ކަވަރުކޮށް، ދާދިފަހުން ނިމުނު ކެޕޭސިޓީ ބިލްޑިންގ ޕްރޮގްރާމްތައް ފާހަގަކުރައްވާފައި ކަމަށްވެސް ފޮރިން މިނިސްޓްރީގެ ބަޔާނުގައި ވިދާޅުވެފައި ވެއެވެ.
މީގެ އިތުރުން، ދެޤައުމުގެ ދެމެދުގައި ގުޅުން ބަދަހިކުރުމާ ބެހޭގޮތުން ދެގައުމުންވެސް މަޝްވަރާކޮށްފައިވާ ކަމަށާއި، ހައިލެވެލް ކޯރ ގްރޫޕްގެ ހަތަރުވަނަ ބައްދަލުވުން، ދެގައުމަށް އެއްބަސްވެވޭ ތާރީޚެއްގައި ނިއުދިއްލީގައި ބޭއްވުމަށް ހަމަޖެހިފައިވާކަމަށްވެސް ބަޔާނުގައި ވިދާޅުވެފައި ވެއެވެ.
