މިއަދި މި ގެނެސްދެނީ ވަރަށް ތަފާތު ވައްތަރެއްގެ ޑޯނަޓްއެކެވެ. އާންމުކޮން ފޮނި އެއްޗަކަށް ބޭނުން ކުރާ ޑޯނަޓް، މިފަހަރު ކުޅިކޮން ތައްޔާރު ކޮށްލާނެ ގޮތެވެ. މީ ވަރަށް ތަފާތު އެއްޗަކަށް ވެގެން ދާނެއެވެ.

މިއީ ވަރަށް ފަސޭހައި އަދި ހަމަ އެއާއި އެކީގައި ވަރަށް ހަރަދު ކުޑަކޮށް ތައްޔާރު ކޮށްލެވިދާނެ އެއްޗެކެވެ. އާންމުކޮން ބަދިގެއިން ލިބެން ހުންނަ ބާވަތްތަށް ބޭނުން ކޮށްގެން ސުފުރާ ފަޅުފިލުވައިލެވި ދާނެ އެއްޗެކެވެ.

ބޭނުންވާނެ ތަކެތި:

• 1/2 ކިލޯ އަލުވި ( ފެނު ކެއްކުމަށްފަހު މޭޝް ކޯށްފައި)
• 1 ދަޅު ގިތެޔޮ މިރުސް މަސްދަޅު
• 1 ފިޔާ ކުޑަ (ޗޮޕް ކޮށްލައިފައި)
• 1 މޭޒުމަތި ސަމުސާ ޗިލީ ފްލޭކްސް
• 1/2 ސައި ސަމުސާ އަސޭމިރުސް
• 1/2 ސައި ސަމުސާ އޮރިގާނޯ
• 1 މޭޒުމަތީ ސަމުސާ ކޮރިއެންޑާ
• 1 ލުނބޯ ކުޑަ
• ލޮނު ކޮޅެއް

ކޯޓް އަށް ތައްޔާރު ކުރުމަށް ބޭނުންވާނީ

• 2 ބިސް
• 1 ޖޯޑު ފާރޮށި ކުނޑި

ތައްޔާރު ކުރާނެ ގޮތް:

އެންމެ ފުރަތަމަ ފިޔާ ކޮޅަށް ލުބޯގެ ހުތް ފެލައިގެން ރަނގަޅަށް މޮޑެލާށެވެ. އެއަށް ފަހު މަސްދަޅު އަޅައި ރަނގަޅަށް މޮޑެލާށެވެ. ދެން އަލުވި ކޮޅު އަޅައި އެއްކޮށްލުމަށްފަހު ހުރިހާ އެއްޗެއް އަޅައި ރަނގަޅަށް މޮޑެލާށެވެ. ދެން ލޮނު ހެޔޮވަރު ކޮށްލާށެވެ.

އަތުގައި ކުކިންގ އޮއިލް ކޯޅެއް ލުމަށްފަހު ފަތާ ޝޭޕްއަށް ގުޅަގުޅަ ޖަހައިލާށެވެ. ދެން ނޮޒުލް އެއް ބޭނުން ކޮށްގެން މެދުން ކަނޑައިލާށެވެ. މިހާރު ހުންނާނީ ޑޯނަޓްގެ ޝޭޕް ގައިއެވެ.

ކޯޓް ލުމަށް ބިސް ތައްޓަކަށް އެޅުމަށްފަހު ރަނގަޅަށް ގަށައިލާށެވެ. އަދި ފާރޮށި ކުނޑި ކޮޅު ފަތާ  ތައްޓަކަށް އަޅައިލާށެވެ. ފުރަތަމަ ބިހުގެ ކޯޓެއް ލުމަށްފަހު ފާރޮށި ކުންޑީގެ ކޯޓެއް ލާށެވެ. ދެން ގޯލްޑެން ބްރައުން ކުލަ އަރަންދެން ތެލުލާށެވެ. މިހާރު ހުންނާނީ ޕޮޓޭޓޯ ޑޯނަޓް ތައްޔާރުވެފައިއެވެ.