ޓޭބަލް ޓެނިސް އެސޯސިއޭޝް އޮފް މޯލްޑިވްސް އިންތިޒާމުކޮށްގެން ހުޅުމާލޭގައި އަލަށް ހުޅުވި ޓީޓީ ހޯލްގައި ޓީޓީ ކިޑްސް ކޭމްޕެއް އިއްޔެ ކުރިއަށް ގެންގޮސްފި އެވެ.
ޓީސީ އެސޯސިއޭޝަނާ ގުޅިގެން މި ހަރަކާތް ކުރިއަށްގެންދިޔައީ ސީނިއާ ކުޅުންތެރިންނެވެ. ޓީސީ އެސޯސިއޭޝަނުން ބުނީ މި އިވެންޓުގައި ވައިޑީޕީ އަދި ޖޫނިއާ އުމުރުފުރާތަކުގެ ގިނަ އަދަދެއްގެ ކުދިން ބައިވެރިވި ކަމަށެވެ. މި އިވެންޓުގެ އެންމެ ބޮޑު މަގްސަދަކީ އާންމުކޮށް އޮންނަ ފަރިތަކުރުންތަކުގެ އިތުރުން ހަގު އުމުރުފުރައިގެ ކުޅުންތެރިންނަށް ތަފާތު ގޮތަކަށް އެކިއެކި އޮބްސްޓަކަލް ގޭމްތަކާއި އެކު ޓީޓީގެ ހުނަރު އިތުރުކުރުމަށް ސީނިއާ ކުޅުންތެރިންނާއެކު އުފާވެރި ވަގުތުކޮޅެއް ހޭދަކުރުމުގެ ފުރުސަތު ފަހިކޮށްދިނުންކަމަށް ޓީޓީ އެސޯސިއޭޝަނުން ބުނެއެވެ.
މި އިވެންޓުގެ ހާއްސަ މެހެމާނެއްގެ ގޮތުގައި ކޮމިޝަނަރ އޮފް ސްޕޯޓްސް ހީނާ އަހުމަދު ސަލީމް ވަނީ ބައިވެރިވެވަޑައިގެންފަ އެވެ. އިވެންޓުގައި ބައިވެރިވި ކުދިންނާ މުހާތަބުކުރައްވާ ހީނާ ވަނީ ނަފްސުގެ މައްޗަށް އިތުބާރު ކުރުމަށާއި ހަމަޖައްސައިދެވޭ ފެސިލިޓީސްތަކުގެ ބޭނުން ހެޔޮގޮތުގައި ހިފުމަށް އެދި ބައިވެރިނަށް ނަސޭހަތްދެއްވައިފަ އެވެ. އަދި ގައުމަށް ރީތި ނަން ހޯދުމަށް ގަދައަޅައި މަސައްކަތް ކުރުމަށް ހުރިހާ ކުދިންނަށް ހިތްވަރުދެއްވިއެވެ.
އިވެންޓުގައި ވާހަކަދައްކަމުން ޓީޓީ އެސޯސިއޭޝަންގެ ނައިބު ރައީސް އިބްރާހީމް ޝިއުރީ ވަނީ އިވެންޓް ކުރިއަށް ގެންދިއުމަށް އިސްނެގީތީވެ ސީނިއާ ކުޅުންތެރިންނަށް ޝުކުރުއަދާކޮށްފަ އެވެ. އަދި، ކުރިއަށް އޮތްތަނުގައި މިފަދަ އިވެންޓްތައް ރޭވުމަށް ޝިއުރީ ހިތްވަރުދެއްވިއެވެ. އިވެންޓް ކާމިޔާބުކަމާ އެކު ފުރިހަމަކުރުމުގައި ބެލެނިވެރިންގެ ފަރާތުން ލިބުނު އެހީތެރިކަން ޝިއުރީ ވަނީ ފާހަގަކޮށްފައެވެ.
ކޮމެންޓު ފޮނުވާ