20 ވަނަ ރައްޔިތުންގެ މަޖިލިހުގައި ވާދަކުރައްވާނެ ގޮތެއް ނޯންނާނެ ކަމަށް ރައްޔިތުންގެ މަޖިލިހުގެ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް މިއަދު ވިދާޅުވެއްޖެއެވެ.
މިދިޔަ ހޮނިހިރު ދުވަހު ބޭއްވި އެމްޑީޕީގެ މަޖިލިސް ޕްރައިމަރީގައި ރޮޒެއިނާ ވާދަކުރެއްވީ ފޭދޫ ދެކުނު ދާއިރާގެ އެމްޑީޕީގެ ޓިކެޓު ހޯއްދެވުމަށެވެ. އެކަމަކު، އެ ޕްރައިމަރީގައި އޭނާ އަށް ވަނީ ނާކާމިޔާބާ ކުރިމަތިވެވަޑައިގެންފައެވެ. އެ ނާކާމިޔާބީއާ ގުޅިގެން ރޮޒެއިނާ އަށް ކާށިދޫ ދާއިރާގެ އެމްޑީޕީގެ ޓިކެޓު ދޭން އުޅޭ ކަމުގެ އަޑުތަކެއް ވަނީ ފެތުރިފައެވެ. ކާށިދޫ ދާއިރާގެ އެމްޑީޕީ ޓިކެޓު ކާމިޔާބު ކުރެއްވީ އެ ދާއިރާގެ މެމްބަރު އަބްދުﷲ ޖާބިރެވެ. އެކަމަކު، ޖާބިރުގެ ޓިކެޓު އަތުލައި އޭނާ ޕާޓީން ވަނީ ވަކިކޮށްފައެވެ.
ރޮޒެއިނާ "އެކްސް" ގައި ކުރެއްވި ޕޯސްޓެއްގައި ވިދާޅުވީ އޭނާ 20 ވަނަ މަޖިލިހަށް ދެން ވާދަކުރައްވާނެ ގޮތެއް ނޯންނާނެ ކަމަށެވެ.
"އަޅުގަނޑު މިއީ ރައީސް ނަޝީދެއް ނޫން ބަލިވީމަ، ބަލި ގަބޫލު ކުރަން ނޭނގިގެން އުޅޭކަށް." ރޮޒެއިނާ ވިދާޅުވިއެވެ.
ރޮޒެއިނާ ވިދާޅުވީ އޭނާ ކުރިމަތިލެއްވި ދާއިރާގެ ޓިކެޓު ދެން ލިބުނަސް، އެތަނަށް ވާދަ ނުކުރައްވާނެ ކަމަށެވެ.
"މިއިނީ ހާދަ ބޮލަށް ލުއިވެފައޭ،" ރޮޒެއިނާ ވިދާޅުވިއެވެ.
"އެހެންވީމަ އަނެއްކާ ވެސް ކޮންމެ ވާހަކައެއް ވިހައިގެން އަޅުގަނޑު ބޮލަށް ޖަހާފައި މިތާ އަޅުގަނޑާ އަޅައިގަނެގެން އުޅެން ނުހައްދަވާ،"
ޕްރައިމަރީން ރޮޒައިނާއަށް ނާކާމިޔާބީއާ ކުރިމަތިލާން ޖެހިވަޑައިގެންނެވިއިރު އޭނާގެ ފިރިކަލުން މުހައްމަދު ނާޝިޒް ވަނީ ކިނބިދޫ ދާއިރާގެ އެމްޑީޕީގެ ޓިކެޓު އިތުރު ދައުރަކަށް ކަށަވަރު ކުރައްވައިފައެވެ. ކިނބިދޫ ދާއިރާއަށް އެމްޑީޕީގެ ޕްރައިމަރީ ނާޝީޒް ކާމިޔާބު ކުރެއްވީ ބޮޑު ތަފާތަކުންނެވެ.
ކުރިން ތުލުސްދޫ ދާއިރާގެ މެމްބަރުކަން ވެސް ކުރެއްވި ރޮޒެއިނާ އައްޑޫ މީދޫ ދާއިރާގެ މެމްބަރު ކަމަށް ހޮވިވަޑައިގަތީ 2014 ގައެވެ. އޭނާ ވެފައި ވަނީ އައްޑޫގެ ފުރަތަމަ މަޖިލިސް އަންހެން މެމްބަރަށެވެ. އޭގެ ފަހުން އޮތް މަޖިލިސް އިންތިހާބުގައި 2019 ވަނަ އަހަރު ވެސް ރޮޒެއިނާ ވަނީ އެ ދާއިރާގެ ގޮނޑި ދިފާއު ކުރައްވައިފައެވެ.
