މުދިމުންނަށް ސައުދީއަށް ދިއުމުގެ ފުރުސަތު އިސްލާމިކް މިނިސްޓްރީން ހުޅުވާލައިފިއެވެ.
މިކަން ހާމަކޮށްފައިވަނީ، މިސްކިތްތަކުގެ އިމާމުން ތިބޭ ގްރޫޕަށް ިއސްލާމީ ކަންތައްތަކާއި ބެހެ ވުޒާރާއިން ފޮނުއްވި މެސެޖެއްގައެވެ. އިސްލާމިކް މިނިސްޓްރީގެ މެސެޖުގައި ބުނެފައިވަނީ ލޮބުވެރި މުދިމުންނާއި އިމާމުންނަށް ސައުދީން ދަތުރެއް ހަމަޖެހިފައިވާކަމަށާއި، އެހެންނަމަވެސް ދަތުރުގެ ޓިކެޓާއި ވިސާގެ ޚަރަދު ހަމަޖައްސަން ޖެހޭނީ އަމިއްލައަށް ކަމަށެވެ.
އަދި މި ދަތުރުގައި 20 މީހުންނަށް ބައިވެރިވެވޭނެކަމަށްވެސް އިސްލާމިކް މިނިސްޓްރީން ބުނެފައި ވެއެވެ.
މި ދަތުރަކީ 8 ފެބްރުއަރީ އިން 16 ފެބްރުއަރީ 2024 އަށް ސަޢޫދީ ޢަރަބިއްޔާއަށް ދިވެހިރާއްޖޭގެ އިމާމުން ކުރާ ދަތުރެކެވެ. މި ދަތުރުގެ ޓިކެޓް އަދި ވިސާ ފީ ދައްކާނީ ބައިވެރިންނެވެ. ނަމަވެސް ދެން ހުރި އެންމެހައި އިންތިޒާމުތައް މިނިސްޓްރީގެ ފަރާތުން ހަމަޖައްސައިދޭނެއެވެ.
އިސްލާމިކް މިނިސްޓްރީން ހިއްސާ ކޮށްފައިވާ މެސެޖުގައި ބުނެފައި ވެއެވެ.
މި ދަތުރުގައި ބައިވެރިވުމަށް އެދޭ ފޯމު ފުރިހަމަ ކުރުމަށްފަހު ހުށަހަޅުމުގެ އެންމެ ފަހުގެ މުއްދަތަކީ 5 ފެބްރުއަރީ ގެ މެންދުރު 12:00 އެވެ.
މުދިމުންނަށް ސައުދީއަށް ދިއުމުގެ ފުރުސަތު އޮތްކަން އަންގާފައި މިވަނީ، އިމާމުން ތަމްރީނުކުރުމަށް ރާއްޖެއިން ބޭރަށްވެސް ފޮނުވާނެކަމަށް އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވިތާ ހަފްތާއެއްހާ ދުވަސްފަހުންނެވެ.
އިމާމުން ތަމްރީންކުރުމަށް ކުރިއަށްގެންދާ ޕްރޮގްރާމް ފައްޓަވާ ދެއްވަމުން ޑރ. ޝަހީމް ވިދާޅުވީ އިމާމުން ތަމްރީނުކުރުމަށް ރާއްޖެއިން ބޭރަށް ވެސް ފޮނުވާނެކަމަށާއި، މާސްޓަރސް އާއި ޕީއެޗްޑީ ހަދަން ބޭނުންވާ އިމާމުންނަށް ސްކޮލަޝިޕްގެ ފުރުޞަތުވެސް ފަހުކޮށް ދެއްވާނެ ކަމަށެވެ.
އެ ޖަލްސާގައި ވާހަކަ ދައްކަވަމުން ޑރ. ޝަހީމް ވިދާޅުވީ އިމާމުން ތަމްރީނުވާން މަޝްހޫރު އަރަބި ޤައުމުތަކުގެ އިތުރުން ތައިލެންޑަށްވެސް ފޮނުވާނެކަމަށެވެ.
