މާލެއަށް މިއަދު ބޯކަށް ވާރޭވެހި، ފެންބޮޑުވެ ގެއްލުން ލިބުނު ބައެއް ގެތަލުގެ ހާލަތު ނައިބި ރައީސް ބައްލަވާލައްވައިފިއެވެ.

އެގޮތުން ނައިބު ރައީސް ވަނީ ފެންބޮޑުވެފައިވާ ގެތަކަށް ޒިޔާރަތްކޮށް، ގެތަކުގެ މީހުންނާ ބައްދަލުކޮށް ހާލު ބައްލަވާލައްވާފައެވެ. އަދި މާލޭގައި ފެންބޮޑުވުމާ ގުޅިގެން ކުރިމަތިވެފައިވާ ދަތިތައް ހައްލު ކުރުމަށް ފުލުހުންނާއި ސިފައިން އަދި އާންމުން ގުޅިގެން ކުރަމުންދާ މަސައްކަތްތަކުގައި އަމަލީ ގޮތުން ނައިބު ރައީސް ބައިވެރިވެވަޑައިގެންނެވިއެވެ.

ނައިބު ރައީސްގެ އަރިހުގައި ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން އާއި ޕޮލިސް ކޮމިޝަނަރު އަލީ ޝުޖާއު ވެސް ވަނީ ފެން ބޮޑުވެފައިވާ މަގުތަކަށާއި ބައެއް ގެތަކަށް ޒިޔާރަތް ކުރައްވައިފައެވެ.

މާލެއަށް މިއަދު ހެނދުނުއްސުރެ ވެހުނު ވާރެއާއެކު އަނެއްކާވެސް އަލަށް ހެދި އަމީނީ މަގުގައިވެސް ވަނީ ފެންބޮޑު ވެފައެވެ.

މީގެ ހަފްތާއެއް ކުރިންވެސް މާލޭއަސް ބޯކަށް ވާރޭވެހި މުޅި މާލޭގައި ފެންބޮޑު ވެފައިވަނިކޮށް މިއަދު ހެނދުނުއްސުރެ މާލެއަށް ވެހުނު ބޯ ވާރެއާއެކު ދުއްވާ އެއްޗިއްސަށް އުދަގޫވާވަރަށް އަމީނީ މަގުގައި ވަނީ ފެން ބޮޑުވެފައެވެ. އޭގެ އިތުރުން މާފަންނު ކަނބާ އައިސަރަނި ހިނގުމުގައިވެސް ވަނީ  ދަތުރުފަތުރު ކުރަން އުދަނގޫވާރަށް ފެންބޮޑު ވެފައެވެ.

އަމީނީ މަގުގައި ފެންބޮޑުވާ މައްސަލަ ހައްލުކުރުމަށް، ބޮޑު ޚަރަދެއް ކޮށްގެން އެމަގު ހަދަން ފަށާފައިވަނީ ކުރީ ސަރުކާރުންނެވެ. އެގޮތުން މުޅި އަމީނީ މަގުގައި މިހާރުވަނީ ތާރު އަޅާފައެވެ. އެހެންނަމަވެސް އަމީނީ މަގުގައި ތާރު އެޅިފަހުން އެމަގުވެސް ހިމެނޭ ގޮތުން މާލޭގެ އެހެން މަގުތަކުގައިވެސް ފެންބޮޑުވުމުގެ މައްސަލަ ވަނީ ކުރިއަށްވުރެ ބޮޑުވެފައެވެ.

ބައެއް ތަޖުރިބާކާރުން ވިދާޅުވަނީ މާލޭގެ އެހެން މަގުތަކުގައި ކުރިއަށްވުރެ ބޮޑަށް ފެންބޮޑުވަމުންދަނީ އަމީނީ މަގު ހަދާފައިވާ ގޮތުގެ ސަބަބުން ކަމުގައެވެ.