މި ސަރުކާރުގެ ވަޒީރުންނަށް ރުހުން ދިނުމުގައި އެމްޑީޕީގެ ބައެއް މެމްބަރުން ރިޝްވަތު ނަންގަވާފައިވާ ކަމަށާއި އެ މެމްބަރުންނާ ދެކޮޅަށް އެއްވެސް ފިޔަވަޅެއް ނޭޅުނު ކަމުގައި ރައްޔިތުންގެ މަޖިލިހުގެ ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ސަނީފް ބޮޑަށް ފާޑު ވިދާޅުވީ އެމްޑީޕީއަށާއި އެ ޕާޓީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދަށެވެ. ޝާހިދު މަސައްކަތް ކުރައްވަނީ އޭނާގެ އަބުރު ކަތިލަން ކަމަށް ދޭހަވާ ފަދަ މޭރުމަކުން ސަނީފް ވަނީ ވާހަކަ ދައްކަވައިފައެވެ.
އެންޓި-ޑިފެކްޝަން ބިލަށް ބަހުސް ކުރައްވަމުން އެންޓި-ޑިފެކްޝަން ބިލެއް އައުމުގެ ކުރިން ސިޔާސީ ޕާޓީތަކުގެ ގާނޫނު ހަރުދަނާ ކުރަން ޖެހޭ ކަމަށެވެ. އެ ގާނޫނު ހަރުދަނާ ނުކުރެވޭ ނަމަ، ޕާޓީތަކުގެ ވެރިންނަށް ހޮވޭ މީހުންނަކީ އެއްވެސް އިތުބާރެއް ނެތް، ރައްޔިތުންގެ ލޯތްބެއް އަދި ގާބިލްކަމެއް ނެތް ބަޔަކަށް ވެގެން ދާނެ ކަމަށް އޭނާ ވިދާޅުވި އެވެ.
އެމްޑީޕީގެ ރައީސް ކަމަށް ވެސް އެންމެ ފަހުން ހޮވުނީ އެއްވެސް މީހަކު ކުރިމަތިނުލާތީ ހޮވުނު ރައީސެއް ކަމަށާއި މިފަދަ ކަންކަން ތަކުރާރު ވާނަމަ ޕާޓީތަކުގެ ސައްހަކަން ގެއްލިގެން ދާނެ ކަމަށް ސަނީފް ވިދާޅުވި އެވެ.
"އެންމެ ފަހުން އާ ސަރުކާރު އައިސްގެން ވަޒީރުންނަށް ރުހުން ދިން ވޯޓުގައި އެމްޑީޕީ މެމްބަރުން ރިޝްވަތު ނަގައިގެން ރުހުން ދިން އިރު، އަދި އެ ވޯޓަށް ފިލިއިރުގައި މިއާ ބެހޭ ގޮތުން އެއްވެސް ވާހަކައެއް ދެއްކި އެއްވެސް ލީޑަރެއް އެމްޑީޕީގައި ނެތް ކަން އަޅުގަނޑު ފާހަގަ ކުރަން. މިއާ އެއްކޮށް ޕާޓީ ވިއްސި ވިހާލިވެ ޕާޓީ ދެކަފި ވެގެން ދިޔައިރުގައި އަޅުގަނޑުމެން ތްރީލައިން ވިޕް ނޫން ވިޕަށް ވޯޓު ނުދިނީމާ އަޅުގަނޑުމެންގެ ވާހަކަ ދެއްކީމާ މިއީ ލަދުވެތި ކަމެއް،" ވަޒީރުންނަށް ރުހުން ދިނުމަށް ނެގި ވޯޓުތަކުގައި ބައިވެރިވެވަޑައިގެންނެވި އެއް މެމްބަރު ކަމުގައިވާ ސަނީފް ވިދާޅުވި އެވެ.
ސަނީފް ވިދާޅުވީ، 18 ވަނަ މަޖިލީހުން ހެދި އެންޓި-ޑިފެކްޝަން ގާނޫނު އެމްޑީޕީން ވެރިކަމަށް އައުމަށް ފަހު އުވާލީ އަމިއްލަ މަންފާ އަށް ކަމަށާއި އެ ގާނޫނު އުވާލައިގެން ނުވާނެ ކަމަށެވެ. އޭގެ ބަދަލުގައި އެ ގާނޫނަކީ ހަރުދަނާ ކުރަން ޖެހޭ ގާނޫނެއް ކަމަށް އޭނާ ވިދާޅުވިއެވެ.
ސަނީފް ވިދާޅުވީ ވަޒީރުންނަށް ރުހުން ދިން ދުވަހު ރިޝްވަތު ނެގި މީހުންގެ ވާހަކަ ނުދައްކާ، ޕާޓީގެ ލީޑާޝިޕުން އަޑީގައި އޮވެ އޭނާ ބަދުނާމު ކުރަނީ ޝާހިދު ހިންގަވާ ނޫހަކުން ކަމަށެވެ. އަދި އެ ނޫހަށް ލިޔުއްވަނީ ވެސް ރައީސް އޮފީހުގެ ކުރީގެ ތަރުޖަމާނު މިއުވާން މުހައްމަދު ކަމަށް ސަނީފް ތުހުމަތު ކުރެއްވިއެވެ. އަދި އޭނާ ބަދުނާމް ކުރި ކުރުން ކުށްވެރި ކުރައްވާ ކަމަށް ވެސް ސަނީފް ވިދާޅުވިއެވެ.
