19 އަހަރުގެ ޖަލު ހުކުމެއް ތަންފީޒު ކުރަމުން ދަނިކޮށް، ރަޝިއާގެ ރައީސް ލާޑިމިރު ޕުޓިންހލހެ ސިޔާސީ ވާދަވެރިޔާ އަދި އިދިކޮޅު ލީޑަރު މަރުވެއްޖެކަމަށް ރަޝިއާ ސަރުކާރުން ހާމަ ކޮށްފިއެވެ.
ރަޝިޔާގެ ޖަލު އިދާރާއިން ބުނާ ގޮތުގައި ޖަލުގައި ހުރި އިދިކޮޅު ލީޑަރު މަރުވެފައިވަނީ އުމުރުން 47 އަހަރުގައެވެ.
ފެޑެރަލް ޕްރިޒަން ސާވިސް އިން ނެރުނު ބަޔާނެއްގައި ބުނެފައި ވަނީ ހިނގުމަށް ފަހު ނަވަލްނީއަށް "ރަނގަޅު އިހުސާސެއް ނުކުރެވުނު" ކަމަށާއި "ގާތްގަނޑަކަށް ވަގުތުން ހޭނެތިފައިވާ" ކަމަށެވެ. އޭނާގެ ފުރާނަ ސަލާމަތްކުރަން މަސައްކަތް ކުރަން އެމްބިއުލާންސެއް އައި ނަމަވެސް އޭނާ ވަނީ މަރުވެފައެވެ.
ނަވަލްނީ މަރުވިކަން ވަގުތުން އޭނާގެ ޓީމުން ކަށަވަރުކޮށްދީފައެއް ނުވެއެވެ.
އެހެންނަމަވެސް ނަވާލްނީގެ މަރާއި ގުޅޭގޮތުން އޭނާގެ އަނބިކަބަލުން ޔޫލިއާ ނަވަލްނާޔާ ވަނީ ވާހަކަ ދައްކާފައެވެ.
މިއުނިކް ސެކިއުރިޓީ ކޮންފަރެންސްގައި ވާހަކަ ދައްކަވަމުން އޭނާ ވިދާޅުވީ "މިއަދު އަޅުގަނޑުމެންނަށް އިވުނު ބިރުވެރި ޚަބަރު ގަބޫލުކުރަންވީތޯ" ނޭނގޭ ކަމަށެވެ.
"މިއީ ތެދެއް ނަމަ އަޅުގަނޑު ދަންނަވާލަން ބޭނުންވަނީ ޕޫޓިން އާއި އޭނާގެ އެކުވެރިންނަށް އަދަބު ނުލިބި ނުދާނެ ކަމަށް،" ނަވަލްނާޔާ އިތުރަށް ވިދާޅުވި އެވެ.
އަދި ބައިނަލްއަގްވާމީ ފަރާތްތައް އެއްތަނަކަށް އެއްވެ ރަޝިޔާގެ "ބިރުވެރި ވެރިކަމާ" ދެކޮޅަށް ހަނގުރާމަ ކުރުމަށް ގޮވާލެއްވި އިރު، އޭނާގެ ފިރިމީހާ އާއި ދެކޮޅަށް ހިންގި "އަނިޔާވެރި އަމަލުތަކުގެ" ޒިންމާ ޕޫޓިން ނަގަން ޖެހޭ ކަމަށް ވިދާޅުވިއެވެ.
