ރައީސް މުއިއްޒުގެ ސަރުކާރުގެ ބައެއް ވަޒީރުނަށް، އެމްޑީޕީގެ މެޖޯރިޓީ އޮތް ރައްޔިތުންގެ މަޖިލިހުން ރުހުން ނުދޭން އުޅެނީ ޒާތީވެގެން ކަމުގައި އެމްއެންޕީގެ ރައީސް ކާނަލް ނާޒިމް ވިދާޅުވެއްޖެއެވެ.
މިސަރުކާރުގެ ވަޒީރުންނަށް ރުހުން ދިނުން އެޖެންޑާކޮށް، ރޭ ބައްވަން އުޅުނު ޖަލްސާވެސް ކުރިޔަށް ނުގެންދެވިގެން ވަނީ ހުއްޓާލާފައެވެ. ރޭގެ ޖަލްސާވެސް ފެށުމާއެކު ސަރުކާރަށް ތާއީދުކުރާ މެމްބަރުންވަނީ ދުންމާރިތައް ހިފައިގެން ރިޔާސަތުގައި އިންނެވި އަސްލަމްގެ ކަންފަތްދޮށުގައި އަޑުގަދަކުރަން ފަށާފައެވެ.
އަދި ރޭގެ ޖަލްސާ ކެންސަލް ކުރުމަށްފަހު ޖަލްސާ އަލުން ބާއްވަން ނިންމީ މިއަދު 11 ޖަހާއިރުއެވެ. އެހެންނަމަވެސް މަޖިލިސް އިދާރާއިން މިހާރުވަނީ ޖަލްސާ މިއަދު 1:00 އަށް އެޖެންޑާ ކޮށްފައެވެ.
މިއަދު 1:00 ގައި ޖަލްސާ ބާއްވަން ހަމަޖެހިފައި ވަނިކޮށް ނާޒިމް ކުރެެއްވި އެކްސް ޕޯސްޓެއްގައި ވިދާޅުވީ، އޭނާ ދެކޭގޮތުގައި ރައްޔިތުން އަމިއްލައަށް ގޮތް ނިންމާ ހޮވާފައިވާ ސަރުކާރުގެ އެންމެ ގާބިލް މިނިސްޓަރުންނަށް ރުހުން ނުދޭންވީ އެއްވެސް ސަބަބެއް ނެތް ކަމުގައެވެ.
ކޮމިޓީމަރުހަލާގައި ޝަރުތު ހަމަވެ ގާބިލު ބޭފުޅުންކަމުގައި ނިންމާފައިވަނިކޮށް، މަޖްލިސް ތަޅުމުން ވޯޓް ނުދީ އެބޭފުޅުން ބޭރުކޮށްލަން އުޅުމަކީ ޒާތީވެގެން ކުރާކަމެއްކަން ޔަގީން. އެހެނަސް މަޖްލިހުގެ މެޖޯރިޓީ ނަހަމަގޮތުގައި ބޭނުންކޮށްގެން ރައީސް ޑރ.މުއިއްޒުގެ ސަރުކާރު ބަލިކަށި ކޮށްލެވޭނެކަމަށް ހީކުރުމަކީ ކުށް ހީއެއް!
ނާޒިމްގެ އެކްސް ޕޯސްޓުގައި ވިދާޅުވެފައި ވެއެވެ.
ރޭ މަޖިލިސް ޖަލްސާއެއް ބޭއްވުމަށް ނިންމިއިރު ވަޒީރުންނަށް ރުހުން ދިނުމާމެދު ގޮތެއް ނިންމަން އިއްޔެ ބާއްވަން މަސައްކަތް ކުރި މަޖިލީހުގެ ޖަލްސާ، މަޖިލިސް ހޫނުވެ ބޭއްވޭގޮތް ވެފައި ނުވަނިކޮށެވެ.
މި ސަރުކާރުގެ ވަޒީރުންނަށް ރުހުން ދިނުމުގައި ޚިޔާލު ތަފާތުވުން އުފެދި މަޖިލިހުގައި މެމްބަރުންގެ މެދުގައި އިއްޔެ ބޮޑެތި ހަމަނުޖެހުންތަކެއް ހިނގާ ބައެެއް މެމްބަރުންނަށް ވަނީ އަނިޔާވެސް ވެފައެވެ. އަދި ވެރިކަންކުރާ ކޯލިޝަނުންވަނީ 23 މެމްބަރުންގެ ސޮޔާއެކު މަޖިލިސް ރައީސްއާއި ނާއިބު ރައީސްގެ އިތުބާރު ނެތްކަމުގެ މައްސަލަވެސް މަޖިލީހަށް ވައްދާފައެވެ.
އިއްޔެ ބޭއްވި ރައްޔިތުންގެ މަޖިލިހުގެ ޖަލްސާގައި، ފޮރިން މިނިސްޓަރު މޫސާ ޒަމީރާއި ބަންޑާރަ ނައިބު އަހުމަދު އުޝާމް އާއި ހައުސިން މިނިސްޓަރު ޑރ. އަލީ ހައިދަރު އަދި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށް ރުހުން ނުދޭން ދަ ޑިމޮކްރެޓްސް އިން ވަނީ ނިންމާފައެވެ.
ބަންޑާރަ ނައިބު އަހުމަދު އުޝާމް އާ އެކުގައި މި ސަރުކާރުގެ ތިން ވަޒީރަކަށް ރުހުން ނުދިނުމަށް އެމްޑީޕީގެ ޕާލަމެންޓްރީ ގްރޫޕުންވެސް ވަނީ ތްރީ ލައިން ވިޕެއް ނެރެފައެވެ.
އަދި އެމްޑީޕީ ޕާލަމެންޓްރީ ގްރޫޕްގެ އިއްޔެގެ ބައްދަލުވުމުގައި ނިންމާފައި ވަނީ އުޝާމްގެ އިތުރުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ހައުސިން މިނސްޓަރު ޑރ. އަލީ ހައިދަރާއި އިކޮނޮމިކް މިނިސްޓަރު މުހައްމަދު ސައީދުއަށް ރުހުން ނުދިނުމަށެވެ.
އެހެންނަމަވެސް ސަރުކާރަށް ނިސްބަތްވާ މެމްބަރުންގެ އިހުތިޖާޖުތަކުގެ ސަބަބުން މަޖިލިސް ޖަލްސާވަނީ ކުރިޔަށް ނުގެންދެވިފައެވެ.
އޭގެ އިތުރުން އިދިކޮޅު ޕާޓީތަކުން ބައެއް ވަޒީރުންނަށް ރުހުން ނުދޭން ނިންމުމާއެކު، މަޖިލިސް ދޮށަށް ވަނީ ސަރުކާރަށް ތާއީދުކުރާ ބައެއް ފަރާތްތަކުން އެއްވެ ސަރުކާރު ހިންގުމަށް ދަތި ނުކުރުމަށް ގޮވާލާ މުޒާހިރާވެސް ކޮށްފައެވެ.
މަޖިލިސް ތެރޭގައި ހިނގަމުންދާ ހަމަނުޖެހުންތަކާއި ގުޅިގެން އިއްޔެ ދުވާލު ބޭއްވި ޖަލްސާވެސް ވަނީ ކުރިޔަށް ނުގެންދެވިފައެވެ.
