އިނގިލި ބުރިކޮށްލިއަސް އަޅުގަނޑާ ދެކޮޅަށް ވޯޓު ނުދޭނެ މެންބަރުން އެމްޑީޕީގައި އެބަތިބިކަމަށް ޕީއެންސީގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، އެމްޑީޕީގެ ބައެއް މަޖިލިސް މެންބަރުން ޕީއެންސީއާ ގުޅިވަޑައިގަތުމަށް
"ފެށުން" ނަމުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
މި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ދިވެހީންގެ ރާއްޖެ ކުރިއަށް ދިއުމުގައި މިއަދު އާދެވުނީ މުހިންމު ހިސާބަކަށް އަދި ފެށުމަކަށްކަމަށެވެ. އެމްޑީޕީން ޕީއެންސީއާ ގުޅިވަޑައިގެންނެވި 13 މެންބަރުންނަށް ރައީސް ވަނީ މަރުޙަބާ ދަންނަވާފައެވެ.
ރައީސް ވިދާޅުވީ އެބޭފުޅުން އެ ޚިޔާރުކުރެއްވީ ޤައުމުކަމށާއި، ކޮންމެ މީހަކަށްވުރެ ޤައުމު ބޮޑުކަމަށެވެ. އަމިއްލަ މަސްލަހަތަށްވުރެ ޤައުމު ބޮޑުކަމަށާއި، ޤައުމަށްޓަކައި ކޮށްދެވެން އޮތްކަމެއް ކުރުމަށް އެ މެންބަރުން ޚިޔާރުކުރެއްވީކަމށް ރައީސް ވިދާޅުވިއެވެ.
އެ ނިންމެވުމާއެކު އަދިވެސް މަޖިލިސް މެންބަރުން މި ޤައުމީ ސަފަށް ގުޅޭކަމަށް އުއްމީދުކުރައްވާކަމަށް ރައީސް ވިދާޅުވިއެވެ.
ފާޅުގައި ބައެއް މެންބަރުން ގުޅިވަޑައި ނުގެންނެވިނަމަވެސް، ގުޅެން ބޭނުންވާ ގިނަ މެންބަރުން އަދިވެސް އެބަތިއްބެވިކަމަށް ރައީސް ވިދާޅުވިއެވެ. އިނގިލި ބުރިކޮށްލިއަސް ރައީސާ ދެކޮޅަށް ވޯޓު ނުދެއްވާނެ ބޭފުޅުން އެބަތިއްބެވިކަމަށް ރައީސް ވިދާޅުވިއެވެ.
ރައީސް އެ އިޝާރާތްކުރެއްވީ ރައީސާއި ނައިބު ރައީސް އަޒަލުކުރެވޭގޮތަށް އެމްޑީޕީން ގެނައި އިސްލާހަށެވެ.
މަޖިލީހުގެ ރައީސާ، ދެމެންބަރަކު އަމީން އެވެނިއުގައި ބައްދަލުކޯށްފައިވާ ފޮޓޯއެއް ދައުރުވާކަމަށާއި، އެ ބައްދަލުވުމަކީވެސް ޤައުމީ ބައްދަލުވުމަކަށްވާނެކަމަށް އުއްމީދުކުރައްވާކަމަށް ރައީސް ވިދާޅުވިއެވެ.
ޑިމޮކްރަސީން ދަސްކޮށްދެނީ ޑިމޮކްރެޓިކް ގޮތަށް ރައްޔިތުން ނިންމުން އެގޮތަށް ޤައުމުގެ ކަންކަން ކުރިއަށް ދިއުމުގެ ފުރުޞަތު ދިނުންކަމށެވެ. ޤައުމުގައި ރަނގަޅުކުރަން އަދިވެސް ކަންކަން ހުރުމާއެކު އެމަނިކުފާނަށް ރައްޔިތުންފުރުޞަތު ދެއްވީކަމަށެވެ.
މި ޤައުމުގައި އިންޑިއާ ސިފައިން ތިބެން ރައްޔިތުން ބޭނުން ނުވާކަމަށާއި، ރައްޔިތުން ބޭނުންވާ ކަންކަން ކުރައްވާނެކަމަށް ރައީސް ވިދާޅުވިއެވެ. ރަސްމީކޮށް އިންޑިއާއަށް އެކަން ދަންނަވާފައިވާކަން ފާހަގަކުރައްވާ ރައީސް ވިދާޅުވީ ވަރަށް ތަފްސީލުކޮށް އިންޑިއާ ސިފައިން ތިބެން ނޭދޭވާހަކަ ދަންނަވާފައިވާކަމަށެވެ.
މަތީ ފަންތީގެ ބައްދަލުވުންތަކުގައި ރައްޔިތުންގެނިންމުން އިންޑިއާ ސަރުކާރަށް ދަންނަވާފައިވާކަމަށާއި، ރީތި ގޮތުގައި ވާހަކަ ދައްކައިގެން ރައްޔިތުންގެ މި ނިންމުމާ އެކު އިންޑިއާ ސިފައިން އެޤައުމަށް ގެންދާނެކަމުގެ ފުރިހަމަ ޔަޤީންކަން އެބައޮތްކަމަށް ރައީސް ވިދާޅުވިއެވެ.
ރައްޔިތުންގެ މަޖިލީހުގައި ބާރުގެ ބޭނުން ހިފުމަކީ ގައިރު ޒިންމާދާރު ކަމެއްގެ ގޮތުގައި ރައީސް ސިފަކުރެއްވިއެވެ.
