ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ދޫކުރައްވައި ކުރީގެ ރައީސް ޔާމީން އުފައްދަވާ އައު ޕާޓީ ”ޕީޕަލްސް ނެޝަނަލް ފްރަންޓް“ ރަޖިސްޓްރީ ކުރުމަށް ހުށަހަޅާނީ ރައީސް ޔާމިން މިނިވަން ވުމުންކަމަށް އެޕާޓީން ނިންމައިފިއެވެ.
މިކަން ހާމަކޮށްފައިވަނީ، ޕީއެންއެފް ރަޖިސްޓްރީ ކުރުމުގައި އިސްކޮށް އުޅުއްވާ ކުރީގެ މިނިސްޓރ މަލީހު ޖަމާލްއެވެ.
ބައެއް މީޑިއާތަކަށް މައުލޫމާތު ދެއްވަމުން މަލީހު ޖަމާލް ވިދާޅުވީ، ޕީއެންއެފް ރަޖިސްޓްރީ ކުރުމަށް ބޭނުންވާ ސޮއި މިހާރު ހުރީ ހަމަވެފައިކަމަށާއި، އެހެންނަމަވެސް އެޕާޓީ ރައީސް ޔާމިން މިނިވަން ވުމުގެ ކުރިން ޕާޓީ ރަޖިސްޓްރީ ކޮށްފިނަމަ އެޕާޓީގެ އެއްވެސް މަގާމަކަށް ވާދަކުރުމުގެ ފުރުސަތު ރައީސް ޔާމިންއަށް ލިބިގެން ނުދާނެކަމުގައެވެ.
މަލީހު ވިދާޅުވީ ޕާޓީ ރަޖިސްޓްރީ ކުރުމަށް ބާއްވަންޖެހޭ ޖަލްސާ ބޭއްވުމުގެ ހުރިހާ ތައްޔާރީތަކެއް މިހާރު ވެ ނިމިފައި ވާކަމުގައެވެ.
މަލީހު އިތުރަސް ވިދާޅުވެފައިވާ ގޮތުގައި ޕީއެންއެފް ރަޖިސްޓްރީ ނުކުރި ނަމަވެސް އެޕާޓީގެ ފަރާތުން ކުރިޔަށް އޮތް ރައްޔުތުންގެ މަޖިލިހަށް ވާދަކުރުމާއި ގުޅޭގޮތުން މިހާރު މަޝްވަރާތައް ކުރެވެމުންދާކަމުގަައެވެ.
