ފީފާއިން ހޮވާ ދުނިޔޭގެ އެންމެ މޮޅު ކުޅުންތެރިޔާގެ އެވޯޑް ހައްގު ވަނީ، ބަޔާން މިޔުނިކްގެ ފޯވަޑް ރޮބަޓް ލެވަންޑޮސްކީއަށް ކަމަށް، އެ ޓީމުގެ ކޯޗް ހެންސް ފްލިކް ބުނެފި އެވެ.
ދުނިޔޭގެ މޮޅު ކުޅުންތެރިޔާ ހޮވުމަށް ބާއްވާ އެވޯޑްގެ ގަދަ ތިނަކަށް ނޮމިނޭޓް ވެފައި ވަނީ، ލެވަންޑޮސްކީގެ އިތުރުން، ބާސެލޯނާގެ ލިއޮނެލް މެސީ، ޔުވެންޓަސްގެ ކްރިސްޓިއާނޯ ރޮނާލްޑޯ އެވެ. މިދިޔަ ސީޒަންގައި ބަޔާން އިން ސީޒަންގެ ތިން ތަށި ހޯދިއިރު ލެވަންޑޮސްކީ ވަނީ މުހިންމު ދައުރެއް އަދާ ކޮށްފަ އެވެ. މި ސީޒަނަކީ ލެވަންޑޮސްކީ އަށް އެވޯޑް ހައްގު ސީޒަނެއް ކަމަށާއި ކުލަބުގެ އެންމެން އުންމީދު ކުރަމުންދަނީ މިއަހަރުގެ އެވޯޑް އޭނާއަށް ލިބުމަށް ކަމަށް އަދި އޭނާ އަށް އެވޯޑް ހައްގުކަމަށް ފްލިކް ބުނިއެވެ.
ދަ ބެސްޓް ފީފާ ފުޓްބޯލް އެވޯޑްސް ފެށުމަށްފަހު ފީފާއިން ގެނައި އެންމެ ބޮޑު ބަދަލަކީ ސަޕޯޓަރުންނަށް ވޯޓު ލެވޭ ގޮތް ހެދުމެވެ. ސަޕޯޓަރުންގެ ވޯޓު ނަގާނީ މުޅި ދުނިޔެއިން ހޮވާލެވޭ 200 މީޑިއާއެއްގައި ސެޓް ކުރާ ވޯޓިން ޕޯލްތަކުންނެވެ. ފީފާގެ އެވޯޑުގައި ދެން ވޯޓު ލާނީ ގައުމީ ޓީމުތަކުގެ ކޯޗުންނާއި ކެޕްޓަނުންގެ އިތުރުން ހޮވާލެވޭ ނޫސްވެރިންނެވެ.
ދަ ބެސްޓް ފީފާ ފުޓްބޯލް އެވޯޑްސް ދޭން ފެށީ 2016 ވަނަ އަހަރު އެވެ. އޭގެ ކުރިން ވެސް ފީފާ މޮޅު ކުޅުންތެރިޔާގެ އެވޯޑް ދެމުން އައި ނަމަވެސް، 2010ން 2015ށް ފީފާއިން އެވޯޑް ދިނީ ފްރާންސް ފުޓްބޯލް މަޖައްލާއިން ދޭ ބަލޮންޑޯ އެވޯޑާ ގުޅިގެންނެވެ. މި އަހަރުގެ ބަލޮންޑޯ އެވޯޑް ވަނީ ކެންސަލް ކޮށްފައެވެ.
ފީފާގެ ދަ ބެސްޓް އެވޯޑް ހާސިލު ކުރާ ކުޅުންތެރިޔާ ހޮވާނީ ބުރާސްފަތި ދުވަހު އެވެ.
ކޮމެންޓު ފޮނުވާ