ރާއްޖޭގެ އެކި ކަންކޮޅުތަކުގައި މިއަދު ކުރިޔަށްދިޔަ ޕީޕީއެމް/ޕީއެންސީގެ މަޖިލިސް ޕްރައިމަރީގައި މުޅި ރާއްޖެއިން އެންމެ ތަފާބޮޑު ނަތީޖާއެއް ނެރެ، އިނގުރައިދޫ ދާއިރާގެ ޓިކެޓް އެ ދާއިރާގެ ކުރީގެ މެމްބަރު އިބުރާހިމް ފަލާހު ކާމިޔާބު ކުރައްވައިފިއެވެ.
މިއަދު ބޭއްވި މަޖިލިސް ޕްރައިމަރީގައި އިނގުރައިދޫ ދާއިރާގެ ޕްރައިމަރީގައި ތިން ކެނޑިޑޭޓަކު ވާދަ ކޮށްފައި ވެއެވެ. އެގޮތުން ފަލާހުއާއި ވާދަކޮށްފައިވަނީ ޒަހުރިއްޔާ ހުސެއިންފުޅުއާއި ހުސެއިން އާދަމްއެވެ. މިއަދުގެ ޕްރައިމަރީގައި ފަލާހުވަނީ 832 ވޯޓު ހޯދާ، ވޯޓު ލީމީހުންގެ %71.2 ކާމިޔާބު ކޮށްފައެވެ. ފަލާހުއާއި ވާދަ ކުރެއްވި ޒުހުރިއްޔާ ހުސެއިންފުޅަށް 209 ވޯޓު ލިބުނުއިރު ހުސެއިން އަސްލަމްއަށް ލިބުނީ %10.9 ވޯޓެވެ.
މިއަދު ބޭއްވުނު ޕީއެންސީގެ މަޖިލިސް ޕްރައިމަރީ ކާމިޔާބު ކުރުމަށް ފަލާހު ވަނީ ވަރަށް ވަރުގަދަ ކެމްޕޭންއެއް ކުރައްވާފައެވެ. އެގޮތުން އިނގުރައިދޫ ދާއިރާގެ ހުރިހާ ރަށަކަށް ދަތުރުކޮށް، އޭނާވަނީ ދާއިރާގެ ގިނަ އަދަދެއްގެ މެމްބަރުންނާ ބައްދަލުކޮށް ހަދާފައެވެ.
ޕީޕީއެމް/ޕީއެންސީގެ މަޖިލިސް ޕްރައިމަރީގައި ވާދަކުރުމަށް ފުރުސަތު ހުޅުވާލުމުން، ޕްރައިމަރީގައި ވާދަކުރުމަށް މުޅި ރާއްޖެއިންވެސް އެންމެ ފުރަތަމަ ފޯމު ހުށަހެޅުއްވި ކެނޑިޑޭޓަކީވެސް ފަލާހުއެވެ.
ފަލާހުއަށް އިނގުރައިދޫ ދާއިރާގެ ބޮޑު ތާއީދެއް އޮންނައިރު އެދައިރާގެ ގިނަ އަދަދެއްގެ ބަޔަކުވެސް މިހާރުވަނީ ވެރިކަންކުރާ ޕީއެންސީއާއި ގުޅިފައެވެ.
ދާދިފަހުން ވެރިކަންކުރާ މައި ޕާޓީ، ޕީއެންސީއާ ގުޅިވަޑައިގެންނެވުމަށްފަހު ފަލާހު ވިދާޅުވެފައިވަނީ، ރައީސް މުޢިއްޒުގެ ވެރިކަން ދިފާއުކުރަން މޭ އައްޑަނައަކަށް ހަދާނެކަމަށާއި، ސިޔަސީ ގޮތުންނާއި ހުރިހާ ގޮތަކުންވެސް ރައީސް މުޢިއްޒުގެ ސަރުކާރު ދިފާޢު ކުރުމުގައި ވަފާތެރިކަންމަތީ ދެމިހުންނަވާނެކަމުގެ ޔަޤީންކަން ދެއްވާކަމަށެވެ. އަދި މުޅި ރ. އަތޮޅުވެސް ވަނީ ރައީސް މުޢިއްޒުގެ ފަހަތްޕުޅުގައިކަމަށާއި، މުޅި ރ. އަތޮޅުގެ 15 ރަށުގެ ރައްޔިތުންވެސް ތިބީ ރައީސް މުޢިއްޒުގެ ސަރުކާރު ދިފާޢުކޮށް އެމަނިކުފާނުގެ ލަފަޔާ އިރުޝާދުގެ މަތިން ކުރިއަށް ދާންކަމަށްވެސް ފަލާހު ވިދާޅުވިއެވެ.
18 ވަނަ މަޖިލިހުގަވެސް އެދާއިރާގެ މެމްބަރުކަން ކުރެއްވީ ފަލާހުއެވެ. ފަލާހު ފާހަގަ ވެފައިވަނީ ދާއިރާގެ ރައްޔިތުންނާ ގާތުން ގުޅުން ބާއްވާ، ރައްޔިތުންގެ ބޮޑު ތާއީދެއް އޮނަން ބޭފުޅެއްގެ ގޮތުގައެވެ.
