އިސްލާމިކް މިިނިސްޓްރީގެ ކުރީގެ ޕާމަނަންޓް ސެކްރެޓަރީ މުސްއަބް އަބްދުﷲ، މަޤާމުން ވަކިކުރީ ގާނޫނާ ޚިލާފަށް ކަމަށާއި، ނަމަވެސް މުސާރައާއި އިނާޔަތުގެ ބަދަލުގެ ގޮތުގައި 1.18 މިލިއަން ރުފިޔާ ބަދަލުގެ ދޭން އަންގާފައިވާ ބައި ސުޕްރީމް ކޯޓުން މިއަދު ބާތިލްކޮށްފިއެވެ.
މުސްއަބު 2019ވަނަ އަަހަރުގެ ސެޕްޓެމްބަރުމަހު ޕީއެސްކަމުގެ މަގާމުން ވަކި ކޮށްފައިވަނީ ގިނަ ދުވަސްތަކެއް ވަންދެން ސަސްޕެންޝަންގައި ބެހެއްޓުމަށްފަހުއެވެ.
ވަޒީފާއިން ވަކި ކުރުމާއި ގުޅިގެން މުސްއަބުވަނީ އޭނާ ސްސްޕެންޝަންގައި ހުރި މުއްދަތުގެ މުސާރައާއި އިނާޔަތް ހޯދުމުގެ އިތުރުން އޭނާ ވަޒީފާއިން ވަކިކުރީ ގާނޫނާ ޚިލާފަށް ކަމަށް ކަނޑައަޅާދިނުމަށް ސިވިލް ސާވިސް ކޮމިޝަނާއި ސިވިލް ކޯޓުގައި ދެކޮޅަށް ދައުވާ ކޮށްފައެވެ. އެ ދައުވާގައި ސިވިލް ކޯޓުން މައްސަލަ ނިންމާފައިވަނީ އޭނާއާއި ދެކޮޅަށެވެ.
އެމައްސަލަ ސީއެސްސީން ސުޕްރީމް ކޯޓުގައި އިސްތިއުނާފް ކުރުމުން އެ ކޯޓުން ކުރި ހުކުމުގައިވަނީ މުސްއަބު ވަކިކުރީ ދައުލަތުގެ ރަސްމީ ލިޔުމެއް ޓްވިޓާގައި އާންމު ކުރުމުން ކަމަށް ވަޒީފާއިން ވަކިކުރި ލިޔުމުގައި ބަޔާން ކުރި އެ ލިޔުމަކީ ސިއްރު ލިޔުމެއް ކަން ސާބިތުކޮށް ނުދެވޭ ކަމަށެވެ. އަދި އެކަމަކީ ގާނޫނުގެ ދަށުން އެޅޭ އެންމެ ހަރުކަށި ފިޔަވަޅު ކަމަށްވާ ވަޒީފާއިން ވަކިކުރަންޖެހޭ އެކަށީގެންވާ ސަބަބެއް ނޫން ކަމަށްވާތީ އޭނާ ވަކިކުރީ ގާނޫނާ ހިލާފަށް ކަމަށް ސުޕްރީމް ކޯޓުގެ ހުކުމުގައިވެއެވެ.
ހުކުމުގައިވާ ބަޔާޏްކޮށްފައިވަނީ ވަޒީފާއިން ވަކިކުރީ ގާނޫނާ ހިލާފަށް ކަމަށް ވިޔަސް، ބަދަލުގެ ގޮތުގައި 1.1 މިލިއަން ރުފިޔާ ނަގައިދިނީ ގޯސްކޮށެވެ. އެއީ މުސްއަބުގެ ފަރާތުން ބަދަލު ނަގައިދޭން ފުރަތަމަ އެދިފައިވަނީ ހައިކޯޓުގެ މަރުހަލާ ކަމަށްވާތީ އާއި ބަދަލު ނަގައި ދިނުމަކީ ފުރަތަމަ މަރުހަލާގައި ހުށަހެޅި، ގޮތް ނިންމަންޖެހޭ ކަންކަމަށް ވާތީ ކަމަށް ހުކުމުގައިވެއެވެ. އެހެންކަމުން ބަދަލުގެ ގޮތުގައި 1.1 މިލިއަން ދޭން އެންގި ބައި ބާތިލްކުރާ ކަމަށް ތިން ފަނޑިޔާރުންގެ އިއްތިފާގުން ކުރެއްވި ހުކުމުގައިވެއެވެ.
ނަމަވެސް ބަދަލު ހޯދަން އެދޭނަމަ އެކަމަށް ވަކި މައްސަލައެއް ހުށަހެޅުމުގެ ހައްގު މުސްއަބަށް އޮންނާނެ ކަމަށް ހުކުމުގައިވެއެވެ.
ސިވިލް ސާވިސް ކޮމިޝަނުން މުސްއަބު ވަޒީފާއިން ވަކި ކޮށްފައިވަނި، އޭނާ ދައުލަތުގެ ސިއްރު ލިޔުމެއް ސޯޝަލް މީޑިއާގައި އާންމު ކުރުމާއި އަދި އޭގެ އިތުރުން މިނިސްޓްރީގެ މުވައްޒަފެއްގެ ގޮތުގައި ނުހިމެނޭ މީހަކު މުވައްޒަފެއްކަމުގައި ހިމަނާ އޭނާއަށް މުސާރަ ދީފައިވާކަމަށް ބުނާ މައްސަލައެކެވެ.
