ރީ-އެކްސްޕޯޓު މިހާރަށްވުރެ ފުޅާކޮށް ސިނާޢަތެއްގެ ގޮތުގައި ކުރިއެރުވުމަށް ޚާއްސަ ކުންފުންޏެއް އުފައްދަވަން ސަރުކާރުން ނިންމައިފިއެވެ. މިގޮތަށް ނިންމީ މިދިޔަ އާދީއްތަ އާދިއްތަ ދުވަހު ބޭއްވެވި ކެބިނެޓް ބައްދަލުވުމުގައި މަޝްވަރާކުރެއްވުމަށްފަހުއެވެ.
ރީ އެކްސްޕޯޓަށް އުފައްދާ ކުންފުންޏަކީ "މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން" އެވެ. މި ކުންފުނި އުފެއްދެވިކަން އިކޮނޮމިކް މިނިސްޓަރު މުޙައްމަދު ސަޢީދު ވަނީ ޔަޤީންކޮށްދެއްވާފައެވެ.
މިނިސްޓަރ ސަޢީދު ވިދާޅުވީ، މިއީ ރާއްޖޭގެ އިޤްތިޞާދީ ރައްކާތެރިކަން ކަށަވަރުކުރުމާއި، ވެލިއު އެޑްކުރުމާއި، ޓްރާންޝިޕްމަންޓް އަދި ރީ-އެކްސްޕޯޓް ވިޔަފާރިއަށް ޚާއްސަކޮށް އުފައްދަވަން ނިންމަވާފައިވާ ކުންފުންޏެއްކަމަށެވެ. އަދި މި ކުންފުނި ވެގެންދާނީ %100 ދިވެހި ކުންފުންޏަކަށްކަމަށްވެސް ވަޒީރު ވިދާޅުވިއެވެ. ވަޒީރުގެ ޕޯސްޓުގައި މިފަދަ ނިންމެވުމެއް ނިންމެވިކަމަށްޓަކާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ވަނީ މަރުޙަބާ ވިދާޅުވެފައެވެ.
ރާއްޖެ ފަތުރުވެރިކަމަށް ބަރޯސާވެފައި އޮތްއޮތުން ނިމުމަކަށް ގެނެސް، އެހެން ސިނާއަތްތައް ފުޅާކުރެއްވުމަކީ ރައީސް ޑރ. މުޙައްމަދު މުޢިއްޒުގެ ސިޔާސަތެކެވެ. މިކަމަށްޓަކައި އެހެން ސިނާއަތްތައް ފުޅާކުރުމަށް އިޤްތިޞާދު ރަނގަޅުކުރުމަށް ގެންދަވަނީ ޚާއްޞަ ފިޔަވަޅުތަކެއް އަޅުއްވަމުންނެވެ.
