ރައްޔިތުންގެ މަޖިލިހުން ފެނުނީ ޑިމޮކްރަސީއާ ބީރައްޓެހި މަންޒަރެއް ކަމަށާއި މަޖިލިހުގެ ނިންމުން މުރާޖައާ ކުރަން ޖެހޭ ކަމަށް ނައިބު ރައީސް ހުސެއިން މުހައްމަދު ލަތީފް ވިދާޅުވެއްޖެއެވެ.
ރައީސް ޑރ. މުހައްމަދު މުއިއްޒު ސަރުކާރުގެ ކެބިނެޓުގައި ހިމެނިވަޑައިގަންނަވާ ތިން ވަޒީރަކަށް ރުހުން ނުދިނުމަށް މަޖިލިހުން މިއަދު ވަނީ ފާސްކޮށްފައެވެ. ރުހުން ނުދޭން ފާސް ކުރީ ބަންޑާރަ ނައިބު އަހުމަދު އުޝާމާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ހައުސިން މިނިސްޓަރު ޑރ. އަލީ ހައިދަރަށެވެ. ރުހުން ނުދޭން ފާސްކުރި މި ސަރުކާރުގެ ކެބިނެޓުގެ ތިން ވަޒީރުން މިއަދު ވަނީ އަނެއްކާ ވެސް އެ މަގާމުތަކަށް އައްޔަން ކުރައްވައިފައެވެ.
ރައްޔިތުންގެ މަޖިލީހުން މިއަދު ފެނިގެންދިޔައީ ޑިމޮކްރެސީގެ އަސްލުތަކާއި ބީރައްޓެހި މަންޒަރެއް. ވަޒީރުންނަށް ރުހުން ނުދެއްވުމަކީ، ރައްޔިތުންގެ ނިންމުމަށް، މުޠުލަގަށް ހުރަސްއެޅުން. މި ނިންމުން އަލުން މުރާޖާކޮށް، އިސްލާހުކުރައްވާނެކަމަށް އުންމީދުކުރަން.
— Hussain Mohamed Latheef (@HucenSembe) January 29, 2024
ނައިބު ރައީސް ހުސެއިން މުހައްމަދު ލަތީފް "އެކްސް" ގައި މިރޭ ކުރެއްވި ޕޯސްޓެއްގައި ވިދާޅުވީ ރައްޔިތުންގެ މަޖިލީހުން މިއަދު ފެނިގެންދިޔައީ ޑިމޮކްރެސީގެ އަސްލުތަކާއި ބީރައްޓެހި މަންޒަރެއް ކަމަށެވެ. ވަޒީރުންނަށް ރުހުން ނުދެއްވުމަކީ، ރައްޔިތުންގެ ނިންމުމަށް، މުތުލަގަށް ހުރަސް އެޅުން ކަމަށް އެމަނިކުފާނު ވިދާޅުވިއެވެ.
"މި ނިންމުން އަލުން މުރާޖާކޮށް، އިސްލާހު ކުރައްވާނެ ކަމަށް އުންމީދުކުރަން." ނައިބު ރައީސް ވިދާޅުވިއެވެ.
މަޖިލިހުން މިއަދު ރުހުން ނުލިބުނު ތިން ވަޒީރުން އެ ބޭފުޅުން މި ސަރުކާރުގައި ކުރިން ވެސް ތިއްބެވި މަގާމުތަކަށް އަލުން އައްޔަން ކުރެއްވި އިރު، މަޖިލިހުގެ ރުހުން ހޯދަން އަނެއްކާ ވެސް ފޮނުވަން ޖެހެއެވެ. ވަޒީރުންތަކަކަށް ރުހުން ނުދޭން ނިންމި މައްސަލާގައި މި ސަރުކާރުގެ ބޭފުޅުން ދަނީ އެމްޑީޕީ އާއި ޑިމޮކްރެޓްސްއަށް ފާޑުކިޔަމުންނެވެ.
