ލަންކާ އާއި ރާއްޖެއާ ދެމެދު އެޅި ސަބްމެރީން ކޭބަލްގެ ސަބަބުން ރާއްޖޭގެ ޑިޖިޓަލް އިންފްރާސްޓަރްކްޗަ އިތުރަށް ވަރުގަދަވެ، އަންނަން އޮތް ޖީލުތަކަށް އިތުރު ފުރުސަތުތައް ފަހި ވެގެންދާނެ ކަމަށް މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޯލޮޖީ، މުޙައްމަދު މަލީޙް ޖަމާލް ވިދާޅުވެއްޖެއެވެ.
މަލީހު މިހެން ވިދާޅުވީ، މޯލްޑިވްސް – ސްރީލަންކާ ކޭބަލް (އެމްއެސްސީ) ސްރީލަންކާގެ ކޮލަމްބޯއިން ހުޅުމާލޭ ލޭންޑިންގް ސްޓޭޝަނާ ގުޅާލުން ފާހަގަކުރުމުގެ ގޮތުންނެވެ. މިނިސްޓަރ ވިދާޅުވީ، މިއީ މުހިންމު ލަނޑުދަނޑިއެއް ކަމަށާއި އިންޓަނެޓްގެ ހިދުމަތް ފޯރުކޮށްދޭ ދެ ކުންފުނި ކަމަށް ވާ އުރީދޫ އަދި ދިރާގުން ރާއްޖޭގެ މުވާސަލާތީ ދާއިރާ ކުރިއެރުވުމުގައި ކޮށްދޭ މުހިންމު މަސައްކަތް ފާހަގަ ކުރައްވާ ކަމަށެވެ.
Thanking @Dhiraagu @OoredooMaldives for their continuous commitment in strengthening the digital eco-system of the country. I am confident that with the successful completion of this project we are paving way to further strengthen the digital infrastructure & increase diversity. pic.twitter.com/TBYKN819Ua
— Mohamed Maleeh Jamal (@maleehjamal) December 15, 2020
ވޭވްލެންތް ޑިވިޝަން މަލްޓިޕްލެކްސިންގް ސަބްސިސްޓަމް އަދި 863 ކިލޯމީޓަރުގެ ފައިބާ އޮޕްޓިކް ކޭބަލް އެކުލެވިފައިވާ އެމްއެސްސީ އަކީ ރާއްޖެ އާއި ސްރީލަންކާގެ އިންޓަނޭޝަނަލް އިންޓަނެޓް ޓްރެފިކް ފްލޯއަށާއި މުވާސަލާތީ ވިއުގަ އިތުރަށް ވަރުގަދަ ކުރުމަށް އެޅުނު ކޭބަލެއް ކަމަށް ރާއްޖޭގައި މުއާސަލާތީ ހިދުމަތްދޭ ދެ ކުންފުނި ދިރާގާއި އުރީދޫ އިން ބުނެއެވެ.
އުރީދޫ މޯލްޑިވްސް އާއި ދިރާގާއި ޑަޔަލޮގް އެކްޒިއާޓް، މި ތިން ކުންފުނިން ވީ އެއްބަސްވުމުގެ ދަށުން، އެމްއެސްސީ ކޭބަލްގެ ގެ އަމަލީ މަސައްކަތް ފަށާފައިވަނީ މި އަހަރު ކުރީކޮޅު އެވެ. މިއީ 22 މިލިއަން ޑޮލަރުގެ މަޝްރޫޢެކެވެ.
މި ކޭބަލްގެ ސަބަބުން 5-ޖީގެ ވަރުގަދަ ނެޓްވޯކްގެ ހިދުމަތް މުޅި ރާއްޖެއަށް ފޯރުކޮށްދިނުމަށް އިތުރު ހިތްވަރެއް ލިބިގެންދާނެ ކަމަށާއި ކުރިއަރަމުން އަންނަ އީޖާދީ ޓެކްނޮލޮޖީއަށް ބޭނުންވާ ވަސީލަތްތަކާއި ޚިދުމަތްތައް ފޯރުކޮށްދިނުމަށް މަގުފަހިވެގެންދާނެ ކަމަށްވެސް އުރީދޫ އާއި ދިރާގުން ބުނެއެވެ.
