އެމެރިކާއިން ކަޑައަޅާފައިވާ، ޓެރަރިޒަމަށް ހިތްވަރުދޭ ގައުމުތަކުގެ ލިސްޓުން ސޫދާން ރަސްމީކޮށް އުނިކޮށްފިއެވެ.
ސޫދާން މިލިސްޓުން އުނިކޮށްފައި މިވަނީ، އެމެރިކާއިން ކަޑައަޅާފައި އޮންނަ ބްލެކްލިސްޓުގައި ސޫދާންގެ ނަން ހިމެނިތާ 27 އަހަރު ފަހުންންނެވެ.
ސޫދާން މި ލިސްޓުން އުނިކުރެވިފައިވާކަން އިއުލާން ކޮށްފައިވަނީ، ސޫދާންގެ ވެރިރަށް ޙަރުތޫމުގައި ހުންނަ އެމެރިކާގެ އެމްބަސީންނެވެ. ސޫދާން މިލިސްޓުން ރަސްމީކޮށް އުނިވެގެންދިޔައީ ހޯމަ ދުވަހުން ފެށިގެންނެވެ.
"ކޮންގްރެސްއިން އަރުވާފައިވާ 45 ދުވަހުގެ މުއްދަތު ފަހަނަ އަޅުމާއެކު، ސެކެޓްރީ އޮފް ސްޓޭޓު މިހާރުވަނީ، ސްޓޭޓް އޮފް ޓެރަރިޒަމް ސްޕޮންސާސްގެ ލިސްޓުން ސޫދާން އުނިކުރުމުގެ ނޯޓިފިކޭޝަންގައި ސޮއިކޮށްފަ. އަދި ފެޑެރަލް ރެޖިސްޓަރގައި ހިމެނުމަށްޓަކާ، ޑިސެމްބަރ 14 ވަނަ ދުވަހުން ފެށިގެން ސޫދާންގެ ނަންވަނީ މިލިސްޓުން އުނި ކުރެވިފަ،" ޔޫއެސް އެމްބަސީގެ ފޭސްބުކުގައި ލިޔެފައި ވެއެވެ.
އެމެރިކާގެ ޓެރަރިޒަމަށް ހިތްވަރުދޭ ގައުމުގެ ތަކުގެ ލިސްޓުން ސޫދާންގެ ނަން އުނިކުރުމަކީ، އެގައުމުގެ ކުރީގެ ރައީސް އުމަރު އަލް-ބަޝީރު ވެރިކަމުން ދުރުކުރުމަށްފަހު ވެރިކަމަށް އައި، އަދި މިހާރުގެ އިންތިގާލީ ސަރުކާރުގެ ވަރަށް ބޮޑު އުއްމީދެކެވެ. އުމަރު އަލް-ބަޝީރުގެ ވެރިކަން ނިމުމަކަށް އައީ، އެތަކެއް ދުވަހެއް ވަންދެން އޭނާގެ ވެރިކަމާ ދެކޮޅަށް ސޫދާންގައި ކުރިޔަށް ދިޔަ މުޒާހިރާތަކަށް ފަހުގައެވެ.
އެމެރިކާއިން އެންމެ ފުރަތަމަ ސޫދާން ޓެރަރިޒަމަށް ވާގިވެރިވާ ގައުމުތަކުގެ ލިސްޓުގައި ހިމަނާފައިވަނީ، އެގައުމުގެ ސަރުކާރުން އުސާމާބިން ލާދިންއަށް ހިމާޔަތް ދެމުންދާކަމަށް ތުހުމަތުކޮށް 1993 ވަނަ އަހަރުއެވެ. އެއީ އެގައުމުގެ ވެރިކަމާ ކުރީގެ ރައީސް އަލް ބަޝީރު ހަވާލުވެވަޑައިގަތްތާ 4 އަހަރު ފަހުންނެވެ. އަދި އެމެރިކާއިން ވަނީ ސޫދާންއިން އަލްގައިދާއަށް މާލީ ގޮތުންނާއި އަދި އެނޫން ގޮތްގޮތުންވެސް އެހީތެރިކަން ފޯރުކޮށްދެމުންދާ ކަމަށް ތުހުމަތު ކޮށްފައެވެ. މީގެއިތުރުން އަލްގައިދާއިން، 1998 ވަނަ އަހަރު ޓެންޒޭނިޔާގެ ދާރުއްސަލާމްގައި ހުންނަ އެމެރިކާގެ އެމްބަސީގައި ބޮންގޮއްވާލި ހާދިސާއަށާއި އަދި މީގެ އިތުރުން 2000 ވަނަ އަހަރު ޔަމަނުގެ އަދަނުގައި ބަދަރުކޮށްފައި އޮތް އެމެރިކާގެ ހަގުރާމަމަތީ މަނަވަރު ޔޫއެސްއެސް ކޯލްއަށް ހަމަލާދިނުމަށް ސޫދާނުގެ އޭރުގެ ސަރުކާރުން އެހީތެރިކަން ފޯރުކޮށްދީފައި ވާކަމަށްވެސް އެމެރިކާގެ ސަރުކާރުން ތުހުމަތު ކުރެއެވެ.
ސޫދާނާއި ދެކޮޅަށް އެމެރިކާއިން އަޅާފައިވާ އިގްތިސާދީ ދަތިކުރުމުގެ ފިޔަވަޅުތަކަށް އެމެރިކާގެ ކުރީގެ ރައީސް ބަރަކް އޮބާމާ ވަނިީ އެމަނިކްފާނުގެ ވެރިކަމުގެ އެންމެ ފަހު ހަފްތާގައި 2017 ވަނަ އަހަރު ލުއިތަކެއް ދެއްވާފައެވެ.
މިދިޔަ އޮކްޓޯބަރު މަހު އެމެރިކާގެ ރައީސް ޓްރަމްޕަ ވިދާޅުވެފައިވަނީ، ހަރުދަނާ ފިޔަވަޅުތަކެއް އަޅަމުންދާ ސޫދާންގެ މިހާރުގެ ސަރުކާރުން އެމެރިކާގެ ޓެރަރިޒަމްގެ ޝިކާރައަކަށް ވެފައިވާ ފަރާތްތަކަށާއި އާއިލާތަކަށް 333 މިލިއަން ޑޮލަރު ދެއްކުމަށް އެއްބަސް ވެފައިވާ ކަމަށާއި، މިފައިސާ ޑިޕޮސިޓް ކުރުމާއިއެކު، ބަދަލެއްގެ ގޮތުން ސޫދާންގެ ނަން ޓެރަރިޒަމަށް ހިތްވަރުދޭ ގައުމުތަކުގެ ލިސްޓުން އުނިކުރުމަށް ނިންމާފައި ވާކަމަށެވެ. އަދި މިއީ އިންސާފު ހޯދުމުގައި އެމެރިކާގެ ރައްޔިތުންނަށް ލިބިގެންދިޔަ ވަރަށް ބޮޑު ކާމިޔާބީއެއްގެ ގޮތުގައި ޓްރަމްޕް ސިފަކުރައްވާފައި ވެއެވެ. އަދި ވިދާޅުވެފައިވަނީ މިއީ ސޫދާނުން ކުރިޔަށް އެޅި ފިޔަވަޅެއް ކަމުގައެވެ.
ސޫދާން ޓެރަރިޒަމަށް ހިތްވަރުދޭ ގައުމުތަކުގެ ލިސްޓުން އުނިކުރުމަށް އެދި ޓްރަމްޕް އެގައުމުގެ ކޮންގްރެސަށް ނޯޓިސް ފޮނުވާފައިވަނީ، އޮކްޓޯބަރު މަހުގެ 26 ވަނަ ދުވަހުއެވެ. ޔޫއެސްގެ ގާނޫނުތައް ބުނާ ގޮތުން އެގައުމުގެ ރައީސް މި ނޯޓިސް ކޮންގްރެސްއަށް ފޮނުވާތާ 45 ދުވަހުގެ ތެރޭގައި ކޮންގްރެސްއިން މި ނޯޓިސްއާ ދެކޮޅު ނުހަދައިފިނަމަ، އެގައުމެއް ލިސްޓުން އުނިވެގެން ދާނެއެވެ. މި މުއްދަތުގެ ތެރޭގައި ކޮންގްރެސްއިން މި ހުށަހެޅުމާ ދެކޮޅު ހަދާފައެއް ނުވެއެވެ.
އެމެރިކާގެ ޓެރަރިޒަމަށް ހިތްވަރުދޭ ގައުމުގެ ލިސްޓުން ސޫދާން އުނިވެގެން ދިއުމުން، އެގައުމުން ދައްކަން ޖެހޭ ލޯނުތަކަށް ލުއި ލިބިގެން ދިއުމާއި، އަދި ދުނިޔޭގެ މާލީ އިދާރާތަކުން މާލީ އެހީތެރިކަން ލިބުމުގައިވެސް އެގައުމަށް އެތަކެއް ލުއި ފަސޭހަތަކެއް ލިބިގެން ދާނެއެބެ.
