މި އަހަރުގެ ތެރޭގައި މޯލްޑިވިއަނަށް ބޮޑެތި މަތިންދާ ބޯޓުތަކެއް ގެންނަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު މިއަދު އިއުލާން ކުރައްވައިފިއެވެ.

މި އަހަރަށް ރައްޔިތުންގެ މަޖިލިސް ހުޅުވުމަށް ރައީސް މުއިއްޒު އިއްވެވި ފުރަތަމަ ރިޔާސީ ބަޔާނުގައި އެމަނިކުފާނު ވިދާޅުވީ ރާއްޖޭގެ ގައުމީ އެއާލައިން މޯލްޑިވިއަންގެ ހިދުމަތް ފުޅާކޮށް، ދުނިޔޭގެ ގިނަ މަންޒިލްތަކަށް އުދުހުމަށްޓަކައި އެކަމަށް އެކަށޭނަ ބިޔަ މަތިންދާބޯޓު ފަހަރު މިއަހަރު ގެންނާނެ ކަމަށްވެ. ރައީސް އެގޮތަށް ވިދާޅުވި އިރު، މި އަހަރުގެ ތެރޭގައި މޯލްޑިވިއަނަށް ވައިޑް ބޮޑީ ކްރާފްޓް މަތިންދާ ބޯޓުތަކެއް ގެންނާނެ ކަން އެމަނިކުފާނު މީގެކުރިން ވެސް ވިދާޅުވެފައިވެއެވެ.

ރައީސް ވިދާޅުވީ ވައިޑް ބޮޑީ އެއާކްރާފްޓާއެކު މޯލްްޑިވިއަންގެ އޮޕަރޭޝަންތައް ފުޅާ ކުރެވޭނެ ކަމަށެވެ. އަދި ރާއްޖެ އަންނަ ފަތުރުވެރިންވެސް އިތުރު ކުރުމަށް ކުރެވޭ މަސައްކަތްތަކަށް އިތުރު ހަރުފަތަކަށް ގެންދެވޭނެ ކަމަށް ވެސް ރައީސް މުއިއްޒު ވިދާޅުވިއެވެ.

މޯލްޑިވިއަނުން މިހާރު ރާއްޖެއިން ބޭރަށް ދަތުރު ކުރުމަށް ބޭނުން ކުރަނީ  އެއާބަސް 320ގެ ބޯޓެއް އެކަންޏެވެ. އަދި އެތެރޭގެ އުދުހުންތަކުގައި ބޭނުން ކުރުމަށް 13 މަތިންދާ ބޯޓެއް ބޯޓަކާއި 11 ސީޕްލޭން ބޭނުން ކުރެއެވެ.