ވެރިކަން ކުރާ ޕީޕީއެމް/ޕީއެންސީގެ ޓިކެޓުގައި ކުރިޔަށް އޮތް މާލޭ ސިޓީ ކައުންސިލްގެ މޭޔަރު ކަމަށް ވާދަކުރައްވާ، ކުރީގެ ބަންޑާރަނައިބު އަޒިމާ ޝަކޫރުގެ ކެމްޕޭން ވިލިމާލެގައި ކުރިޔަށް ގެންގޮސްފިއެވެ.
އާޒިމާ މިއަދު ވިލިމާލޭގެ ދޮރުން ދޮރަށް ހިނގާފައިވަނީ، މި ސަރުކާރުން ހުޅުމާލޭގައި އަޅަން ނިންމާފައިވާ 100 އެނދުގެ ޓާރޝަރީ ހޮސްޕިޓަލް އަޅަން ނިންމާފައިވާކަން އިއުލާން ކުރުމަށް ބޭއްވި ހަފްލާއަކަށް ފަހުގައެވެ.
ހެލްތު މިނިސްޓްރީން މިއަދު އިއުލާން ކޮށްފައިވާ ގޮތުގައި މި ހޮސްޕިޓަލުގެ ޢަމަލީ މަސައްކަތް އަންނަ އަހަރު ފެށިގެންދާނެއެވެ.
އާޒިމާގެ ކެމްޕޭގެ ހަރަކާތުގެ ތެރެއިން މިއަދު ވިލިމާލޭގައި ދޮރުން ދޮރަށް ހިނގުމަށް ބޭއްވި ހަރަކާތުގައި ހެލްތު މިނިސްޓަރ ޚަލީލުގެ އިތުރުން ރައީސް އޮފީހުގެ މިނިސްޓަރ ނާޒިމްއާއި ސަރުކާގެ އިސް ބައެއްވެރިން ބައިވެރިވެވަޑައިގެންފައި ވެއެވެ.
މޭޔަރުގެ ގޮނޑިއަށް ބޭފުޅަކު އިންތިހާބު ކުރުމަށާއި ހުސްވެފައިވާ ތިން ދާއިރާ އަށް ބޭފުޅުން އިންތިހާބު ކުރުމަށް ބާއްވާ ބައި އިލެކްޝަން އޮންނާނީ އަންނަ މަހުގެ 13 ގައެވެ.
މާލޭގެ މޭޔަރުގެ މަގާމް ހުސްވީ އެ މަގާމުގައި ކުރިން ހުންނެވި ޑރ. މުހައްމަދު މުއިއްޒު ރިޔާސީ އިންތިހާބު ކާމިޔާބު ކުރައްވައި ރައީސްކަމާ ހަވާލުވެވަޑައިގަތުމުންނެވެ. އަދި ތިން ކައުންސިލަރަކު އިސްތިއުފާ ދެއްވާފައި ވަނީ ސަރުކާރުގެ އެކިއެކި މަގާމުތަކަށް ވަޑައިގަތުމަށެވެ.
މާލޭގެ މޭޔަރު ކަމަށް ވާދަކުރެއްވަނީ ޕީޕީއެމް ޕީއެންސީގެ ފަރާތުން އާޒިމާ ޝަކޫރުގެ އިތުރުން އެމްޑީޕީގެ ޓިކެޓުގައި އާދަމް އާޒިމްއާއި، ޑިމޮކްރެޓްސްގެ ފަރާތުން، ސިޓީ ކައުންސިލްގެ ކައުންސިލަރު މުހައްމަދު ސައިފް ފާތިހު އާއި ކުރީގެ ރައީސް އަބްދުﷲ ޔާމީންގެ އާ ޕާޓީ، ޕީއެންއެފްގެ ފަރާތުން ކުރީގެ ޕޮލިސް ކޮމިޝަނަރު ހުސައިން ވަހީދުގެ އިތުރުން މިނިވަން ކެނޑިޑޭޓެއްގެ ގޮތުގައި ވާދަކުރައްވާ ފުރަހަނި ޝުއައިބުއެވެ.
