ރާއްޖޭގައި ބާއްވާ އިންތިޚާބުތަކާއި ދިމާކޮށް ވަޒީފާ ދިނުމާއި އަދި ދައުލަތުގެ މުދާ ނަހަމަ ގޮތުގައި ބޭނުންކުރުން ހުއްޓުމަކަށް ގެމައުން ގާނޫނެއް އެކުލަވާލުމަށް، ޔޫރަޕިއަން ޔޫނިއަން (އީޔޫ)ގެ ފަރާތުން ރިޔާސީ އިންތިޚާބު އޮބްޒާވްކުރި ޓީމުން ލަފާ ދީފިއެވެ.
ނިމިދިޔަ ރިޔާސީ އިންތިޚާބު އޮވްޒާވު ކުރުމަށްފަހު އިޔޫއިން އެކުލަވާލި ރިޕޯޓު މިއަދުވަނީ އާންމުކޮށްފައެވެ.
މި ރިޕޯޓުގައި އީޔޫއިން ބުނެފައިވަނީ ރިޔާސީ އިންތިޚާބާއި ދިމާކޮށް ވަޒީފާތައް ދިނުމާއި، ތަރައްގީގެ މަޝްރޫއުތައް އިންތިޚާބާއި ދިމާކޮށް ފެށުމުގެ އިތުރުން، ދައުލަތުގެ މުދަލާއި ކުންފުނިތަކިގެ ބޭނުންވެސް ނަހަމަ ގޮތުގައި ފުޅާ ދާއިރާއެއްގައި ބޭނުން ކޮށްފައިވާކަމުގައެވެ.
މިކަންކަން ހުއްޓުވުމަށާއި، އަދި އިންތިޚާބުތަކުގައި ދައުލަތުގެ ކުންފުނިތައް ސިޔާސީ ގޮތުން ބޭނުންކުރުން ހުއްޓުމަށް އީޔޫގެ އޮބްޒާވަރުންގެ ޓީމުން އަރުވާފައިވާ ލަފައަކީ މިކަންކަމަށް ޚާއްސަކުރެވޭ ބަވާއިދެއް އެކުލަވާލުމެވެ.
އެފަދަ ގަވާއިދެއްގެ ސަބަބުން ކޮރަޕްޝަން މަދުވެ، ދެފުށްފެންނަ އިންތިޚާބުތައް ބޭއްވުމަށް މަގުފަހިވެގެންދާނެކަން އީޔޫއިން ބުނެފައި ވެއެވެ.
އިންތިޚާބުތައް މިނިވަންކުރުމަށް އީޔޫއިން ދީފައިވާ ބައެއް ލަފާތައް:
- އިންތިޚާބުތަކާ ގުޅޭ އާންމު ގަވާއިދެއް އެކުލަވައިލާ، ހުރިހާ އިންތިޚާބަކަށް އެ ގަވާއިދު ބޭނުންކުރުން
- އާންމުންނާއެކު އޮންނަ ގުޅުން ވަރުގަދަ ކޮށް ދެފުށް ފެންނަ އިންތިޚާބަކަށް ހެދުމަށް ޓަކައި ސިޔާސީ ޕާޓީތަކާއެކު ގަވައިދުން ބައްދަލުވުންތައް ބާއްވާ މި ބައްދަލުވުންތަކުގައި އާންމުން ވެސް ހިމެނުން
- އޮފިޝަލުންގެ މެދުގައި މައުލޫމާތު މުއްސަނދި ކުރުމަށާއި ވޯޓުލުމުގެ މަރުހަލާ ކުރިއަށް ދާގޮތް ރަނގަޅަށް އޮޅުންފިލުވައިދިނުމަށް އިންތިޚާބުގެ ހުރިހާ މަރުހަލާއެއްގައި އަމަލު ކުރާނެ ގޮތް ލިޔުމެއްގެ ސިފައިގައި ފެންނަ ގޮތަށް ބޭއްވުން
- އާންމުންގެ މެދުގައި ވޯޓާ އެޑިއުކޭޝަން އިތުރުކުރުމަށް ގަވާއިދުން ޕްރޮގްރާމަތަކެއް ގައުމީ ފެންވަރުގައި އަބަދުވެސް ކުރިއަށް ގެންދިއުން. ވޯޓު ވިއްކުމާއި ގަތުމުގެ އަމަލުތައް ހަރުދަނާ ގޮތެއްގައި ބެލެހެއްޓުން
- ސިޔާސީ ޕާޓީތަކާއި ރިޔާސީ ކެންޑިޑޭޓުން ޖަވާބުދާރީ ކުރުވުމަށް ކެމްޕެއިން ފައިނޭންސާ ގުޅޭ ލީގަލް ފްރޭމްވޯކް ދިރާސާކޮށް ކަންކަން ފޫބެއްދުން.
- މޯލްޑިވްސް ބްރޯޑްކާސްޓިން ކޮމިޝަންގެ ކެޕޭސިޓީ ހުރި މިންވަރަކުން ކެމްޕެއިން ކަވަރޭޖް ގަވާއިދަށް ފެއްތުމަށް ޓްރެއިނިން ދީ، މޮނިޓާކޮށް، މަސައްކަތް ކުރުން
- އެޑިޓޯރިއަލްތަކާއި، ފައިސާއަށް އަދި ހިލޭ ހަދައިދޭ ކޮންޓެންޓް އެންގުމަށް ފްރޭމްވޯކެއް އެކުލަވައިލާ، ދައުލަތުގެ މީޑިއާ މެދުވެރިކޮށް ސަރުކާރު ހިއްސަވާ ޕާޓީގެ ސިޔާސީ ހަރަކާތްތައް ކަވަރުކުރުން ހުއްޓުވުން.
- ނޫސްވެރިންނަށް ޓްރެއިނިން ދިނުމާއި ޕްރޮފެޝަނަލް ޑިވެލޮޕްމަންޓް ކޯސްތައް ހިންގުން އަދި އިންތިޚާބު ތެރޭ މެދު މިންގަނޑެއްގައި ކަންކަން ކަވަރުކުރުމަށް ބުނެދިނުން.
- ސޯޝަލް މީޑިއާގައި ކެމްޕެއިން ކުރާއިރު އެލެކްޓޯރިއަލް ލީގަލް ފްރޭމްވޯކާ އެއްގޮތަށް ކަންކަން ގެންދިއުން އަދި މި ކަން ތަންފީޒުކުރުމުގެ ބާރު މޯލްޑިވްސް މީޑިއާ ކައުންސިލަށް ދިނުން.
- ނުރަނގަޅު މައުލޫމާތު ފެތުރުން ހުއްޓުމަށް ޓަކައި އާންމުންގެ މެދުގައި ފެކްޓްޗެކް ކުރުން ހިތްވަރު ދިނުން.
- އާންމުންގެ މައުލޫމަތު ރައްކާތެރި ކުރުމަށް ގަވައިދެއް އުފައްދައި އެ ގަވާއިދު ރަނގަޅަށް ތަންފީޒުވޭތޯ ބެލުން
އިންތިޚާބުގައި ސިޔާސީ ނުފޫޒު ފޯރުވާފައިވާކަމަށް އީޔޫއުން ބުނެފައިވި ނަމަވެސް އިންތިޚާބު ބޭއްވީ މިނިވަންކަމާއެކު ކަމަށް ފާހަގަކޮށް، އީޔޫން ތައުރީފް ކޮށްފައި ވެއެވެ.
