މިއަދު ލޯންޗު ކޮށްފައިވާ ޒަކާތު ހައުސްގެ ވެބްސަައިޓުގައި ޒަކާތަށް ޚާއްޞަ އޮންލައިން ލައިބްރަރީއެއްވަނީ ޤާއިމުކުރެވިފައި ވާކަމަށާއި، ޒަކާތާ ބެހޭ ދާއިރާއިން ފޮތްތަކާއި ދިރާސާތައް ލައިބްރަރީގައި ޝާއިޢުކުރަން ޝައުޤުވެރިވާ ފަރާތްތަކުން ފުރުސަތު ހުޅާވާލާފައި ވާކަމަށް އިސްލާމިކް މިނިސްޓަރ ޑރ. ޝަހީމް ވިދާޅުވެއްޖެއެވެ.
ޑރ. ޝަހީމް މިއަދު ކުރެއްވި އެކްސް ޕޯސްޓެއްގައި ވިދާޅުވީ ޒަކާތާބެހޭ ފޮތްތައް އެއްތަނަކުން ލިބެންހުރުމަކީ އިސްލާމީ އިޤުތިޞާދުގެ ދާއިރާއިން ކިޔަވާކުދިންނަށް ލިބިގެންދާނެ ވަރަށް ބޮޑު ފުރުޞަތަކަށްވާނެ ކަމަށެވެ.
ދިވެހިރާއްޖޭގެ ޒަކާތު ހައުސް ވެބްސައިޓް މިއަދު ލޯންޗްކޮށްދެއްވީ އިސްލާމީ މަރުކަޒުގެ އިސް އިމާމް ޝައިހް މުހައްމަދު ލަތީފްއެވެ.
މި ރަސްމިއްޔާތުގައި ވާހަކަދައްކަވަމުން އިސްލާމީ ކަންތައްތަކާއި ބެހޭ ވަޒީރު ޑރ. ޝަހީމް އަލީ ސައީދު ވިދާޅުވީ، މި ވެބްސައިޓްގެ އެންމެ މުހިންމު އެއް ބޭނުމަކީ ޒަކާތާއި ބެހޭގޮތުން ކުރެވޭ އެންމެހައި މުއާމަލާތްތައް ރައްޔިތުންނާއި ގާތަށް ގެނެސްދިނުންކަމަށެވެ. އަދި މި ވެބްސައިޓް މެދުވެރިކޮށް ޒަކާތު ފަންޑު ހިނގަމުންދާ ގޮތުގެ ތަފްސީލްތައް ރައްޔިތުންނަށް ކިޔައިދެވިގެންދާނެކަމަށް ޝަހީމް ވިދާޅުވިއެވެ.
ޝަހީމް ވިދާޅުވީ، އަމާޒަކީ ދިވެހިރާއްޖޭގެ ޒަކާތުގެ ދާއިރާއިން ކުރެވިފައި ހުރި ތާރީހީ މަސައްކަތްތައް އެއްތާކުން ފެންނަން ހުންނާނެގޮތް ހެދުންކަމަށެވެ. އަދި އިސްލާމީ ކަންތައްތަކާއި ބެހޭ ވުޒާރާއިން މީގެކުރިން ކޮށްފައި ހުރި މުހިންމު ކަންކަންވެސް މި ވެބްސައިޓުން ފެންނަން ހުންނާނެފަދަ ގޮތަކަށް އިންތިޒާމްތައް ބައްޓަން ކުރައްވާނެކަމަށް ޝަހީމް ވިދާޅުވިއެވެ.
"ޒަކާތާއި ގުޅޭ ދާއިރާއިން ފޮތްތައް ލިޔެ ދިރާސާތައް ކޮށްފައި ހުރި ފަރާތްތައް އެބޭފުޅުންގެ ފޮތްތަކާއި ދިރާސާތައް ވެބްސައިޓްގައި ޕަބްލިޝް ކުރެއްވުމަށް މިނިސްޓްރީއަށް ހަދިޔާކުރެވޭނެ." ޝަހީމް ވިދާޅުވިއެވެ.
ދިވެހިރާއްޖޭގެ ޒަކާތު ހައުސް އިފްތިތާހުކޮށްދެއްވީ މިމަހުގެ 2 ވަނަ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. "ދިވެހިރާއްޖޭގެ ޒަކާތު ހައުސް" އަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 116 ވަނަ މާއްދާއިން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން އުފެއްދެވި އިދާރާއެކެވެ. އެމަނިކުފާނު މި އިދާރާ އުފެއްދެވީ 18 ޑިސެމްބަރު 2023 ގައެވެ. މިއީ އިސްލާމީ ކަންތައްތަކާ ބެހޭ ވުޒާރާގެ ދަށުން ހިންގުމަށް ނިންމަވާފައިވާ ތަނެކެވެ.
ދިވެހިރާއްޖޭގެ ޒަކާތު ހައުސްގެ ނަމުގައި ސަރުކާރުގެ އިދާރާއެއް ޤާއިމުކުރެއްވީ، ދިވެހިރާއްޖޭގެ ޒަކާތުގެ ނިޒާމު ހަރުދަނާކުރުމުގެ މަސައްކަތާއި، ޒަކާތުގެ ނަފާ އޭގެ ބެހެނިވެރިންނަށް ފުޅާ ދާއިރާއެއްގައި ލިބޭނެގޮތަށް ޒަކާތު ފަންޑު ތަރައްޤީކުރުމުގެ މަސައްކަތްކުރުމުގެ ބޭނުމުގައެވެ.
