ގއ.މާމެންދޫ ކައުންސިލް ހުއްޓުމަކަށް އައިސް، ރަސްމީ ބައްދަލުވުން ނުބާއްތާ 4 ހަފްތާވެއްޖެކަމަށް "ޚަބަރު އޮންލައިން" އަށް މައުލޫމާތު ލިބިއްޖެއެވެ.
ކައުންސިލް ހުއްޓުމަކަށްއައީ އާންމު ރައްޔިތަކު އަމިއްލަ ހަރަދުގައި އެރަށު މިސްކިތެއްގައި އޭސީ ހަރުކުރުމަށް ފޮނުވި ސިޓީއަކާއި ގުޅިގެންނެވެ. މެމްބަރަކު އެސިޓީ އެޖެންޑާކުރަން ފޮނުވުމުން، އެކަން ކުރުމަށް ކައުންސިލްގެ ރައީސްބޭނުން ނުވާތީ ކައުންސިލް ވަނީ ހުއްޓިފައެވެ. މިކަމާއި ގުޅިގެން ޖަލްސާތައް ނުބާއްވާތާ މަހެއްވެއްޖެއެވެ. އެހެންނަމަވެސް ކައުންސިލް މެމްބަރުންގެ ރޫހަކީ މިރޯދަޔަށް މިސިކިތް އޭސީކުރުމަށް އެފަރާތައް އެއްބާރުލުންދިނުންކަމަށް "ޚަބަރު އޮންލައިން" އާއި މައުލޫމާތު ހިއްސާކުރި ފަރާތުން ވިދާޅުވެފައިވެއެވެ.
"ޚަބަރު އޮންލައިން" އާއި މައުލޫމާތު ހިއްސާކުރި ފަރާތުން ވިދާޅުވި ގޮތުގައި، ގއ.މާމެންދޫ ފެލިވަރު ގޭ އާދަންތަކުރުފާނު އޭނާގެ އަމިއްލަ ހަރަދުގައި އެރަށުގެ މިސްކިތެއް އޭސީކުރުމަށް، އޭސީގަނެފައިވާތާ އަހަރެއްވެއްޖެއެވެ. އެހެންނަމަވެސް ކައުންސިލްގައި އެދި އެދި އެކަން ކުރިޔަށް ދާގޮތެއްްވަނީ ނުވެފައެވެ.
އަދި އެއީ ކައުންސިލްގެ ރައީސް އެކަމާއި ދެކޮޅުހަދަމުންދަތީކަމަށްވެސް ވިދާޅުވެފައިވެއެވެ.
"ޚަބަރު އޮންލައިން" އާއި މައުލޫމާތު ހިއްސާކުރި ފަރާތުން ވިދާޅުވި ގޮތުގައި، ކައުންސިލްގެ ރައީސް ފުރަތަމަ ބުނެފައިވަނީ އޭސީ ހަރުކުރެވޭނީ މިސްކިތުގައި މިހާރު ހުރި ކަރަންޓް ތިރީ ފޭސްއަށް ބަދަލުކޮށްގެން ކަމުގައެވެ. ނަމަވެސް ކައުންސިލުން އެކަންކުރަން ބޭނުންނެވެއެވެ. މިހެންވުމުން އާދަންތަކުރުފާނު ވަނީ އޭނާގެ އަމިއްލަ ހަރަދުގައި މިސްކިތުގެ ކަރަންޓް ތިރީފޭސްއަށް ބަދަލުކުރަން ހުރިހާ ސާމާނެއް ގަނެފައެވެ.
ތިރީފޭސް ކަރަންޓް ލުމަށް ސާމާން ގަތުމުން، ކައުންސިލްގެ ރައީސް ވިދާޅުވަނީ މިސްކިތުގައި ސޯލާހަރުކޮށްގެން ނޫނީ އޭސީ ހަރުނުވާނެ ކަމަށްވެސް މައުލޫމާތުދިން ފަރާތުން ވިދާޅުވެފައި ވެއެވެ.
މިމައްސަލައާއި ގުޅިގެން، ކައުންސިލްގެ ރައީސް ސޮއިކޮށް އާދަންތަކުރުފާނަށް ފޮނުވާފައިވާ ސިޓީގައި ބުނާގޮތުން، ތިރީފޭސް ކަރަންޓް ލާންޖެހެނީ އާދަންތަކުރުފާނު ކަމަށާއި، މިސްކިތް ސޯލާކުރަންޖެހެނީވެސް އަދާންތަކުރުފާނެވެ. އަދި ކަރަންޓް ބިލު ދައްލަންޖެހެނީ އާދަންތަކުރުފާނެވެ. މިކަމުގައި އާދަންތަކުރުފާނުވަނީ ވަރަށްބޮޑަށް މާޔޫސްވެފައި ކަމަށްވެސް މައުލޫމާތުދިން ފަރާތުން ވިދާޅުވެފައި ވެއެވެ.
ދާދިފަހުން މާމެންދޫ ކައުންސިލް މެމްބަރުން އެރަށުގެ މަގުތަކަށް ފަސްއަޅަން ނިންމުން ރައީސް އެކަން ތަންފީޒްނުކުރުމުން، ރައްޔިތުން ނުކުމެވަނީ މަގުތަކަށް ފަސްއަޅާފައެވެ.
