ފ. ނިލަންދޫގެ ބިން ހިއްކުމުގެ ސާވޭ އާއި އެންވަޔަރަމަންޓަލް އިމްޕެކްޓް އެސެސްމަންޓް (އީއައިއޭ) ގެ މަސައްކަތް ކުރުމަށް އެމްޓީސީސީއާ މިއަދު ހަވާލުކޮށްފިއެވެ.
ދިވެހިރާއްޖޭގެ އަޑުގެ ސެނެކޯ މާލަމުގައި މިއަދު ބޭއްވި ނޫސްވެރިންގެ ބައްދަލުވުމުގައި ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރު ޑރ. އަބްދުﷲ މުއްތަލިބް ވިދާޅުވީ އެއާޕޯޓު އެޅުމުގެ މަސައްްކަތަށް ދާނެ ހަރަދެއް އެނގޭނީ އެއާޕޯޓަށް ބޭނުންވާ ބިން ހިއްކުމުގެ ކުރިން އެ ތަނުގެ ސާވޭއެއް ހަދާފައި ކަމަށެވެ.
"އަގެއް ހޯދުމުގެ ބޭނުމުގައި އަޅުގަނޑުމެން ފުރަތަމަ ކުރާ ކަމަކީ ސާވޭ ކުރުން. ހަމައެއާއެކީގައި އީއައިއޭ ހެދުން،" މުއްތަލިބް ވިދާޅުވިއެވެ.
މި ސާވޭ އާއި އީއައިއޭގެ މަސައްކަތް ހަވާލުކޮށްފައި ވަނީ 120 ދުވަހުގެ ތެރޭގައި ނިންމާ ގޮތަށެވެ. ސާވޭ އާއި އީއައިއޭގެ މަސައްކަތް އެއަށް ވުރެ އަވަހަށް ނިމިއްޖެ ކަމުގައިވާ ނަމަ، ކޮންޓްރެކްޓްގައި ސޮއިކޮށް އެ މަޝްރޫއުގެ އަމަލީ މަސައްކަތް ވަރަށް އަވަހަށް ފެށޭ ވަރު ވާނެ ކަމަށް އޭނާ ވިދާޅުވިއެވެ.
އެއާޕޯޓެއް އެޅުމަށް ސަރުކާރުން މަސައްކަތް ކުރަމުންދާ އިރު، އެ އަތޮޅުގައި އޮންނަ ފ. މަގޫދޫގައި ވެސް އެއާޕޯޓެއް އެޅުމުގެ މަސައްކަތް ދަނީ ކުރަމުންނެވެ.
މުއްތަލިބް ވިދާޅުވީ ނިލަންދޫގައި އެއާޕޯޓެއް އެޅުމުގެ މަސައްކަތަކީ ކުރީގެ ސަރުކާރުތަކުން ވެސް ޕްލޭންކޮށްފައި އޮތް ކަމެއް ކަމަށެވެ. ރާއްޖޭގެ އެކިކަންކޮޅުތަކުގައި ޓޫރިޒަމް ޒޯންތަކެއް ހެދިގެންދާ އިރު، އެއާޕޯޓުތައް ހެދިގެން މި އަންނަނީ ވަކި ގޮތަކަށް ރަށުގެ ރައްޔިތުންނާއި އަތޮޅުގެ އެހެން ކަންކަމަށް ބެލުމަށް ފަހުގައި ކަމަށް އޭނާ ވިދާޅުވިއެވެ.
