ޕީޕަލްސް ނެޝަނަލް ފްރަންޓް (ޕީއެންއެފް) އުފެއްދެވުމުގައި އެންމެ އިސްކޮށް މަސައްކަތް ކުރައްވަމުން ގެންދަވާ އަދި ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން ޕީއެންއެފް ޖަލްސާގައި ބައިވެރިވެވަޑައިގެން ސުވާލު ކުރެއްވި މައްސަލަ މީޑިއާގެ ސަމާލުކަމަށް އައިސްފިއެވެ.
ރައީސް ޔާމީން ގޭބަންދަށް ބަދަލުކުރެއްވިފަހުން ގެންދަވަނީ ސިޔާސީ ހަރަކާތްތަކުގައި ބައިވެރިވެވަޑައިގަންނަވަމުންނެވެ. އެގޮތުން މިރޭ ޕީއެންއެފްގައި ބޭއްވި ޖަލްސާގައި ވެސް އެމަނިކުފާނު ބައިވެރިވެވަޑައިގެންނެވިއެވެ. އެކަމަކު، ކުރީގެ ޖަލްސާތަކާ ހިލާފަށް މިފަހަރުގެ ޖަލްސާގައި ޔާމީންގެ ފަރާތުން ފެނުނު މަންޒަރު ތަފާތެވެ. މީގެކުރިން ބޭއްވި ދެތިން ޖަލްސާއެއްގައި އެމަނިކުފާނު އިންނެވީ އަޑު އައްސަވާށެވެ. އެކަމަކު، މިރޭގެ ޖަލްސާގައި ޔާމީން އިންނެވީ ޕޯޑިއަމަށް އަރައި ވަޑައިގަންނަވާ ބޭފުޅުންނާ ސުވާލު ކުރައްވާށެވެ.
މިރޭގެ ޖަލްސާ ގައި މައިގަނޑު ގޮތެއް ގައި ވާހަކަ ދެއްކީ ޔާމީންގެ އެންޑޯޒްމަންޓާ އެކު ކުރިއަށް އޮތް 20 ވަނަ މަޖިލިހަށް ކުރިމަތިލާން ނިންމާފައިވާ ކެންޑިޑޭޓުންނެވެ. ރައީސް ޔާމީންގެ ސުވާލުތަކުގެ ތެރޭގައި ރާއްޖޭގެ ކަނޑުން ބައެއް ގެއްލިފައިވުމާ ގުޅިގެން އެ ބައި ހޯދަން މަސައްކަތް ކުރާނެތޯ ސުވާލު ކޮށްފައެވެ. އަދި ރާއްޖޭގައި އިންޑިއާ ސިފައިން ތިބޭތީ އެމީހުން ފޮނުވާލަން ކުރަން ޖެހޭ މަސައްކަތް ކުރާނެތޯ ސުވާލު ކުރިއެވެ.
މީގެއިތުރުން ވެސް ޔާމީން ވަނީ އެކިއެކި މައުޟޫއުތަކަށް ސުވާލު ކުރައްވައިފައެވެ. އެގޮތުން ރަމަޟާން މަހު އެކަށީގެންވާ ކެމްޕެއިނެއް ކުރެވޭނެތޯ އާއި ރަމަޟާން މަހު ވޯޓު ގިނަ ބަޔަކު ވޯޓުލާން ނެރެވޭނެތޯ ވެސް ސުވާލު ކުރައްވާފައިވެއެވެ.
މިރޭގެ ޖަލްސާ ގައި ކުރީގެ ނާއިބު ރައީސް ޑރ. ޖަމީލް ވާހަކަ ދެއްކެވި އިރު، އިންޑިއާ ސިފައިން ބޭލުމުގެ މައްސަލައާ ގުޅޭ ކަންބޮޑުވުންތަކާއި ގުޅޭ ގިނަ ސުވާލުތަކެއް އެމަނިކުފާނު ކުރެއްވިއެވެ.
ޖަލުތަކާއި ޕެރޯލްގެ ގާނޫނު ބުނާގޮތުން ސިޔާސީ ޕާޓީ އާއި ޖަމިއްޔާތަކަށް އާންމު މެންބަރެއްގެ ހައިސިއްޔަތުން ނިސްބަތްވުން ފިޔަވައި، އެއިން ތަނެއްގެ މަސްއޫލު ފަރާތެއްގެ ގޮތުގައި ހުރުމާއި އެ ތަންތަނުން ހިންގާ އެހެން ހަރަކާތްތަކުގައި ބައިވެރިވުމުގެ ހައްގު، ހުކުމެއް ތަންފީޒު ކުރުމަށްޓަކައި ޖަލުގައި ބަންދުކޮށްފައި ހުންނަ މުއްދަތުގައި ލިބިގެނެއްނުވެއެވެ.
ޔާމީން މީގެ ކުރިން ވެސް ތިން ފަހަރެއްގެ މަތިން ސިޔާސީ ކަންކަމުގައި ބައިވެރިވެވަޑައިގެންނެވި މައްސަލައެއް ކަރެކްޝަނުން ބެލި ނަމަވެސް އެއްވެސް ފިޔަވަޅެއް ނާޅައެވެ. ޔާމީނަށް ދިން ލުއިތަކުގެ ތެރޭގައި ކަސްރަތު ކުރެއްވުމަށް ބޭރަށް ނުކުންނެވުމާއި ބޭސްފަރުވާ ކުރަން ބޭރަށް ނުކުންނެވުމުގެ އިތުރުން މުހިންމު މީހުންނާ ބައްދަލު ކުރެއްވުމުގެ ފުރުސަތު ހިމެނެއެވެ.
