ޓްރާންސްޕޯޓް މިނިސްޓްރީން ރައްޔިތުންނަށް ފޯރުކޮށްދެމުންދާ ހުރިހާ ޚިދުމަތެއް އެއް ޕޯޓަލްއަކުން ލިބޭނެ އިންތިޒާމު ހަމަޖައްސަމުންދާ ކަމަށް ޓްރާންސްޕޯޓު މިނިސްޓަރ މުހައްމަދު އަމީން ވިދާޅުވެއްޖެއެވެ.

މިނިސްޓަރ އަމީން މިކަން ހާމަކޮށްފައިވަނީ، އެމިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.

އަމީން ވިދާޅުވީ އެ މިނިސްޓްރީގެ އޮންލައިންކޮށް ފޯރުކޮށްދެމުންދާ ޚިދުމަތްތައް ތަފާތު ޕޯޓަލްތަކުން ފޯރުކޮށް ދެމުންދާތީ ރައްޔިތުންނަށް އުދަގޫތަކާ ކުރިމަތިވާ ކަމަށެވެ. މިގޮތުން މިހާރު ފަށާފައިވަނީ އެމައްސަލަ ހައްލުކުރުމުގެ މަސައްކަތްކަމަށް އޭނާ ވިދާޅުވިއެވެ.

މިނިސްޓްރީގެ ގިނަ ޚިދުމަތްތައް ތަފާތު ޕޯޓަލްއަކުން މަސައްކަތް ކުރަން ޖެހުނީމަ އެއީ އުދަގޫވާ ކަމެއްގެ ގޮތުގައި ފާހަގަވެފައި އޮންނާތީ، މިނިސްޓްރީގައި ހުރިހާ ޚިދުމަތަކަށް އެދިވަޑައިގަތަސް އެއް ޕޯޓަލްއެއްގެ ތެރެއިން އެކަންތައް ހަމަޖެއްސޭނެ އިންތިޒާމެއް އިރާދަކުރެއްވިއްޔާ ހަމަޖައްސަން މިހާރު ފަށައިފީމު.

މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ އެމިނިސްޓްރީގެ އަމާޒަކީ ކުރިއަށް އޮތް 3 މަސް ނުވަތަ 4 މަސްތެރޭ އެއް ޕޯޓަލްއަކު މިނިސްޓްރީގެ ޚިދުމަތައް ފޯރުކޮށްދޭން ފެށުން ކަމުގައެވެ. އޭނާ އިތުރަށް ވިދާޅުވީ ޓްރާންސްޕޯޓް މިނިސްޓްރީގެ ތަސައްވުރު ރަނގަޅު ކުރުމަށްޓަކައި މިނިސްޓްރީގެ އެތެރޭގެ ހިންގުމުގެ ނިޒާމު ރަގަޅުކުރުމުގެ މަސައްކަތްވެސް ފެށިފައިވާ ކަމުގައެވެ.

މިނިސްޓްރީގެ އިންތިޒާމްތައް ރަނގަޅުކުރަން ޖެހޭއިރުގައި އަޅުގަނޑުމެން މިހާރު ގެންނަން އެންމެ ފުރަތަމަ ބަދަލެއްގެ ގޮތުގައި އައިޓީ އަދި ޕީއާރު ސެކްޝަނެއް އުފައްދަން ޖެހޭ، އެ ސެކްޝަން މިހާރު އޮންނާނީ އުފެއްދިފައި.

މިނިސްޓަރ އަމީން ވިދާޅުވިއެވެ.