އައްޑޫ ބުރިޖްގެ ސާވޭގެ މަސައްކަތް 3 މަސްތެރޭ ނިންމާ، މިއަހަރު ބްރިޖުގެ މަސައްކަތް ފަށާނެކަމަށް އިމާރާތް ކުރުމާއި ބިނާރާ ބެހޭ ވަޒީރު ޑރ. މުއްޠަލިބު ވިދާޅުވެއްޖެއެވެ.
މިނިސްޓަރ މުއްތަލިބު މިހެން ވިދާޅުވީ އައްޑޫ ސިޓީގެ ހުޅުމީދޫ އާއި ހިތަދޫ ގުޅުވައިދޭ ބްރިޖްގެ ޕރިމިލިނަރީ މަަސައްކަތްތައް ކުރުމަށް ދަ އަރަބް ކޮންޓްރެކްޓަރސްއާއި ހަވާލުކޮށް އެއްބަސްވުމުގައި މިއަދު ސޮއިކުރެއްވުމަށްފަހު ވާހަކަ ދައްކަވަމުންނެވެ.
މި އެއްވަސްވުމުގައި ސޮއި ކޮށްފައިވަނީ، އައްޑޫ އަތޮޅު މަދަރުސާގައި, އެރަށުގެ ރައްޔިތުންނާއި ރައީސުލްޖުމްހޫރިއްޔާ ބައްދަލުކުރެއްވުމަށް ބޭއްވުނު ރަސްމިއްޔާތެއްގައެވެ. މި އެއްބަސްވުމުގެ ދަށުން، ބްރިޖްގެ ޕްރިލިމިނަރީ ޑިޒައިން ތައްޔާރުކޮށް, ފީސިބިލިޓީ ސާވޭއާއި އެހެނިހެން ގުޅުންހުރި މަސައްކަތްތައް ކުރުމަށް ވަނީ ހަމަޖެހިފައެވެ.
މި ރަސްމިއްޔާތުގައި ވާހަކަދައްކަވަމުން މުއްޠަލިބު ވިދާޅުވީ އައްޑޫ ސިޓީގައި އަޅާ ބްރިޖަކީ އެންމެ މަދުވެގެން 14 ކިލޯމީޓަރުގެ ބްރިޖަކަށް ވާނެ ކަމަށެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސަރުކާރާ ހަވާލުވެވަޑައިގެން، އެ ބްރިޖުގެ މަޝްރޫއު އިއުލާން ކުރެއްވުމާއެކު ގިނަ ބަޔަކު ޝައުގުވެރިކަން ފާޅު ކުރި ކަމަށާއި އޭގެ ތެރޭގައި ޗައިނާގެ ބޮޑެތި ކުންފުނިތައް ހިމެނޭކަމަށްވެސް އޭނާ ވިދާޅުވިއެވެ.
މުއްތަލިބި ވިދާޅުވީ ގިނަ ކުންފުނިތަކަކުން ޝައުގުވެރިކަން ފާޅު ކުރި ނަމަވެސް އަރަބް ކޮންޓްރެކްޓާސްއާ މަޝްރޫއު ހަވާލު ކުރެއްވުމަށް ނިންމެވީ އެ ކުންފުނިން މުޅި މަޝްރޫއު އެއްކޮށް ނިންމަން ޝައުގުވެރިކަން ފާޅުކޮށްފައިވާތީ ކަމަށެވެ. އަދި އެކުންފުނިން ބުރިޖުގެ ސާވޭގެ މަސައްކަތްވެސް ހިލޭ ކޮށްދިނުމަށް ނިންމާފައިވާކަން އޭނާ ފާހަގަ ކުރެއްވިއެވެ.
މި ސޮއިކުރި އެއްބަސްވުމާއެކު ބޭނުންވާ ދިރާސާތައް ހެދި، ޑިޒައިންތައް ހެދި، މި ޕްރޮޖެކްޓަށް ދާނެ ޚަރަދުތައް އެނގި، ކަށަވަރުވުމާއެއްކޮށް ދެން އެއަށް ބޭނުންވާ ފައިސާ ހަމަޖެހިގެން އަޅުގަނޑުމެންނަށް އީޕީސީ ކޮންޓްރެކްޓެއްގެ ތެރެއަށް ދެވޭނީ. އީޕީސީ ކޮންޓްރެކްޓާ ހަމައަށް ދިއުމަށްޓަކައި ބޭނުންވާ ހުރިހާ މައުލޫމާތެއް ހޯދުމަށްޓަކައި ކުރަން ޖެހޭ ދިރާސާތަކާއި ކުރަން ޖެހޭ އިންޖިނިއަރިން މަސައްކަތްތައް ކުރުމަށް މިއަދު އެއްބަސްވެގެން މިދިޔައީ. އިރާދަ ކުރެއްވިއްޔާ ކުރިއަށް އޮތް ތިން މަސް ދުވަސް ތެރޭގައި މި މަސައްކަތް ނިމި ފައިނޭންސް ހޯދުމުގެ މަސައްކަތް ސަބްކޮންޓްރެކްޓަރސް އިންކޮށް، އަޅުގަނޑުމެންނަށް މިއަހަރު ތެރޭގައި އަމަލީ މަސައްކަތް ފެށިގެންދާނެ ކަމީ އަޅުގަނޑުމެން ވަރަށް ބޮޑަށް ޔަގީން ކުރާ ކަމެއް.
މުއްޠަލިބު ވިދާޅުވިއެވެ.
މި މަސައްކަތް ކޮށްދޭ ދަ އަރަބް ކޮންޓްރެކްޓަރސްއިން އެކުންފުނީގެ ޚަރަދުގައި ސާވޭގެ މަސައްކަތް ކޮށްދެއްވާތީ ރައީސް މުއިއްޒު ވަނީ އެކުންފުންޏަށް ޝުކުރު އަދާކޮށްފައެވެ. އަދި ރައީސް ވިދާޅުވީ މިއަހަރު ބުރިޖްގެ މަސައްކަތް ފެށި، އެމަނިކުފާނުގެ ވެރިކަމުގެ ދައުރުގައި ބުރިޖްގެ މަސައްކަތް ނިންމާލެވޭނެކަމުގައެވެ.
ފާއިތުވި ރިޔާސީ އިންތިޚާބުގައި ރައީސް މުއިއްޒު ވަނީ މި ފަސްއަހަރުގެ ތެރޭގައި އައްޑޫ ހިތަދޫއިން ހުޅުމީދޫއަށް އަދި ތިނަދޫއިން ކާޑެއްދޫއަށް ބުރިޖަކުން ގުޅުވާލާނެ ކަމަށް ވައުދުވެފައެވެ.
އެގޮތުން ހިތަދޫ އާއި ހުޅުމީދޫ ގުޅުވާލާ ބުރިޖުގައި 23 ކިލޯމީޓަރު ހުރެއެވެ. އަދި ތިނަދޫ އާއި ކާޑެއްދުއާ ދެމެދު 4.4 ކިލޯމީޓަރު ހުރެއެވެ.
ހިތަދޫ އާއި ހުޅުމީދޫ ގުޅުވާލާ ބުރިޖުގެ ޕްލޭނިން މަސައްކަތް ހަފްތާ 14ގައި ވަނީ ހިމަނާފައެވެ. އަދި އެމަސައްކަތަށް ބަޖެޓުގައި 30 މިލިއަން ހިމަނާފައި ވެއެވެ.
އައްޑޫ ސިޓީއަށް ރައީސް ކުރައްވަމުން ގެންދަވާ ދަތުރުފުޅުގައި ހުޅުމީދޫއަކީ އެންމެ ފަހު މަންޒިލެވެ. ރައީސް ހުޅުމީދޫއަށްފަހު ދެން ވަޑައިގަންނަވާނީ ފުވައްމުލައް ސިޓީއަށެވެ. އަދި އޭގެ ފަހުގައި ހުވަދު އަތޮޅު އުތުރުބުރިއާއި ދެކުނުބުރީގެ ރަށްތަކަށް ރައީސް ވަޑައިގަންނަވާނެއެވެ.
