އިސްލާމީ މިނިސްޓްރީން އުފައްދާ ދީނީ ޗެނަލް "ނޫރު ޓީވީ" މި ޖެނުއަރީގައި ފަށާނެ ކަމަށް އިސްލާމިކް މިނިސްޓަރ ޑރ. މުހައްމަދު ޝަހީމު އަލީ ސައީދު ވިދާޅުވެއްޖެއެވެ.
މީގެ ކުރިން އިސްލާމިކް މިނިސްޓްރީން ބުނެފައިވަނީ މި ދީނީ ޗެނެލް މި މަހުގެ 25 ގައި ލޯންޗް ކުރާނެ ކަމަށެވެ.
އިސްލާމީ ޓީވީ ޗެނަލަކަށް ކިޔަން ރީތި ނަމެއް ހުށައަޅައި ދިނުމަށް ޑރ. ޝަހީމް އެދިވަޑައިގެންފައެވެ.
އިސްލާމީ ޓީވީ ޗެނަލެއް ހެދުމަކީ ރައީސް މުއިއްޒުގެ ރިޔާސީ ވައުދުތަކުގެ ތެރޭގައި ހިމެނޭ ކަމަކެވެ.
މައުލޫމާތު ލިބިފައިވާ ގޮތުގައި، އިސްލާމިކް މިނިސްޓްރީ ގައި ސްޓޫޑިއޯ އެއް ޤާއިމުކޮށް ދީނީ ޕްރަގްރާމްތައް އުފެއްދުމުގެ މަސައްކަތް މިހާރު ގެންދަނީ ކުރައްވަމުންނެވެ. މި މަސައްކަތާއި ގުޅޭގޮތުން އިސްލާމިކް މިނިސްޓަރުވަނީ ބައެއް ފަރާތްތަކާއި މަޝްރަވާކޮށް ޚިޔާލުވެސް ހޯއްދަވާފައެވެ.
ދީނީ ޗެނަލްއަށް ކިޔާނެ ނަމެެއް ހޯދުމަށް ޝަހީމުގެ ފޭސްބުކްގައި ޕޯސްޓު ކުރުމުން ގިނަ ބަޔަކުވަނީ ޚިޔާލުތައް ހިއްސާ ކޮށްފައެވެ.
އިސްލާމިކް މިނިސްޓްރީން މި އަހަރު ތެރޭގައި ކުރުމަށް ރާވާފައިވާ އިތުރު ކަންކަމުގެ ތެރޭގައި، ޒަކާތު ހައުސް އިފްތިތާހު ކުރުމާއި، އިސްލާމީ ދައުވަތުގެ 2024 ވަނަ އަހަރުގެ ޕްލޭން އިފްތިތާހު ކުރުމާއި، އަތޮޅު ވަގްފު މަޝްރޫއު އިއުލާންކުރުމާއި، ސައުދީ އަރަބިއްޔާއާ އެކު ހައްޖާއި އުމްރާގެ ހިދުމަތުގެ އެއްބަސްވުމުގައި ސޮއިކުރުން ހިމެނެއެވެ.
