މާލޭގެ މޭޔަރު އިންތިޚާބު ކުރުމަށް މިއަދު ބޭއްވުނު ބައި-އިލެކްޝަން، އިނދިކޮޅު އެމްޑީޕީގެ ކެނޑިޑޭޓް އާދަމް އާޒިމް ކާމިޔާބު ކުރެއްވުމާއި ގުޅިގެން، އޭނާއާއި އެންމެ ގާތުން ވާދުކުރި ޕީއެންސީގެ ކެނޑިޑޭޓް އާޒިމާ ޝަކޫރު ބަލި ގަބޫލުކޮށް އާދަމް އާޒިމަށް މަރުހަބާ ވިދާޅުވެއްޖެއެވެ.
އާޒިމާގެ ޓުވީޓުގައި އޭނާ ވިދާޅުވެފައިވަނީ، ޕާޓީ ފިކުރުން އެއްކިބާވެހުރެ، މާލޭގެ ރައްޔިތުންނަށް ފޯރުކޮށްދޭ ކޮންމެ ޚިދުމަތަކަށް އެއްބާރުލުން ދެއްވާނެ ކަމުއެވެ.
I congratulate Mayor Elect @adamazim for his win, and pledged my support for all services that will benefit the citizens of Male' without any difference to party or affiliation.
— AzimaShakoor (@aminadhis) January 13, 2024
މާލޭގެ މޭޔަރު އިންތިޚާބު ކުރުމަށް މިއަދު ބޭއްވުނު ބައި-އިލެކްޝަން، ވެރިކަންކުރާ ޕީއެންސީގެ ކެނޑިޑޭޓް އާޒިމާ ޝަކޫރު ބަލިކޮށް، އިނދިކޮޅު އެމްޑީޕީގެ ކެނޑިޑޭޓް އާދަމް އާޒިމް ކާމިޔާބު ކުރެއްވީ ބޮޑު ތަފާތަކުންނެވެ.
މިހާތަނަށް އާންމުކޮށްފައިވާ ވޯޓު ފޮށިތަކުގެ ވަގުތީ ނަތީޖާތައް ދައްކާ ގޮތުގައި، އާދަމް އާޒިމަށް ވަނީ 7،415 ވޯޓު ލިބިވަޑައިގެންފައެވެ. އޭނާއާ އެންމެ ވާދަކުރެއްވީ ޕީއެންސީގެ ކެންޑިޑޭޓު އަދި ކުރީގެ ބަންޑާރަ ނައިބު އައިޝަތު އާޒިމާ ޝަކޫރެވެ. އާޒިމާ އަށް 4،925 ވޯޓު ލިބިވަޑައިގެންފައިވެއެވެ.
ތިން ވަނައިގައި އުޅުއްވަނީ ދަ ޑިމޮކްރެޓްސްގެ ކެންޑިޑޭޓު މުހައްމަދު ސައިފް ފާތިހެވެ. އޭނާ އަށް 2،285 ވޯޓު ލިބިވަޑައިގެންފައިވާ އިރު، ހަތަރު ވަނައިގައި އުޅެނީ އަމިއްލަ ގޮތުން ވާދަކުރައްވާ އަދި ކުރީގެ ރައީސް ޔާމީންގެ ތާއީދާ އެކުގައި ބައި އިލެކްޝަންގައި ވާދަކުރެއްވި ހުސެއިން ވަހީދެވެ. އޭނާ އަށް ލިބިވަޑައިގަތީ 1،821 ވޯޓެވެ. އަދި ފަސް ވަނަ އަށް ދިޔައީ އަމިއްލަ ގޮތުން ވާދަކުރައްވާ ޝުއައިބު އަލީއެވެ. އޭނާ އަށް ލިބިވަޑައިގަތީ 117 ވޯޓެވެ.
