ޕީޖީ ޝަމީމަށް ދިން ހަމަލާގެ ފަހަތުގައި ތިބި މީހުން އިންސާފުގެ ކުރިމައްޗަށް ގެނައުމުގެ ގާބިލްކަން ފުލުހުންގެ ކިބާގައި ހުންނޭނެ ކަމުގައި ކުރީގެ ކޮމިޝަނަރ އޮފް ޕޮލިސް އަހުމަދު ހަމީދު ވިދާޅުވެއްޖެއެވެ.
ހަމީދު ކުރެއްވި އެކްސް ޕޯސްޓެއްގައި ވިދާޅުވީ، ޖިނާއީ ޢަދުލުގެ ނިޒާމުގެ މައި އެއް މުއައްސަސާގެ ލީޑަރަށް މިއަދު ދިން ހަމަލާ ކުށްވެރިކުރާ ކަމަށާއި، އެ ހަމަލާ އަދި އެނޫންވެސް އެފަދަ ހަމަލާތައް ދޭ ފަރާތްތައް ހޯދައި، ގާނޫނުގައިވާ ގޮތުގެ މަތިން ފިޔަވަޅު އެޅުމުގެ ފުރިހަމަ ގާބިލުކަން ދިވެހި ފުލުހުންގެ ޚިދުމަތުގައި މާރަނގަޅަށްވެސް ހުންނާނެ ކަމުގައެވެ. އަދި އެކަން އެގޮތަށް ކުރާނެކަމުގެ ފުރިހަމަ ޔަގީންކަން އެމުއައްސަސާއާމެދު އެބައޮތް ކަމަށްވެސް އޭނާ ވިދާޅުވިއެވެ.
ޖިނާއީ ޢަދުލުގެ ނިޒާމުގެ މައި އެއް މުއައްސަސާގެ ލީޑަރަށް މިއަދު ދިން ހަމަލާ ކުށްވެރިކުރަން. އެ ހަމަލާ އަދި އެނޫންވެސް އެފަދަ ހަމަލާތައް ދޭ ފަރާތްތައް ހޯދައި، ގާނޫނުގައިވާ ގޮތުގެ މަތިން ފިޔަވަޅު އެޅުމުގެ ފުރިހަމަ ގާބިލުކަން ދިވެހި ފުލުހުންގެ ޚިދުމަތުގައި މާރަނގަޅަށްވެސް ހުންނާނެ.…
— Mohamed Hameed (@M_Hameedh) January 31, 2024
ޝަމީމަށް އިއްޔެ ހަމަލާދީފައިވަނީ ފަތިހުން ފެށިގެން އޭނާގެ ހަރަކާތްތަކަށް ފާރަލުންދިޔަ ދެ މީހެކެވެ. ދެ މީހުން ސައިކަލެއްގައި ގޮސް މަރުތޭލެއް ބޭނުންކޮށްގެން ދިން ހަމަލާގައި ޝަމީމްގެ ވައަތުގައި ވަނީ ރެނދުލައިފައެވެ. އޭނާ އަށް އޭޑީކޭ ހޮސްޕިޓަލްގައި ވަނީ ފަރުވާ ދީފައެވެ. ޝަމީމަށް ހަމަލާދީފައި ވަނީ ދުވެ ނިންމެވުމަށް ފަހު، ދަރިފުޅު ސްކޫލަށް ލާފައި ވަޑައިގެން ގެއަށް ވަންނަވަނިކޮށެވެ.
ޝަމީމަށް ދިން ހަމަލާ ދިވެހި ސަރުކާރުން ވަނީ ކުށްވެރިކޮށްފައެވެ. ސަރުކާރުން ނެރުނު ބަޔާނެއްގައި ބުނީ ރާއްޖޭގައި ހިންގާ ޓެރަރިސްޓް އަދި އަނިޔާވެރި އަމަލުތައް ހިންގާ ކޮންމެ މީހަކު އިންސާފުގެ ކުރިމައްޗަށް ގެނައުމަށް ސަރުކާރުގެ ހުރިހާ ވަސީލަތަކާއި އިހްތިޔާރެއް ބޭނުން ކުރާނެ ކަމަށެވެ.
މިފަދަ ނުރައްކާތެރި ޖަރީމާތައް ތަކުރާރުވިޔަ ނުދިނުމަށް ސަލާމަތީ ބާރުތަކުން އަބަދުވެސް ފާރަވެރިވަމުން ދާނެ ކަމަށް ބަޔާނުގައިވެއެވެ. އަދި ދައުލަތުގެ ޒިންމާދާރު މަގާމުތަކުގައި ތިއްބަވާ ހިދުމަތްތެރީންގެ ރައްކާތެރިކަމަށް ކުރެވެންހުރި ހުރިހާކަމެއް ކުރާނެ ކަމަށް ވެސް ސަރުކާރުން ބުނެފައިވެއެވެ.
