ރާއްޖޭގެ ހާއްސަ އިގްތިސާދީ ސަރަހައްދުގެ ތެރޭގައި މަސްވެރިކަން ކުރަމުންދިޔަ ތިން މަސްދޯންޏަކަށް ބޭރު ސިފައިން އެރި ސަބަބު އޮޅުން ފިލާފައި ނުވާކަމަށް ފިޝަރީޒް މިނިސްޓަރު އަޙްމަދު ޝިޔާމް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، މިއަދު ރައްޔިތުންގެ މަޖިލިހުގައި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ކުރެއްވި ސުވާލަށް ޖަވާބުދެއްވަމުންނެވެ.
އިމްތިޔާޒް ސުވާލު ކުރެއްވީ މަސްދޯނިތަަކަށް ބޭރުގެ ސިފައިން އެރީ ކީއްވެކަން ސަރުކާރަށް ސާފުވެއްޖެތޯ އަދި މަސްވެރިންނަށް އެކަން ސާފުކޮށްދެއްވައިފިތޯ އެވެ.
އިމްތިޔާޒު ސުވާލުގެ ޖަވާބުގައި ޝިޔާމް ވިދާޅުވީ، އިންޑިއާ ސިފައިން އެރި ސަބަބު ސާފުވެފައި ނުވާކަމުގައެވެ.
ދިވެހިރާއްޖޭގެ ޚާއްސަ އިގްތިސާދީ ސަރަހައްދުގައި މަސްވެރިކަން ކުރަމުންދިޔަ ދިވެހި މަސްދޯނިތަކަށް ދިވެހިރާއްޖޭގެ ކަމާގުޅޭ އެއްވެސް އިދާރާއަކާ ކޯޑިނޭޓް ކުރުމެއްނެތި ބައިނަލްއަގުވާމީ ކަނޑުގެ ގާނޫނުތަކާއި އުސޫލުތަކާއި ޚިލާފަށް އިންޑިއާގެ އަސްކަރިއްޔާއިން ބޯޑުކޮށް ހިންގި އޮޕަރޭޝަންގެ ތަފްސީލު ދެއްވުމަށް ދިވެހިރާއްޖޭގެ ޚާރިޖީ ވުޒާރާ މެދުވެރިކޮށް އިންޑިއާ ސަރުކާރުގައި 01 ފެބްރުއަރީ 2024 ގައި ރަސްމީކޮށް ދަންނަވާ ކަމަށް ދިފާއީ ވުޒާރާއިން ވިދާޅުވެފައި ވެއެވެ.
އެހެންނަމަވެސް އިންޑިއާއި މިއަދާއިހަމައަށްވެސް މިކަން ސާފުކޮށްދީފައެއް ނުވެއެވެ.
