ވިއްސާރާގައި ފެން ބޮޑުވެގެން ރިޕޯޓު ކޮށްފައިވަނީ މާލޭގެ އިތުރުން 4 ރަށަކުން ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިރޭ ވިދާޅުވެއްޖެއެވެ.
އެ ރަށްތަކަކީ މާލޭގެ އިތުރުން ތ. ގުރައިދޫ، ތ. ދިޔަމިގިލި، ލ. މާމެންދޫ، ދ ކުޑަހުވަދޫއެވެ.
އެންޑީއެމްއޭ ކުރި އެކްސް ޕޯސްޓެއްގައި ވިދާޅުވެފައިވަނީ މާލޭގައި ފެންބޮޑުވެ އެހީއަށް އެދުނު 144 ގޭގެ ތެރެއިން 132 ގެއަކަށް މިހާތަނަށް އެހީތެރިކަން ފޯރުކޮށްދީފައިވާކަމަށެވެ.
އެންޑީއެމްއޭއިން ކުރި އެކްސް ޕޯސްޓުގައި އިތުރަށް ވިދާޅުވެފައިވަނީ، މިރޭގެ މިހާތަނަށް 91 ގެއެއްގައި ވަނީ ވެލިބަސްތާ ޖެއްސިފައި ވާއިރު، 8 ގެއެއްގެ 57 މީހުންނަށް ވަގުތީ ބޯހިޔާވަހިކަމާއި ކެއިން ބުއިން ހަމަޖައްސާފައިވާކަމުގައެވެ.
އެންޑީއެމްއޭއިން ބުނެފައިވަނީ އެންމެ ބޮޑަށް ގެއްލުން ލިބިފައިވަނީ މާލޭގެ ގެތަކަށް ކަމުގައެވެ.
އެމްއެންޑީއެފްއިން މިއަދު ވިދާޅުވެފައިވަނީ މާލެއަށް ބޯކޮށް ވާރޭވެހި، ފެންބޮޑުވުމާ ގުޅިގެން ފެން ހިންދުމަށް އެމްއެންޑީއެފުން މިއަދު ހެނދުނުން ފެށިގެން ކުރަމުންދާ މަސައްކަތުގައި މިހާތަނަށް 5393 ޓަނުގެ ފެން ވަނީ ޕަންޕު ބޭނުންކޮށްގެން ހިންދާފައިވާކަމަށެވެ.
