ރ. އިނގުރައިދޫ މެޖިސްޓްރޭޓްގެ އިސް މެޖިސްޓްރޭޓް މުހައްމަދު ރަޝާދުގެ ސައިކަލުގައި ރޯކޮށްލައިފިއެވެ.
ދިވެހި ފަނޑިޔާރުންގެ ޖަމްޢިއްޔައިންނެރުނު ބަޔާނެއްގައި ބުނެފައިވަނީ، ރަޝާދުގެ ސައިކަލުގައި ބުރާސްފަތި ދުވަހުގެރޭ ދަންވަރު 2:30 ހާއިރު ބަޔަކު ރޯކޮށްލާފައިވާ ކަމަށެވެ. އެ ޖަމްޢިއްޔާއިން ވަނީ އެކަން ކުށްވެރިކުރައްވާފައެވެ.
އެޖަމްޢިއްޔާއިން ވަނީ ކަމާ ބެހޭ ފަރާތްތަކުން މި މައްސަލަ ވީހާވެސް އަވަހަކަށް ބަލާ ފިޔަވަޅު އެޅުމަށް ގޮވާލާފައެވެ.
އަމިއްލަ ފަރުދަކުވިޔަސް ދައުލަތުގެ ކަމެއް ހިންގުމާ ހަވާލުވެ ހުރި މީހަކު ވިޔަސް، ފަނޑިޔާރުންގެ މަސައްކަތާއި ބެހި ނުފޫޒު ފޯރުވައި ހަދައިގެން ނުވާނެ ކަމަށް ގާނޫނު އަސާސީގެ 141 ވަނަ މާއްދާގެ ނ ގައި ބަޔާންކޮށްފައިވާއިރު ފަނޑިޔާރުންނާ މެދު އާއްމުންގެ ވިސްނުން ހުރި ގޮތާއި ފަނޑިޔާރަކު އާންމުކޮށް ބަލަމުންދާ މައްސަލަތަކުގެ ސަބަބުން ނުވަތަ ބަލަމުންދާ ވަކި މައްސަލައަކާ ގުޅޭ ގޮތުން ނުރައްކާތެރިކމަށް އޭނާ ހުށަހެޅިދާނެ ނިސްބަތަށާއި އާންމު މަސްރަހު ގައުމުގައި އޮތްގޮތުގެ މައްޗަށް ބަލައި ފަނޑިޔާރުންގެ ސަލާމަތާއި ރައްކާތެރިކަން ފޯރުކޮށްދިނުމުގެ އިންތިޒާމު ދައުލަތުގެ ސަލާމަތީ ބާރުތަކުން ހަމަޖައްސަން ވާނެ ކަމަށް ފަނޑިޔާރުންގެ ގާނޫނުގެ 13 ވަނަ މާއްދާގެ ށ އަދި ނ ގައި ބަޔާންކޮށްފައިވާކަމަށް ފަނޑިޔާރުންގެ ޖަމްޢިއްޔާގެ ބަޔާނުގައިވެއެވެ.
އެހެންކަމުން ގާނޫނުތަކުގައި ކަނޑައެޅި ބަޔާންކުރެވިފައިވާ ގޮތުގެ މަތިން، ފަނޑިޔާރުންނަށް ސަލާމަތާއި ރައްކާތެރިކަން ފޯރުކޮށްދިނުމުގެ ގޮތުން އިންތިޒާމް ކުރަން ޖެހޭ ހުރިހާ ކަންކަން އެގޮތުގެ މަތިން އިންތިޒާމް ކުރެވިފައިވާކަން ކަށަވަރު ކުރުމަށް އެޖަމްޢިއްޔައިން ވަނީ ގޮވާލާފައެވެ.
