އަންނަ މަހުގެ 21 ވަނަ ދުވަހު ރައްޔިތުންގެ މަޖިލީހުގެ އިންތިހާބު ބާއްވަން ނިންމީ، އެއަށް ވުރެން ލަސްކޮށްފި ނަމަ މިހާރުގެ މަޖިލިސް އުވުމުގެ އެއް މަސް ކުރިން އިންތިހާބު ނުބޭއްވި ގާނޫނާ ހިލާފުވެދާނެ ކަމަށް ފެންނާތީ ކަމަށް އިލެކްޝަންސް ކޮމިޝަނުގެ ރައީސް ފުއާދު ތައުފީގް މިއަދު ވިދާޅުވެއްޖެއެވެ.
ރައްޔިތުންގެ މަޖިލިހުގެ އިންތިހާބު ބޭއްވުމަށް އިލެކްޝަންސް ކޮމިޝަން (އީސީ) އިން އެންމެ ފުރަތަމަ ނިންމީ މި މަހުގެ 17 ގައެވެ. އެއީ މި އަހަރުގެ ރޯދަ މަހުގެ ފުރަތަމަ ހަފްތާއެވެ. އިލެކްޝަންސް ކޮމިޝަނުން އިންތިހާބުގެ ތާރީހު ކަނޑައަޅާފައި ވަނިކޮށް އިންތިހާބުތައް ރޯދަ މަހާ ދިމާވާ ނަމަ، ރޯދަ މަސް ނިމޭތާ 10 ދުވަސް ފަހުން ބޭއްވުމަށް އިންތިހާބުތަކާ ބެހޭ ގާނޫނަށް އިސްލާހު ގެނައުމުގެ ބިލް މަޖިލިހުން ވަނީ ފާސްކޮށްފައެވެ.
އެ ބިލް މަޖިލިހުން ފާސް ކުރުމާ ގުޅިގެން ރައީސް ޑރ. މުހައްމަދު މުއިއްޒު ވަނީ ބިލް ތަސްދީ ކުރައްވައިފައެވެ.
އެއާ އެކީގައި އީސީން ވަނީ މަޖިލިސް އިންތިހާބު ބާއްވާ ތާރީހު އަލުން ކަނޑައަޅައިފައެވެ. އެއީ އަންނަ މަހުގެ 21 ވާ އާދިއްތަ ދުވަހެވެ. އާދިއްތަ ދުވަހަކީ ރަސްމީ ދުވަހަކަށް ވެފައި، އިލެކްޝަންސް ކޮމިޝަނުން އިންތިހާބުތައް ބާއްވަނީ އާންމުކޮށް ހޮނިހިރު ދުވަހު ކަމަށްވާތީ ބައެއް މީހުން ވަނީ އެކަމަށް ފާޑު ކިޔައިފައެވެ. އޭގެ ތެރޭގައި އިދިކޮޅު އެންމެ ބޮޑު ޕާޓީ، އެމްޑީޕީ ހިމެނެއެވެ.
ފުއާދު ވިދާޅުވި ގޮތުގައި އޭޕްރީލް 21 ގައި މަޖިލިސް އިންތިހާބު ބާއްވަން ނިންމީ، އެއީ ރޯދަ މަސް ނިމި، ފަހު 10 ދުވަސް ދޫކޮށް އަންނަ ފުރަތަމަ ދުވަސް ކަމަށްވާތީއެވެ.
އިންތިހާބުތަކާ ބެހޭ ގާނޫނަށް ފަހުން ގެނައި އިސްލާހުގައި ބުނަނީ، އެ ގާނޫނުގައި ނުވަތަ އެހެން ގާނޫނެއްގައި އެހެން ގޮތަކަށް ބަޔާންކޮށްފައި ވީ ނަމަވެސް ރަމަޟާން މަހުގެ ދުވަހެއްގައި އިންތިހާބު ބާއްވައިގެން ނުވާނެ ކަމަށެވެ. އަދި އިންތިހާބު ބާއްވަން ޖެހޭ ތާރީހް ރޯދަ މަހުގެ ދުވަހަކާ ދިމާވާ ނަމަ އެ އިންތިހާބެއް ބާއްވަން ވާނީ ރޯދަ މަސް ނިމި 10 ދުވަސް ފަހުން ކަމަށް ބުނެފައިވެއެވެ.
ފުއާދު ވިދާޅުވީ މިހާރު ކަނޑައަޅާފައި އޮތް ތާރީހަށް ވުރެން މަޖިލިސް އިންތިހާބު ލަސްކޮށްފި ނަމަ، މިހާރު އޮތް މަޖިލިސް އުވުމުގެ އެއް މަސް ދުވަސް ކުރިން އާ މަޖިލިސް ނުހޮވިދާނެ ކަމަށެވެ.
ވޯޓުލާ ތާރީހަށް ގެނައި ބަދަލާއެކު މަޖިލިސް އިންތިހާބުގައި 560 މީހުންނަށް އަލަށް ވޯޓުލުމުގެ ހައްގު ލިބޭނެ ކަމަށް އެ ކޮމިޝަނުންވަނީ ބުނެފައެވެ. މިއާއެކު އިންތިޚާބުގައި ވޯޓުލެވޭ މީހުންގެ އަދަދު 284،887 އަށް ވަނީ އަރައިފައެވެ.
