އިސްލާމިކް މިނިސްޓްރީގެ އިސްލާމިކް ޗެރިޓީ ފަންޑުން ޚާއްސަ އެހީއަށް ބޭނުންވާ މީހުންގެ މަރުކަޒަށް 32 މެޑިކަލް އެނދު ހަދިޔާކޮށްފިއެވެ.
މި އެނދުތައް ޚާއްސަ އެހީއަށް ބޭނުންވާ މީހުންގެ މަރުކަޒާއި ހަވާލުކޮށްދެއްވީ މިއަދު އިސްލާމިކް މިނިސްޓްރީގައި ބޭއްވުނު ރަސްމިއްޔާތެއްގައި ޑރ. މުހައްމަދު ޝަހީމް އަލީ ސައީދުއެވެ. މި އެނދތަކުގެ ވައުޗައއާއި ހަވާލުވެވަޑައިގެންނެވީ އިޖުތިމާއީ އަދި ޢާއިލީ ތަރައްގީއާ ބެހޭ ވަޒީރު ޑރ. އައިޝަތު ޝިހާމްއެވެ.
މި ރަސްމިއްޔާތުގައި ޑރ. ޝަހީމް ދެއްކެވި ވާހަކަފުޅުގައި ވިދާޅުވީ، މިއަދު ހަދިޔާ ކުރެވުނު އެނދުތަކަކީ ޒަމާނީ އެނދުތައް ކަމަށާއި، އިހުސާންތެރި ކަމަކީ އިސްލާމް ދީނުގައި ވަރަށްބޮޑަށް ބާރު އަޅުއްވާފައިވާ ކަމެއް ކަމުގައެވެ.
އަދި ނިކަމެތިންނަށް އިހުސާންތެރިކޮށް ހިތުމާއި ފަޤީރުންނަށާއި މިސްކީނުންނަށް އަޅައިލުމަކީ ރައީސް މުއިއްޒު ވަރަށް ބޮޑު ސަމާލުކަމެއް ދެއްވާކަަމެއް ކަމުގައިވެސް ޑރ. ޝަހީމް ވިދާޅުވިއެވެ. އަދި އޭނާ ވިދާޅުވީ ޚާއްސަ އެހީއަށް ބޭނުންވާ ފަރާތްތަކަށް އެހީތެރިކަން ފޯރުކޮށް ދިނުމަކީ އިސްލާމީ މުޖުތަމައުގެ ރިވެތި އަޚްލާގުގެ ތެރޭގައި ހިމެނޭ ކަމެއްކަމުގައެވެސް މެއެވެ.
އިސްލާމިކް މިނިސްޓްރީއަށް ވަރަށް ގިނަ ރައްޔިތުން އެމީހުންގެ ޚައިރާރު ފައިސާ ޙަވާލު ކުރޭ. މިސްކިތްތަކުގެ މަރާމާތަށް، ނުވަތަ ދީނީ ކަމަކަށް އެހީވުމަށް. މިއީ ޒަކާތު ފަންޑުގެ އިތުރުން މިސްކިތްތަކާ ޢާއްމު ހެޔޮ ކަންކަމަށް ޚަރަދުކުރުމަށް ރައްޔިތުން ހަދިޔާކުރާ ޞަދަޤާތް. ޚާއްޞަ އެހީއަށް ބޭނުންވާ މީހުންގެ މަރުކަޒަށް މިއަދު އެހީތެރިކަން ދެވިގެން މިދަނީ މިދެންނެވި ޚައިރާތިގެ ތެރެއިން.
މިއަދުގެ ރަސްމިއްޔާތުގައި ވާހަކަ ދައްކަވަމުން ޑރ. ޝަހީމް ވިދާޅުވިއެވެ.
މިއަދު ޚާއްސަ އެހީއަށް ބޭނުންވާ މީހުންގެ މަރުކަޒަށް ހަދިޔާކުރި އެނދުތަކަށް ފަސްލައްކަ ހަތަރު ހާސް ރުފިޔާ އަރައެވެ.
