ބާ ކައުންސިލުގެ ރައީސް އަލްމަރްޙޫމް އަލްއުސްތާޛު އިސްމާޢީލް ވިޝާމްގެ ހަނދާނުގައި ތައުޒިޔާގެ ދަފްތަރެއް މިއަދު ހުޅުވައިފިއެވެ.
ބާ ކައުންސިލް ބުނި ގޮތުގައި ތައުޒިޔާގެ ދަފްތަރުގައި ފަސޭހައިން ސޮއިކުރެވޭނޭ އިންތިޒާމު ހަމަޖެއްސުމަށް މިއަދުން ފެށިގެން 3 ދުވަސް ވަންދެން މި ފޮތް ބޭއްވިފައި އޮންނާނީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ ގްރައުންޑް ފްލޯރގައި، ކޮންމެ ދުވަހެއްގެ ހެނދުނު 9:00 އިން 14:00 އަށެވެ.
މިމަހުގެ 11 ވަނަ ދުވަހުން ފެށިގެން ދަފްތަރުގައި ސޮއިކުރުމުގެ އިންތިޒާމު ބާ ކައުންސިލުގެ އޮފީސް، މ. ވީނަސް، 4 ވަނަ ފަންގިފިލާގައި، ކޮންމެ ދުވަހެއްގެ ހެނދުނު 9:00 އިން 14:00 އަށް ހަމަޖެހިފައި ހުންނާނެއެވެ.
ބާ ކައުންސިލްގެ ރައީސް އިސްމާއިލް ވިޝާމް ނިޔާވީ ކުއްލިގޮތަކަށް ޖެނުއަރީމަހުގެ 31 ވަނަ ދުވަހުގެ ރޭގެ ވަގުތެއްގައެވެ.
މީގެ ކުރިން އެސިސްޓެންޓް އެޓާނީ ޖެނެރަލްގެ މަގާމު ވެސް އަދާކުރެއްވި ވިޝާމް ނިޔާވީ ކަކުލު ހުޅުގެ އޮޕަރޭޝަނަކަށްފަހު ފަރުވާ ހޯއްދަވަމުން ގެންދަވަނިކޮށް، ހާޓްއެޓޭކެއް ޖެހިގެންނެވެ.
ވިޝާމްއަކީ ރާއްޖޭގެ އެންމެ ތަޖުރިބާކާރު ވަކީލުންގެ ތެރޭގައި ހިމެނޭ އެއް ގާނޫނީ ވަކީލެވެ. އޭނާ ބާ ކައުންސިލްގެ ރައީސްކަމަށް އިންތިޚާބުވީ 2022 ވަނަ އަހަރުގެ ޖޫންމަހުގެ 11 ވަނަ ދުވަހުއެވެ.
