މަޖިލިހުގެ ވޯޓު ހަމަކުރުމަށް މެމްބަރުންގެ އަދަދު ގުނާއިރު، ހުސް ގޮނޑިތައްވެސް ހިމަނަންޖެހޭނެކަމަށް ސުޕްރިމް ކޯޓުން ނިންމިއިރު، މަޖިލިހުގެ ގަވާއިދުގައި އެކަމާއި ގުޅޭގޮތުން އޮތް މާއްދާ ބާތިލް ކޮށްފައި ނުވާތީ، ސަރުކާރުގެ މަގާމުތަކަށް ދާން މެމްބަރުކަމުން އިސްތިއުފާ ދިން މެމްބަރުންގެ ގޮނޑިތައް ނުހިމަނައި ޖުމްލަ އަޣުލަބިއްތަތު ގުނާ މައްސަލައިގައި މަޖިލިހުން ގޮތެއް ނިންމައި ދިނުމަށް މަޖިލިސް ރައީސް އަސްލަމް ހުށަހަޅުއްވައިފިއެވެ.
މިކަން ހުށަހެޅުއްވީ، މަޖިލީހުގެ މިއަދުގެ ޖަލްސާ ފެށުމުން ރިޔާސަތުގެ ހުށަހެޅުމެއްގެ ގޮތުގައި މަޖިލިސް ރައީސް އަސްލަމްއެވެ.
އޭނާ ހުށަހެޅުއްވީ މަޖިލިސްގެ ގަވައިދުގެ 242 ގެ 1 ވަނަ މާއްދާގެ ގޮތުގައި އިތުރުކޮށްފައިވާ މާއްދާއާއި މެދު ގޮތެއް ނިންމައި އުވާލަދިނުމުގެ މައްސަލަ އެވެ.
އަދި މިމައްސަލާގައި ގޮތެއް ނިންމުމަށް ބަހުސަށް ހުޅުވާލަމުން ބައެއް މެމްބަރުން މިމައްސަލާގައި ވިދާޅުވީ ސުޕްރީމް ކޯޓުން މިހާރު ހުކުމެއް ނެރެފައިވާކަމަށާއި އެއީ ރައްޔިތުންގެ މަޖިލީހުން މެމްބަރެއްގެ ގޮނޑިއެއް ގުނާނީ ހަމައެކަނި މެމްބަރަށް ނޫންކަމަށާއި އެއީ ދާއިރާގެ އެތައް ރައްޔިތުންނެއްގެ މައްޗަށް ނިސްބަތްވާކަމަށް ވާތީ ގޮނޑިތައް ގުނަން ޖެހޭނީ ދާއިރާތަކުގެ ގޮނޑިއާއި އެކު ކަމަށެވެ.
އެގޮތަށް ފުނަދޫ ދާއިރާގެ މެމްބަރު ސިރާޖު ވިދާޅުވުމުން އަސްލަމް ވިދާޅުވީ މިމައްސަލަ ހުޅުވާލެއްވީ ބަހުސަށް ނޫންކަމަށާއި، ހުށަހެޅުއްވީ މައްސަލައާއި ގުޅޭގޮތުން މަޖިލިސް ތަޅުމުން ގޮތެއް ނިންމަވާ ދެއްވުމަށް ކަމުގައެވެ.
އަސްލަމް ވިދާޅުވީ މަޖިލީހުގެ ޖަލްސާތައް ފެށޭނީ، ކޯރަމްއަކަށް ބެލުމަށްފަހުކަމަށާއި އަހަން ޖެހޭ މުހިންމު ވޯޓުތަކަށް ދެވެން އޮތީ ވެސް އެއަށް ފަހު ކަމަށެވެ. އެހެންކަމުން ދެން ގަވައިދާ މެދު ގޮތެއް ނިންނަން ކޮމިޓީއަކަށް ފޮނުވާނީ ތޯ ނިންމައިދޭން އަސްލަމް ތަކުރާރުކޮށް ވިދާޅުވި އެވެ.
އެއީ ސުޕްރީމް ކޯޓުން މަޖިލީހުގެ އެ މާއްދާ އުނިކޮށްފައެއް ނުވޭ.. އެހެންވީމަ ދެން، މަޖިލުހުންނޭ ދެން ގޮތެއް ނިންމާނީ..
މީގެ ކުރިން ބާއްވަން މަސައްކަތް ކުރި ދެ ހަފްތާގެ ޖަލްސާ ވެސް ކުރިޔަށް ނުގެންދެވުނީ، ކޯރަމް ހަމަނުވުމުގެ ސަބަބުންނެވެ. އަސްލަމް ވިދާޅުވީ މިއަދުގެ ޖަލްސާ ފަށަން ކޯރަމްއަށް ބެލީ 22 މެމްބަރުންކަމަށެވެ. އަދި މަޖިލީހުގެ އެއްވެސް މަސައްކެތެއް ކުރިޔަށް ގެންދެވޭނީ، ގޮތެއް ނިންމައިގެންކަމަށްވާއިރު ގަވައިދެއް އެއީ ބާތިލު ގަވައިދެއް ނަމަ އެ އެގޮތުގައި ނުބޭއްވޭނެކަމަށް އަސްލަމް ވިދާޅުވި އެވެ.
ރައީސް އަޒުލްކުރުމަށް މެމްބަރުން އަދަދު ގުންނަޖެހޭނީ ހުސްގޮނޑި ހިމަނައިގެން ކަމުގައި ސުޕްރިމް ކޯޓުން ހުކުމް ކޮށްފައިވަނީ ފާއިތުވި ފެބްރުއަރީމަހުގެ 29 ވަނަ ދުވަހުއެވެ.
ރައީސްއާއި ނާއިބު ރައީސް އަޒުލްކުރެވޭގޮތަށް ލުއިކަން ގެނެސް، މަޖިލިހުގެ ގަވާއިދަށް ގެނެސްފައިވާ އިސްލާހުގެ މައްސަލަ ބަންޑާރަނައިބުގެ އޮފީހުން ސުޕްރިމް ކޯޓަށް ހުށަހެޅި މައްސަލާގައި ކުރި ހުކުމްގައި ސުޕްރިމް ކޯޓުން ވިދާޅުވީ ރައްޔިތުންގެ މަޖިލީހުގެ ޖުމުލަ މެންބަރުންގެ އަދަދު 80 އަށް ހަދަން މަޖިލީހުގެ ގަވާއިދުގެ 49 ވަނަ މާއްދާއަށް ގެނައި ބަދަލު ގާނޫނުއަސާސީއާ ހިލާފު ކަމަށާއި އެހެންނަމަވެސް އެ މާއްދާ މިހާރު ބާތިލުކޮށްފައިވާތީ ކުރެވޭނެ ކަމެއް ނެތް ކަމަށެވެ.
