ރައީސް ޑރ. މުޙައްމަދު މުޢިއްޒުގެ ވެރިކަމުގެ ފުރަތަމަ އަހަރުވެސް ވެގެންދާނީ ރާއްޖޭގެ ތާރީޚުގައި އިޤްތިޞާދީ ތަފާތު ފެނިގެންދާނެ އަހަރަކަށްކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ސަޢީދު ވިދާޅުވީ، ރާއްޖެ މުޅިން އައު ޚަރުފަތަކަށްދިއުމަށް ސިނާއީ ބިންގާއެޅި ނަތީޖާފެންނަމުންދާ އަހަރަކަށް ފުރަތަމަ އަހަރުވެސް ވެގެންދާނެކަމަށެވެ. ހަފްތާ14ވެސްތަފާތުކަމަށާއި، އަދި މީގެކުރީގެ އެއްއަހަރާއި ނުބައްދަލުކަމަށްވެސް ސަޢީދު ވިދާޅުވިއެވެ.
މިނިސްޓަރު މިހެން ވިދާޅުވެފައިވާއިރު، ސްޕެޝަލް އިކޮނޮމިކް ޒޯން، އެސްއީޒެޑްގައި އިންވެސްޓްކުރުމަށް ސަރުކާރުން ހުޅުވާލި ފުރުޞަތުގައި ފުރަތަމަ ޕްރޮޕޯސަލް މިހާރު ލިބިފައިވާކަމަށް ރައީސް ޑރ. މުޙައްމަދު މުޢިއްޒު ދާދިފަހުން ވަނީ ވިދާޅުވެފައެވެ.
ރައީސް ޑރ. މުޢިއްޒު ވިދާޅުވީ، އެސްއީޒެޑްގެ ދަށުން އިންވެސްޓްމަންޓްތަކަށް ހުޅުވާލި ފުރުޞަތުގައި ލިބުނު ފުރަތަމަ ޕްރޮޕޯސަލަކީވެސް އިއާދަކުރަނިވި ހަކަތައިގެ ބޮޑު މަޝްރޫޢެއްކަމަށެވެ. އެގޮތުން 110 މެގަވޮޓްގެ އިއާދަކުރަނިވި ހަކަތައިގެ މަޝްރޫޢެއް ހިންގުމުގެ ޕްރޮޕޯސަލް ލިބިފައިވާކަން އެމަނިކުފާނު ވަނީ ހާމަކުރައްވާފައެވެ.
މީގެ އިތުރުން ރާއްޖޭގެ ތާރީޚުގައި ފުރަތަމަ ފަހަރަށް ސަރުކާރުގެ ބޮންޑެއް، މޯލްޑިވްސް ސްޓޮކް އެކްސްޗޭންޖުގައި ވަނީ ލިސްޓުކޮށްފައެވެ. ޓީ ބޮންޑަކީ ދައުލަތުގެ ދަރަނި މެނޭޖްކުރުމަށް ފައިސާ ހޯދުމަށް ބޭނުންކުރާ އިންސްޓުރޫމަންޓެކެވެ. އެއީ ދިގު މުއްދަތުގެ އިންޓްރެސްޓާއެކު އަނބުރާ ދައްކާ ގޮތަށް ހޯދާ ފައިސާއެވެ.
