މި އަހަރުގެ މިހާތަނަށް ރާއްޖެ އަށް އެންމެ ގިނަ އިން ފަތުރުވެރިން އަންނަ ގައުމަކަށް އަވަށްޓެރި އިންޑިއާވެއްޖެއެވެ.
ޓޫރިޒަމް މިނިސްޓްރީން އެންމެ ފަހުން އާންމު ކުރި ތަފާސް ހިސާބުތައް ދައްކާ ގޮތުގައި މި އަހަރުގެ ޖެނުއަރީ 1 އިން ފެށިގެން މިދިޔަ ހޯމަ ދުވަހުގެ ނިޔަލަށް ރާއްޖެ އަށް ޒިޔާރަތްކޮށްފައި ވަނީ 1،834،759 ފަތުރުވެރިންނެވެ. އެގޮތުން އެއްވަނައިގައި އޮތް އިންޑިއާ އިން ރާއްޖެ އައީ 205،278 ފަތުރުވެރިންނެވެ.
ދެ ވަނަ އަށް އެންމެ ގިނަ ފަތުރުވެރިން ޒިޔާރަތް ކުރީ ރަޝިއާ އިންނެވެ. ރަޝިއާ އިން ޒިޔާރަތް ކުރި ފަތުރުވެރިންގެ އަދަދު ވަނީ 203،539 އަށް އަރައިފައެވެ. ތިން ވަނަ އަށް އެންމެ ގިނަ އިން ރާއްޖެ އައީ ޗައިނާގެ ފަތުރުވެރިންނެވެ. ޗައިނާ އިން އެ މުއްދަތުގެ ތެރޭގައި ރާއްޖެ އައިސްފައި ވަނީ 185،761 ފަތުރުވެރިންނެވެ.
ދެން އެންމެ ގިނަ ފަތުރުވެރިން އައި ގައުމުތަކުގެ ތެރޭގައި އިނގިރޭސި ވިލާތާއި ޖަރުމަނާއި އިޓަލީ އާއި އެމެރިކާ އާއި ފްރާންސާއި ސްޕެއިނާއި ސްވިޒަލެންޑު ހިމެނެއެވެ.
ރާއްޖެ އަށް އެންމެ ގިނަ އިން ފަތުރުވެރިން އަންނަ ފަސް ގައުމު:
- އިންޑިއާ – 205،278
- ރަޝިއާ – 203،539
- ޗައިނާ – 185،761
- އިނގިރޭސިވިލާތް – 152،284
- ޖަރުމަނުވިލާތް – 132،188
މި އަހަރުގެ މިހާތަނަށް އެއް ދުވަހުގެ ތެރޭގައި އެންމެ ގިނަ ފަތުރުވެރިން ރާއްޖެ އައީ މިދިޔަ ހޮނިހިރު ދުވަހު އެވެ. އެ ދުވަހު އެކަނި ވެސް 8،054 ފަތުރުވެރިން ރާއްޖެ އައިސްފައިވެ އެވެ. ރާއްޖެ އަށް މިހާރު އެވްރެޖްކޮށް، 6،000 އަށް ވުރެ ގިނަ ފަތުރުވެރިން އާދެއެވެ.
މިދިޔަ ސަރުކާރުން އަމާޒު ހިފީ މި އަހަރުގެ ތެރޭގައި 1.8 މިލިއަން ފަތުރުވެރިން ގެނައުމަށެވެ. ފަތުރުވެރިކަމަށް މިހާރު ރާއްޖޭގައި ޖުމްލަ 1،147 ތަނެއް ދަނީ ހިންގަމުންނެވެ. އޭގެ ތެރޭގައި 180 ރިސޯޓާއި 807 ގެސްޓްހައުސްގެ އިތުރުން 146 ސަފާރީ އާއި 14 ހޮޓެލް ހިމެނެއެވެ. މިތަންތަނުގައި ފަތުރުވެރިކަމަށް 62،448 އެނދު އޮޕަރޭޓްކުރެއެވެ.
